Крар 1

Иса цаварал хкаж хьун

1-2Я Тегьафил, зи сад лагьай ктабда за ваз Иса цаварал хутахай йикъал къведалди Ада авур крарикайни чирвилерикай кхьенай. Цаварал хутахдалди Ада Пак Руьгьдин куьмекдалди Вичи хкягъай илчийриз вуч авуна кӀандатӀа лагьанай. 3Вичи хашунал азабар чӀугурдалай кьулухъ, Иса яхцӀур йикъан къене а илчийрин патав къвез хьанай. Ада Вичел гьакъикъатда чан алайди субутардай гьар жуьредин делилар гъиз хьанай, Ада абуруз Аллагьдин Пачагьлугъ вуч ятӀа лугьудай.

4Садра, илчийрихъ галаз фу недайла, Исади абуруз ихьтин эмир гана:

– Ярусалимдай хъфимир, амма Бубади квез хиве кьур савкьватдал вил алаз акъваз. А савкьватдикай квез зи сивяй ван хьанай. 5Ягьяди инсанрив цик акахьун къачуз тунай, квев, лагьайтӀа, са кьадар йикъарилай Аллагьди Пак Руьгьдик акахьун къачуз тада.

6Илчияр санал кӀватӀ хьайила, абуру Адавай хабар кьуна:

– Ребби, Вуна а чӀавуз Исраилдин пачагьлугъ гуьнгуьна хутада ман?

7– Бубади Вичин гьукумдалди тайинарнавай кӀвалахар кьиле фидай чӀаварни муьгьлетар чир хьун квез герек туш, – лагьана Ада. – 8Квек Пак Руьгь акатна, куьн адан къуватдив ацӀай чӀавуз гьам Ярусалимда, гьам Ягьудатда, гьам Самариятда, гьамни дуьньядин вири пипӀера куьн зи шагьидар жеда.

9ИкӀ лугьун кумаз, Ам абуруз акваз-акваз цавуз хкаж хьана ва цифедин гапӀалдик акатна. Ам абурун вилерикай хкатна.

10Цавуз килигиз амай абурун патав садлагьана лацу пекер алай кьве кас пайда хьана.

11– Галилейвияр, – лагьана абуру, – куьн цавуз килигиз акъвазнава хьи? Квез и Иса куь патавай цаварал хкаж жез акур хьиз, Ам гьакӀ хквенни ийида.

Ягьуддин чкадал илчи хкягъун

12Идалай кьулухъ абур Зейтун пеляй эвичӀна ва Ярусалимдиз хтана. И дагъ Ярусалимдивай са версинин мензилда авай. 13Петру, Ягья, Якьубни Эндирей, ФилипӀни ТӀумай, БартӀаламайни МатӀай, Гьалфеян хва Якьуб, Симун Миллетбаз ва Якьубан хва Ягьуд Ярусалимдиз хтана винел алай кӀвале санал ацукьнавай. 14Абуру вирида сад хьана датӀана дуьаяр ийизвай. Абурухъ галаз са бязи папар, гьакӀни Исадин диде Майрам ва Адан стхаяр авай.

15Садра Петруди кӀватӀ хьанвай вишни къад кас кьван иманийрин вилик къарагъна, лагьана:

16-17– Стхаяр, Каламда Пак Руьгьди Давуд пачагьдин мецелди Ягьудакай виликамаз лагьай гафар кьилиз акъат тавуна жедачир. Чи арада аваз, чахъ галаз санал къуллугъ ийизвайтӀани, Ягьуда Иса кьаз кӀанз геле къекъвезвайбуруз Ам авай чка къалурна. 18Хаинвал авуналди къачур пулунихъ ада ник къачунай, гьа икӀ адан эхир пучни хьанай. Ам, кьилихъди акьуна, руфун пад хьана, ратарни чкӀанваз жагъанай. 19И крарикай Ярусалимда авай вирибуруз хабар хьанай ва а никӀиз абуру чпин чӀалал Гьакелдама, яни Ивидин Ник лагьана тӀвар ганай. 20И крарикай Забурдани кхьенва:

«Адан кӀвал ичӀи хьурай,

ана чан алай касни тамукьрай» # Забур 68:26. ,

ва:

«Адан къуллугъдин чкани масада кьурай» # Забур 108:8. .

21-22ГьакӀ хьайила, адан чкадал маса кас хкяна кӀанда. Герек, а кас Ягьяди Исадив цик акахьун къачуз таз эгечӀай чӀавалай та Иса чи патавай цаварал хъфей йикъалди Исадихъ галаз чи арада хьайи кас жен. А кас Исадал чан хтайвиликай чахъ галаз санал шагьидвал ийидайдини хьун лазим я.

23Кьве касдин: Юст лакӀаб алай Юсуфан (адаз гьакӀни Барсаба лугьудай) ва МатӀидин тӀварар кьунай. 24-25КӀватӀ хьанвайбуру дуьаяр авуна:

– Я Ребби, Ваз виридан рикӀер аквазва, илчивиликай хкатна вичиз гьазурнавай чкадиз хъфей Ягьудан чкадал къуллугъ авун патал Вуна и кьведакай вуж хкядатӀа чаз къалура.

26Ахпа абуру чип вегьена, чип МатӀидал аватна. Гьа икӀ, ам цӀусад илчидин жергедиз цӀикьвед лагьайди яз кьабулна.

Selectat acum:

Крар 1: ЛезПК

Evidențiere

Partajează

Copiază