Bruă Mơnuă 5
5
Ananias Hăng HʼSaphira
1Samơ̆ hmâo sa čô mơnuih anăn ñu Ananias hrŏm hơbĭt hăng bơnai ñu HʼSaphira sĭ sa blah lŏn. 2Ñu hăng bơnai ñu tŭ ư hrŏm hơbĭt djă pioh sa črăn prăk sĭ anŭn, laih anŭn ba prăk dŏ glaĭ pioh ƀơi tơkai ƀing khua ding kơna. 3Pêtrôs laĭ hăng ñu: “Ơ Ananias, hyư̆m satan hmâo bă blai pran jua ih, tơl ih ƀlor kơ Yang Bơngăt Hiam, hăng djă pioh sa črăn nua lŏn? 4Hlăk ih aka sĭ lŏn anŭn ôh, hyư̆m ƀu djơ̆ ôh hă ñu ăt jing gơnam ih pô? Laih anŭn tơ ih sĭ laih lŏn anŭn, ƀu djơ̆ ôh hă ih dưi yua prăk anŭn tui hăng ih pô kiăng? Hyư̆m ih pơmĭn amăng pran jua tơl ih ngă tơlơi anai? Ih hmâo ƀlor ƀu djơ̆ kơ mơnuih ôh, samơ̆ ih ƀlor kơ Ơi Adai.” 5Ananias hmư̆ hơdôm tơlơi pơhiăp anŭn ñu rơbuh hăng djai mơtam. Abih bang ƀing hmư̆ tơlơi anŭn hwĭ krip biă mă. 6Ƀing tơdăm tơgŭ pŏn drơi jan ñu hăng čơkung ba nao dơr hĭ.
7Năng ai klâo mông tơdơi bơnai ñu mŭt nao aka ƀu thâo ôh hơgĕt tơlơi hmâo truh laih. 8Pêtrôs tơña ñu: “Laĭ brơi kâo thâo bĕ, djơ̆ mơ̆ nua ƀing gih sĭ lŏn hơdôm anŭn đôč?”
Ñu laĭ: “Ơ, hơdôm anŭn yơh.”
9Tui anŭn Pêtrôs laĭ: “Hyư̆m ƀing gih sa pran jua khĭn kiăng lông lăng Yang Bơngăt Hiam Khua Yang? Lăng adih, tơkai ƀing glaĭ mơ̆ng dơr rơkơi ih truh ƀơi bah amăng laih, laih anŭn gơñu či čơkung nao dơr ih kar kaĭ mơ̆n.” 10Ƀơi mông anŭn mơtam ñu rơbuh ƀơi tơkai Pêtrôs hăng djai hĭ. Ƀing tơdăm mŭt hăng ƀuh ñu djai laih, gơñu čơkung nao dơr ƀơi giăm rơkơi ñu. 11Abih bang Phung Sang Ơi Adai hăng abih bang ƀing hmư̆ kơ tơlơi anŭn hmâo tơlơi hwĭ kơtang biă mă.
Tơlơi Phrâo Hiam Lar Jai Prŏng
12Ƀing khua ding kơna ngă lu gru mơyang laih anŭn tơlơi mơsêh mơyang, ƀơi tơ̆ng krah ƀing ană plei pla. Abih bang ƀing gơñu sa pran jua bơjơnum glaĭ ƀơi adring Salômôn. 13Ƀu hmâo ôh ƀing mơnuih pơkŏn khĭn mŭt amăng ƀing gơñu, samơ̆ ƀing ană plei bơni pơpŭ kơ gơñu biă mă. 14Samơ̆ ƀing đaŏ kơ Khua Yang ƀrư̆ hrơi jai lu tui, wơ̆t đah rơkơi wơ̆t đah kơmơi. 15Tơl arăng čơkung ba ƀing ruă dưm ƀơi jơlan prŏng, brơi gơñu dŏ đih ƀơi sưng ƀôdah ƀơi kiao buk, kiăng kơ tơ Pêtrôs găn ƀơi anŭn tơ-u ñu bang djơ̆ đơđa ƀing gơñu. 16Ƀing ană plei mơ̆ng plei jum dar ăt nao pơtŭm pơ plei Yêrusalem mơ̆n, ba nao ƀing duăm ruă hăng ƀing hmâo yang bơngăt grĭ hơƀak ngă; laih anŭn abih bang gơñu leng kơ suaih soh sel.
