Крар 2

Пак Руьгь атун

1 ЯхцӀурни цӀуд лагьай йикъан суварин югъ алукьна. Вири са чкада кӀватӀ хьана. 2Садлагьана цавай атай тӀурфандин хьтин кӀеви ванци абур авай кӀвал ацӀурна. 3Виридаз зулар-зулар жезвай ялаврин мецериз ухшар са вуч ятӀани атана чпел гьар садал акъвазайди акуна. 4Вирибур Пак Руьгьдив ацӀана ва чара-чара халкьарин чӀаларал рахаз эгечӀна: Пак Руьгьди абуруз гьа ихьтин алакьунар ганай.

5И чӀавуз Ярусалимда жуьреба-жуьре уьлквейрай тир ва рикӀел Аллагь алай чувудри уьмуьр тухузвай. 6Акъатай гьарай-эвердал гзаф халкь кӀватӀ хьана. Иманияр рахадайла, анал кӀватӀ хьанвайбуруз гьар садаз вичин дидед чӀалалди рахадай ван хьана, абур теспача хьана. 7Гзаф мягьтел хьайи инсанри сада садавай хабар кьуна:

– И инсанар вири Галилейдай тушни? 8Чаз гьардаз абур чи дидед чӀалал рахадай ван къвезва. Им гьикӀ жезвай кар я? 9Чи арада гьар жуьре уьлквейрай инсанар – партивияр, мидявияр, эламвияр, Месапатамдин, Ягьудатдин, Кападукдин, ПӀунтӀасдин ва Асия вилаятдин, 10Фиригъдин, Памфилдин, Мисридин агьалияр, Ливиятдин, Киринейдин патарив гвай агьалияр, Римдай атанвайбур, 11чувудар ва чувудрин дин кьабулнавай масабур, киритӀвиярни арабар ава. Чаз гьар садаз и инсанар Аллагьдин зурба крарикай чи чӀаларал гьикӀ рахазватӀа ван къвезва!

12Пагь атӀана, вуч лугьудатӀа течиз амукьай абуру сада садавай хабар кьазвай:

– Им вуч лагьай чӀал я?

13Са бязибуру хъуьруьнар ийизвай:

– Абур чехир гзаф хъвана, луьхъ хьанва.

Петрудин рахунар

14Петруди, амай цӀусад илчидихъ галаз санал акъвазна, халкьдихъ элкъвена, виридаз ван къведайвал лагьана:

– Ягьудатдин итимар ва Ярусалимдин вири агьалияр! Захъ хъсандиз яб акала! Квез чир хьухь хьи, 15и инсанар хъвана сархуш туш, гьеле сятдин экуьнин кӀуьд я. 16Им Яил пайгъамбарди лагьай гафар кьилиз акъатун я:

17 «Эхиримжи йикъара, – лугьузва Аллагьди, –

За Жуван Руьгь вири инсанрик кутада.

Куь рухваярни рушар Зи мецелди рахаз жеда,

жегьилриз керематар, кьуьзуьбуруз ахварар аквада.

18 Зи лукӀар тир итимрикни папарик

гьа йикъара За Зи Руьгь кутада, абурни Зи мецелди

рахаз жеда.

19 Винида цавал За аламатар къалурда,

агъада чилерални – керематар-ишараяр:

иви, цӀай ва гумадин кӀватӀар.

20 Реббидин чӀехи ва баркалладин югъ алукьдалди виликамаз

Рагъ хкахьна мичӀи жеда, варз, иви хьиз, яру жеда.

21 Реббидин ТӀвар кьуна эверай гьар сад хилас жеда» # Яил 2:28-32. .

22 Исраилвияр, за лугьузвай гафариз яб це! Назаретдай тир Иса – Аллагьди тестикьарнава. ИкӀ тирди Аллагьди Адав ийиз тур аламатрай ва керемат-ишарайрай, Адав къалуриз тур лишанрай аквазва. Квез и крар куь вилералди акуна, хъсандиз чизва. 23Аллагьди виликамаз кьетӀнавайвал, Иса куь гъиле туна. Куьне римвийрин куьмекдалди Иса хашуниз яна кьена. 24Амма Аллагьди Адал чан хкана, Ам ажалдин еперай акъудна. Ажалдихъни Иса кьуна акъвазариз жедай къуват авайди тушир. 25Давуд пачагьди Адакай икӀ лагьанай:

«Заз Ребби датӀана зи вилик кваз аквадай.

