Крар 4

Меслягьатдин вилик

1Петруни Ягья халкьдив рахадайла, абурун патав хахамар, Аллагьдин КӀвалин къаравулрин кьилевайди ва сакъаяр атана. 2Илчийри халкьдиз чирвилер гузвайла, абуру, Исадал кьейидалай кьулухъ чан хтун чешне гъиз, кьейидалай кьулухъ чан хтун авай кар тирди чпин рахунра тестикьарзавай. Сакъайриз илчийрин и крарикай гзаф хъел атанвай. 3Абуру Петруни Ягья кьуна ва геж вахт хьуниз килигна, пакамалди абур къазаматна. 4Петрудизни Ягьядиз яб гайи гзафбуру Шад Хабардихъ иман авуна, гьа икӀ иманийрин кьадарни вад агъзурдав агакьна.

5Пакагьан юкъуз чувудрин гьакимар, агъсакъалар ва тавратдарар Ярусалимда санал кӀватӀ хьана. 6Абурук кьилин хахам Гьайнас, Каяф, Ягья, Искендер, кьилин хахамдин мукьва-кьилиярни акахь хъувунай. 7Абуру Петруни Ягья чпин патав гъун эмирна, гъайила, жузуна:

– Ихьтин крар ийидай къуват квез гьинай атана? И крар куьне нин тӀварцӀелай ийизва?

8И чӀавуз Пак Руьгьдив ацӀай Петруди жаваб гана:

– Эй халкьдин гьакимарни агъсакъалар! 9КьецӀек гьикӀ сагъ хъхьанатӀа ачухарун патал къе куьне чавай жаваб гьаркьзава#4:9 Гьаркьун – са вуч ятӀани кӀевелей тӀалабун.. 10Квез ва Исраилдин вири халкьдиз чир хьухь хьи, и кас исятда куь вилик сагъ хъхьана акъвазун Назаретдай тир Иса Месигьдин ТӀварцӀелай авур кар я! Куьне Ам хашуниз яна кьена, амма Аллагьди Адал чан хкана.

11 «Куьне – къванцин устӀарри – гьяз татана гадарай къванцикай

цлан хандакӀдин пипӀе твадай лап кьилин къван хьана» # Забур 117:22. .

И гафар гьа Исадикай кхьенвайбур я. 12Хилас ийидай масад авач! Гьадан ТӀварцӀелай гъейри чун хиласдай маса тӀвар чилин винел алайди туш!

13Петруни Ягья кӀелнавачир авам инсанар тирди чизвай гьакимар, абур викӀегьвилелди рахазвай тегьер акурла, тажуб жезвай. Гьакимриз абур Исадихъ галаз хьайи ксар тирдини чизвай. 14Петрудинни Ягьядин патав абуру сагъар хъувунвай касни гваз акурла, гьакимривай са гафни абуруз акси яз лугьуз жезвачир. 15Инал абуру илчийриз кӀваляй экъечӀун эмирна ва чпин арада меслятар ийиз эгечӀна.

16– И инсанриз чна вуч ийин? – лугьузвай гьакимри, – абурун и чӀехи керемат-ишарадикай Ярусалимда авай вири агьалийриз чир хьанва, чавай а кар кваз такьуна жедач. 17Исадикай халкьдин арада мадни гегьеншдиз ван чукӀун тавун патал, ша чна абуруз чпин рахунра Адан ТӀвар кьун къадагъа ийин.

18Гьакимри илчияр мад эверна хкана, Исадин ТӀварцӀелай рахун ва чирвилер гун абуруз кӀевелай къадагъа авуна. 19Амма Петрудини Ягьяди жаваб гана:

– Де куьне лагь, чун Аллагьдилай гзаф квез табий хьунухь Аллагьдин вилик дуьз кар жедани? 20Чавай акурдакай ва ван хьайидакай лугьун тавуна акъвазиз жедач.

21Гьакимривай илчийриз жаза гудай багьна жагъуриз жезвачир, абуруз кичӀерар гана ахъайна, вучиз лагьайтӀа илчийри авур кардай вири халкьди Аллагьдиз шукурар ийизвай. 22Вич сагъ хъхьунин керемат-ишара акур касдин яшар яхцӀур йисалай виниз тир эхир.

Иманийрин дуьа

23Азад хъхьайдалай кьулухъ Петруни Ягья чпинбурун патав хъфена ва абуру чпиз чӀехи хахамрини агъсакъалри лагьай кьван гафарикай ихтилатна. 24Иманийриз ван хьайила, абуру вирида сад хьана дуьаяр авуна:

«Эй Вири Ихтияррин Иеси! Чилни цав, гьуьлер ва анра авай гьар са затӀ халкь авурди Вун я. 25Чи буба ва Ви лукӀни тир Давудан мецелай Вуна Пак Руьгьдин куьмекдалди лагьанай:

Вучиз къал-къил акатзава халкьарик,

инсанрини туькӀуьрзава ичӀи фендер?

26 Къарагъзава чилерин пачагьар

ва гьакимар саналди

меслят жезва Реббидиз акси яз,

Адан Месигьдизни акси яз» # Забур 2:1-2. .

27РикӀивайни, и шегьерда Гьирудни ПунтӀи ПилатӀ римвийрихъни Исраилдин халкьдихъ галаз сад хьанва. Абурухъ виридахъ Ви ГуьцӀуьр алай пак ЛукӀ Исадал гъил хкаждай чӀуру къаст авай. 28ИкӀ хьана кӀандайди Вуна виликамаз къетӀнай. И кар Ви къудратдин гьунар я. 29Исятда, я Ребби, гьакимри чаз гьикӀ кичӀерар гузватӀа, килиг. Гьавиляй Вуна чаз зурба викӀегьвилелди Ви гаф инсанриз чирдай къуват це. 30Инсанриз жуван къудрат къалура, къуй Ви пак ЛукӀ Исадин ТӀвар кьур-кьур чкада азарри кьунвайбур сагъ хъхьурай, аламатар ва керемат-ишараяр хьурай!

31Дуьаяр авуна куьтягь хьайила, абур кӀватӀ хьанвай чка зурзана. Абур вири Пак Руьгьдив ацӀана, ва абуру Аллагьдин Гаф викӀегьвилелди инсанрив агакьариз хьана.

Вири уртах я

32Иманияр рикӀералдини руьгьералди вири сад тир. Садани вичин эменни анжах са вичинди я лугьудачир, абурухъ авай-авачирди уртах тир. 33Илчийри Ребби Исадал чан хтайдакай уьтквемвилелди ва агалкьунар аваз шагьидвал ийиз хьанай, Аллагьдини абуруз виридаз чӀехи берекат гузвай. 34Абурун арада дарвиле авай кас авачир, чпихъ мал-мулк авайбуру вахт-вахтундилай, абур маса гуз, пул гъиз 35илчийрин ихтиярда твадай, а пул иманийрин арада гьар садаз герек кьадар пайдай.

36Месела, Юсуфа, Куьпридай тир левиди (адаз илчийри Барнаба, яни «Секинвал гудайди» лагьай тӀварни ганвай), 37вичин ник маса гана, пул гъана илчийрин гъиле вугана.

Selectat acum:

Крар 4: ЛезПК

Evidențiere

Partajează

Copiază