Arăng Ngă Sat Kơ Ƀing Khua Ding Kơna
17Samơ̆ khua ngă yang prŏng hloh hăng abih bang hrŏm hơbĭt hăng ñu, kiăng laĭ ƀing Sadusi, tơgŭ pơkơdơ̆ng glaĭ bă hăng tơlơi moañ. 18Gơñu mă čaŏ ƀing khua ding kơna laih anŭn krư̆ hĭ ƀing gơ̆ amăng sang mơnă. 19Samơ̆ tơdang amăng mlam hmâo sa čô ling jang Khua Yang pŏk brơi bah amăng war sang mơnă laih anŭn ba gơñu pơ gah rơngiao, hăng laĭ, 20“Nao bĕ, dŏ dơ̆ng amăng sang kơkuh pơpŭ laih anŭn pơtô kơ ƀing ană plei abih bang boh pơhiăp djơ̆ kơ Tơlơi Hơdip phrâo anai.” 21Hmư̆ tơlơi anŭn, mơguah ưm gơñu mŭt amăng sang kơkuh pơpŭ laih anŭn čơdơ̆ng pơtô.
Khua ngă yang prŏng hloh laih anŭn ƀing hrŏm hơbĭt hăng ñu truh. Gơñu iâu pơƀŭt ƀing khua phat kơđi hăng abih bang ƀing kŏng tha ană Israel. Giơ̆ng anŭn gơñu pơkiaŏ nao brơi arăng ba ƀing khua ding kơna mơ̆ng sang mơnă rai pơ gơñu. 22Samơ̆ tơ ƀing khua tơhan truh pơ sang mơnă, gơñu ƀu ƀuh dơ̆ng tah ƀing khua ding kơna dŏ amăng sang mơnă. Gơñu glaĭ hăng laĭ pơthâo tơlơi anŭn hăng laĭ, 23“Gơmơi ƀuh sang mơnă khuă kơjăp khŏp, laih anŭn ƀing tơhan ăt dŏ gak ƀơi bah amăng, samơ̆ tơ gơmơi pŏk bah amăng, gơmơi ƀu ƀuh sa čô mơnuih amăng anŭn ôh.” 24Giơ̆ng hmư̆ tơlơi anŭn, khua tơhan wai lăng sang kơkuh pơpŭ laih anŭn ƀing khua ngă yang prŏng hmâo tơlơi rŭng răng yua ƀing khua ding kơna anŭn, ƀu thâo ôh hyư̆m tơlơi anai či jing. 25Hmâo sa čô rai hăng laĭ pơthâo kơ gơñu: “Gih lăng adih, ƀing mơnuih ƀing gih hmâo krư̆ anŭn, ră anai gơñu dŏ pơtô laĭ kơ ƀing ană plei amăng sang kơkuh pơpŭ.” 26Giơ̆ng kơ anŭn khua kơ ƀing tơhan wai lăng sang kơkuh pơpŭ nao hrŏm hơbĭt hăng tơhan ñu nao mă ƀing khua ding kơna, samơ̆ ƀu khĭn ngă sat ôh, yua kơ gơñu hwĭ kơ ƀing ană plei glŏm boh pơtâo kơ gơñu.
27Giơ̆ng gơñu mă ba ƀing khua ding kơna, gơñu ba ƀing gơ̆ ƀơi anăp ƀing khua phat kơđi. Khua ngă yang prŏng hloh tơña kơ ƀing gơ̆, laĭ, 28#Mat 27:25.“Gơmơi hmâo khă laih ƀing gih kơtang kơtĭt ƀu brơi pơtô amăng anăn anai ôh, samơ̆ ƀing gih hmâo ngă pơbă amăng plei Yêrusalem hăng tơlơi ƀing gih pơtô, laih anŭn ƀing gih kiăng drah Mơnuih anŭn tuh ƀơi ƀing gơmơi dơ̆ng hă!”