Жув кьве рикӀин тахьун патал

Ам зи эрчӀи гъилихъай гала.

26 Гьавиляй зи рикӀ хвешивиливди,

Зи мезни шад гафаривди ацӀанва.

Зун фана ятӀани, захъ умуд ава,

27 я Ребби, Вуна зун агъа дуьньяда тадач,

Жуван муъмин кас тадач сура члафиз!

28 Вуна заз уьмуьрдиз тухузвай рехъ къалурна.

Вун патав гвайла, Зи рикӀ шадвилив ацӀуда» # Забур 15:8-11. .

29Стхаяр, завай квез ачухиз жеда хьи, чи буба Давудни вири инсанар хьиз кьена. Ам кучукни авунай. Адан кьветӀ чахъ гилани ама. 30Адан эвледрикай тир са касдикай, Давуд хьиз, пачагь жеда лагьана Аллагьди кьин кьунай. Давудаз и кар чизвай. Ам пайгъамбар тир эхир. 31Гьавиляй, «Ам агъа дуьньяда тадач» ва «Жуван муъмин кас тадач сура члафиз» лугьудайлани, адаз Месигьдал кьейидалай кьулухъ чан хкведайди виликамаз чизвай. 32Аллагьди и Исадал чан хкана, чун вири и кардин шагьидар я! 33Аллагьди Иса хкажна Вичин эрчӀи гъилихъай ацукьарна. Хиве кьур Пак Руьгь Вичин Бубадин патай къачур Исади а Руьгь чакни кутуна. Квез аквазвайди ва ван къвезвайди гьа вакъиадин нетижа я. 34-35Давуд пачагь, лагьайтӀа, цаварал хкаж хьайиди туш, ятӀани ада лагьана:

«Реббиди зи Агъадиз лагьана:

„Ви душманар За Ви кӀвачерик вегьидалди

Зи эрчӀи гъилихъай ацукь“» # Забур 109:1. .

36Къуй Исраилдин вири инсанриз кӀевелай чир хьурай хьи, куьне хашуниз ягъай и Исадикай Аллагьди Реббини, Месигьни авуна!

37И гафарин ван хьайила, ийир-тийир квахьай инсанри Петрудивайни муькуь илчийривай хабар кьаз хьана:

– Я стхаяр, чна вуч авун лазим я?

38– Куьн гьар са кас Аллагьдин рекьел атун лазим я, – жаваб гана Петруди. – Ахпани куьне, куь гунагьрилай гъил къахчун патал, Иса Месигьдин ТӀварцӀелай цик акахьун къачу. Гьа чӀавуз квез Аллагьди Пак Руьгь пай яз гуда. 39Аллагьди и кар квез, куь аялриз ва яргъара авайбуруз, Ада Вичин патав эверзавай кьван вирибуруз хивени кьуна.

40Петруди гьакӀни гзаф маса гафаралди абуруз несигьатар гана:

– Рекьяй акъатнавай и несилдин арада куьне куьн хилас ийиз тур.

41Адан гафар кьабулай ва имандал атай инсанри цик акахьун къачуна. Гьа юкъуз Исадихъ иман ийизвайбурун кьадар пуд агъзур кас кьван артух хьана.

Иманийрин уьмуьр

42Иманийри вири вахт санал акъудзавай: санал илчийрин чирвилериз яб гузвай, санал фуни атӀузвай, санал дуьаярни ийизвай. 43Илчийри къалурзавай кьван гзаф аламатар ва керемат-ишараяр акурла, инсанрин рикӀера кичӀевал гьатзавай. 44Вири иманияр санал алай, абурухъ авай-авачирдини уртах тир. 45Абуру чпин мал-мулк, эменни маса гуз, хьайи пул чпин арада гьар садаз герек тир кьван пайзавай. 46Абур гьар юкъуз садвилелди Аллагьдин КӀвале кӀватӀ жезвай. Абуру нубатдалди кӀвалера вирида санал фу атӀузвай, шадвилелди ва михьи рикӀелди фу незвай, 47Аллагьдиз шукурар ийизвай. Вири халкьди абуруз гьуьрметзавай, Аллагьдини гунагьрикай хиласзавайбурун кьадар югъ-къандавай артухарзавай.

Selectat acum:

Крар 2: ЛезПК

Evidențiere

Partajează

Copiază