Bruă Mơnuă 6
6
Tơjuh Čô Tha Sang Yang
1Hlăk anŭn mrô ƀing ding kơna đĭ jai lu hloh dơ̆ng, ƀing Hêlênist pơhiăp brŏk kơ ƀing Hêbrơ, yua kơ gơñu ƀu hơdơr ôh kơ ƀing đah kơmơi Hêlênist djai rơkơi amăng tơlơi gơñu pơpha gơnam ƀơ̆ng huă rĭm hrơi. 2Pluh dua čô khua ding kơna iâu pơƀŭt glaĭ abih bang ƀing ding kơna hăng laĭ: “Lui hĭ bruă pơtô boh pơhiăp Ơi Adai, pŭng kơ mă bruă gơnam ƀơ̆ng huă anŭn jing ƀu gal djơ̆ ôh. 3Tui anŭn, Ơ ƀing adơi ayŏng, ruah mă bĕ mơ̆ng amăng ƀing ta tơjuh čô mơnuih hmâo tơlơi hing ang hiam, bă blai Yang Bơngăt Hiam, hmâo tơlơi kơhnâo, laih anŭn ƀing gơmơi či jao brơi bruă anai kơ gơñu. 4Bơ kơ ƀing gơmơi, gơmơi či pioh kơ bruă iâu laĭ hăng pơtô pơblang boh pơhiăp Ơi Adai đôč.”
5Abih bang ƀing ding kơna leng kơ mơak kơ tơlơi gơñu kơčĕ anŭn, laih anŭn gơñu hmâo ruah Êtiên pô bă tơlơi đaŏ laih anŭn Yang Bơngăt Hiam, Philip, Prokorus, Nikanor, Timôn, Parmênas, laih anŭn Nikôlas mơnuih plei Antiôs tui tơlơi đaŏ Yuđa. 6Gơñu pơdah tơjuh čô anŭn kơ ƀing khua ding kơna, giơ̆ng anŭn ƀing khua ding kơna iâu laĭ ah tơngan ƀơi gơñu.
7Boh Pơhiăp Ơi Adai lar hyu jai lu, laih anŭn ƀing ding kơna pơ plei Yêrusalem jai đĭ lu hloh dơ̆ng. Hmâo lu biă mă ƀing khua ngă yang ăt gưt kơ tơlơi đaŏ mơ̆n.
Tơlơi Arăng Mă Êtiên
8Êtiên bă hăng tơlơi pap mơ̆ng Ơi Adai laih anŭn tơlơi dưi mơyang, ngă tơlơi mơsêh mơyang hăng gru kơnăl mơyang tơ̆ng krah ană plei pla. 9Samơ̆ hmâo đơđa ƀing mơnuih amăng sang bơjơnum arăng pơanăn sang jơnum kơ ƀing mơnuih rơngai#6:9 ƀing mơnuih rơngai: Anai jing ƀing mơnuih Yuđa, gơñu jing ƀing hlŭn, samơ̆ arăng hmâo blơi laih ƀôdah hmâo pha brơi laih tơlơi rơngai., laih anŭn plei Siren, ƀing plei Aleksandri, hăng ƀing Yuđa mơ̆ng čar Silisi laih anŭn čar Asi, tơgŭ đĭ pơrơjah hăng Êtiên. 10Samơ̆ gơñu ƀu dưi pơkơdơ̆ng glaĭ ôh hăng boh pơhiăp kơhnâo Êtiên, Yang Bơngăt Hiam yơh Pô brơi ñu pơhiăp. 11Tui anŭn hăng tơlơi hơgơ̆m gơñu pơsur mơnuih brơi laĭ tui anai: “Gơmơi hmâo hmư̆ pô anai pơhiăp pơgao hmiah hăng Môis laih anŭn hăng Ơi Adai.” 12Gơñu pơsur ƀing ană plei, ƀing kŏng tha, hăng ƀing nai pơtô tơlơi juăt. Gơñu rai mă čaŏ Êtiên hăng ba ñu pơ anăp ƀing khua phat kơđi. 13Gơñu brơi mơnuih ngă gơ̆ng jơlan ƀlor, laĭ tui anai: “Pô anai nanao pơhiăp ƀrưh hmiah pơkơdơ̆ng hăng anih rơgoh hiam anai laih anŭn hăng tơlơi juăt Môis. 14Yua kơ gơmơi hmâo hmư̆ ñu laĭ kơ Yêsu plei Nasaret či pơrai hĭ anih rơgoh hiam anai hăng pơplih hĭ tơlơi phiăn hơdip Môis hmâo brơi laih kơ ƀing ta.” 15Abih bang mơnuih dŏ ber amăng tơlơi phat kơđi anŭn dŏ krĕng lăng kơ Êtiên ƀu ƀleh mơta ôh, ƀuh ƀô̆ mơta ñu hrup kar hăng ƀô̆ mơta ling jang.
Selectat acum:
Bruă Mơnuă 6: JRA2016
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2016 United Bible Societies. All rights reserved.