29Samơ̆ Pêtrôs hăng ƀing khua ding kơna laĭ glaĭ: “Gơmơi khŏm gưt kơ Ơi Adai, hloh kơ gưt kơ mơnuih. 30Ơi Adai kơ ƀing ơi adon ƀing ta hmâo pơhơdip glaĭ laih Yêsu, pô ƀing gih hmâo pơ̆ng pơdjai hĭ laih ƀơi kơyâo bơrơkal. 31Ơi Adai hmâo yŏng đĭ brơi Pô anŭn dŏ gah hơnuă Ñu, jing Khua Wai Lăng laih anŭn Pô Pơklaih, kiăng kơ ƀing ană Israel kơhmal tơlơi soh laih anŭn hmâo tơlơi pap brơi tơlơi soh gơñu. 32Gơmơi jing ƀing ngă gơ̆ng jơlan kơ tơlơi anai hrŏm hơbĭt hăng Yang Bơngăt Hiam Pô Ơi Adai hmâo pha brơi kơ ƀing gưt hiăp Ñu, ăt ngă gơ̆ng jơlan kar kaĭ mơ̆n.”
33Tơ hmư̆ hơdôm tơlơi anŭn gơñu hil biă mă laih anŭn gơñu kiăng pơdjai hĭ ƀing khua ding kơna. 34Samơ̆ sa čô Pharisi, amăng ƀing khua phat kơđi, anăn ñu Gamaliel, sa čô nai pơtô tơlơi juăt ƀing ană plei pla pơpŭ biă mă, tơgŭ dơ̆ng pơđar kơ arăng brơi ƀing khua ding kơna tơbiă hĭ pơ gah rơngiao amăng ƀiă mông. 35Giơ̆ng anŭn ñu laĭ kơ ƀing khua phat kơđi: “Ơ ƀing ană plei pla Israel, răng bĕ kơ tơlơi ƀing gih ngă kơ ƀing anai. 36Hlăk hlâo adih Thiôdas tơgŭ đĭ, pơhaih kơ ñu pô jing sa čô khua gĭt gai, laih anŭn hmâo giăm pă rơtuh čô mơnuih đuaĭ tui ñu; samơ̆ arăng pơdjai hĭ ñu, laih anŭn abih bang ƀing đuaĭ tui ñu čơlah hĭ bru bra, laih anŭn bruă gơñu ngă ƀu jing ôh. 37Tơdơi kơ ñu, hmâo dơ̆ng Yudas mơnuih Galilê tơgŭ đĭ amăng rơnŭk arăng yap akŏ mơnuih, laih anŭn ñu iâu mă lu mơnuih ƀing ană plei đuaĭ tui ñu. Ñu djai kar kaĭ mơ̆n, laih anŭn abih bang ƀing đuaĭ tui ñu čơlah bru bra. 38Tui anŭn amăng tơlơi truh anai, kâo laĭ kơ ƀing gih anăm hơduah tơlơi pơkơdơ̆ng hăng ƀing anai ôh. Lui măk ai gơñu bĕ. Yua kơ tơdah hơdră jơlan ƀôdah bruă anai tơbiă mơ̆ng mơnuih, ñu ƀu či jing ôh. 39Samơ̆ tơdah bruă anai tơbiă mơ̆ng Ơi Adai ƀing gih ƀu dưi pơglưh hĭ ƀing anŭn ôh, samơ̆ kơđai glaĭ hwĭ kơ ƀing gih pơblah pơkơdơ̆ng glaĭ hăng Ơi Adai.” 40Tui anŭn, ƀing gơñu gưt tui hiăp Gamaliel laĭ anŭn. Gơñu iâu ƀing khua ding kơna mŭt, gơñu taih ƀing gơ̆ hăng gai, khă ƀing gơ̆ ƀu brơi pơtô amăng anăn Yêsu ôh, laih anŭn phư hĭ gơñu. 41Tui anŭn ƀing khua ding kơna tơbiă mơ̆ng anih phat kơđi, pran jua bă hăng tơlơi hơ̆k mơak yua kơ Ơi Adai yap kơ gơñu lăp tŭ tơlơi mlâo yua kơ anăn Yêsu. 42Laih anŭn rĭm hrơi amăng sang kơkuh pơpŭ ƀôdah pơ rĭm boh sang ƀing đaŏ, gơñu ƀu pơdơi ôh pơtô pơhrăm hăng ră ruai Tơlơi Phrâo Hiam kơ tơlơi Yêsu jing Yang Krist.
Selectat acum:
Bruă Mơnuă 5: JRA2016
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2016 United Bible Societies. All rights reserved.
