Крар 3

Петруди кьецӀи кас сагъар хъувун

1Садра сятдин пудаз, дуьа ийидай вахтунда Петруни Ягья Аллагьдин КӀвализ фенай. 2И чӀавуз Аллагьдин КӀвалин «Иербур» тӀвар алай варарихъ са кьецӀи кас гъана. Адавай дидедиз хьайидалай инихъ къекъвез жезвачир. Гьар юкъуз ам гъана гьанал эцигдай, адани Аллагьдин КӀвализ къвезвайбурувай садакьа тӀалабдай. 3Аллагьдин кӀвализ гьахьиз кӀанзавай Петруни Ягья акурла, ада гьабурувайни садакьа тӀалабна. 4Петруни Ягья элкъвена дикъетдивди адаз килигна. Петруди адаз лагьана:

– Чаз килиг!

5Абурувай са затӀ гьатдатӀа акваз кьил хкажна къекъвераг абуруз килигна. 6Инал Петруди лагьана:

– Гимишни къизил захъ авач, амма за ваз захъ авайди гуда. Назаретдай тир Иса Месигьдин ТӀварцӀелай за ваз лугьузва – къарагъна къекъуьгъ!

7Петруди кьецӀекан эрчӀи гъил кьуна адаз къарагъиз куьмекна, гьасятда адан кӀвачерин кӀарабар мягькем хьана. 8Ам къудгъунна кӀвачел къарагъна, къекъвез эгечӀна. Ам абурухъ галаз къекъвез ва хвешила хкадариз, Аллагьдиз шукурар ийиз, Аллагьдин КӀвализ гьахьна. 9Вири инсанриз акуна хьи, ада къекъвез Аллагьдиз шукурар ийизва. 10Абуруз ам Аллагьдин КӀвалин «Иербур» тӀвар алай варарихъ ацукьна, аниз фир-хквердавай садакьа тӀалабзавай кас тирди чир хьана. Халкь ам сагълам хьунал мягьтелни гьейран хьанвай.

11Сагъ хьайиди Петрудилайни Ягьядилай алатзавачир. Халкь атана Сулейманан ширас тӀвар алай чкада авай илчийрал гьейранвилелди алтӀушнай. 12И кар акур Петруди абуруз лагьана:

– Исраилвияр! Вучиз куьн и кардал тажуб хьанва? Ам икӀ къекъведайвал авун чна чи къуватдалди ва я Аллагьдин вилик чи муъминвилин куьмекдалди авур хьиз яни квез? 13Ибрагьиман, Исакьан ва Якьубан Аллагьди, чи бубайрин Аллагьди, Вичин ЛукӀ Исадал баркалла гъана. Куьне, лагьайтӀа, Ам дувандиз акъудна. ПилатӀаз Ам ахъа хъийиз кӀан хьанатӀани, куьне ПилатӀан вилик Исадикай кьил къакъудна. 14Куьне Пак ва Гьахъ-Михьи Касдикай кьил къакъудна ва ивикъич#3:14 Ивикъич – инсан яна кьейи кас. ахъаюн тӀалабна. 15Амма куьне уьмуьр Гузвайди кьена. Аллагьди Адал чан хкана, чун а кардин шагьидар я! 16Иса Месигьдин ТӀварцӀихъ иман авуни и квез аквазвай ва чидай кас мягькемарна. Исадихъ иман авуни и кас сагъар хъувуна, и кар квез виридаз акваз-акваз кьилиз акъатна.

17Гила, стхаяр, заз чизва хьи, куьне Иса рекьидай чӀавуз квез, куь кьиле авайбуруз хьиз, куьне вуч ийизватӀа чизвачир. 18Месигьди азаб-азият чӀугуникай Аллагьди вири пайгъамбаррин мецелди виликамаз лугьунни авунай, Ада и кар кьилизни акъуднай.

19Куь гунагьрилай гъил къахчун патал Аллагьдиз килиг ва Адан рекьел ша! 20Гьа чӀавуз Аллагьди куь руьгьер кӀубанарда ва куь патав квез виликамаз тайинарнавай Месигь – Иса ракъурда.

21Гьеле кьуд пад цӀийи хъжедалди Ам цаварал аламукьун лазим я. Аллагьдини къадим вахтарилай инихъ Вичин пак пайгъамбардин мецелди гьа икӀ жеда лагьанай. 22Мусади лагьанай: «Реббиди, куь Аллагьди, квез зун хьтин пайгъамбар ракъурда, ам квекай сад жеда. Куьн гьар са карда гьа пайгъамбардиз табий хьухь. 23Адан чӀалаз килигзавачир гьар вуж хьайитӀани халкьдин арадай чукурда ва ам телеф жеда»#Киххьей Къанун 18:15, 18, 19.. 24Смаилалай эгечӀна вири пайгъамбаррини гьа и йикъара кьиле фейи крарикай виликамаз лагьанай. 25Пайгъамбардин эвледарни Икьрардин варисар куьн я. Аллагьди Ибрагьимаз лагьай и гафарив куь бубайрихъ галаз и Икьрар кутӀуннавай: «Ви несилар чилел алай вири халкьар патал хийир-дуьа жеда»#Хьунухь 22:18.. 26Аллагьди Вичин лукӀрал чан хкайла, сифте Ада Ам куьн гунагь рекьивай яргъа авун патал куь патав ракъурна, гьа икӀ Аллагьди Вичин лукӀарин куьмекдалди квез хийир-дуьа авуна.

Selectat acum:

Крар 3: ЛезПК

Evidențiere

Partajează

Copiază