Lukas Uram 15
15
Er Yesus biryi domba waningna deyok ati kebdeiboka eterebmou uram
15:1-7
1Er Yesus biryi ninyi etereramwe ura, “Roma weik sien nang ati pajak dengna karebdarur,” en nang ab, yuk malyi kun dinyi kuramnyi nang ab Er Yesus dam yandoka Erci etereramwe uram kekeryangaramnyi. 2Ba, Farisi nang ab Musa kerek sengna uram etereramnyi nang ab aryi talak dobmaici, ato ebmai, “Se, Anyi bira malyi kun dinyi kunung nang ab bukokmar aryi yina tonkwa yinmang,” ebmai. 3Ato ebmai ati Er Yesus biryi uram doboka neik deyok ati, kemdeirina aryi liliboka ato eterebde binmou. 4“Sun kankan dam aryi ninyi tentok aryi domba seratus baryi winirante asi, tentok wanikmote ura, una kubte do? Erci, ‘Malyi, tentok dinyi ara a kunmarur,’ kum tenebte erda sembilan puluh sembilan baryi dinyi ara winirante mutuk dam takloboka tentok domba ingkiringbite. 5Ingkiringbinmote ani, a wanikmote domba sirya asing eibte ura, er kanya kilkil aryi tomoboka takubdobturyi, yaute. 6Boyanganmote ani, sirya atei boyate ura, er kwit yabwe ab, er ai dam ninyi ab naboka abturyi, ato ebte, ‘Ni kwit yabwe, ni domba wanikmonwe bisam ara sirya eibmanci, bobde yanman aryi, ni kanya kilkil mitik kum kubmanir,’ eboka nukarebte ura, er kwit yabwe ababyi kanya kilkil kubte. 7Ati, Niryi sunsi ebkwinsin, sembilan puluh sembilan baryi tuba kunmai domba ara ninyi sembilan puluh sembilan baryi nang ati kiklibmou. A nang ara ato tenenung, ‘Nunda utotoa malyi kun dinyi ton kum kunub,’ teneraming nang ati, imtam kuraming nang aryi, ‘Teleb,’ tenen dinyi ara mitiktoto teneraming. Bok, tentok domba wanikmou ani, dobmou domba ara ninyi tentok ati kiklibmou. Anyi bira er malyi tenen dinyi takloboka Er Imtamnyi Uram eanci to kununanyi kibci ura, sun kanya teleb aryi kilkil mitik kum kurande,” ebmou.
Er Yesus biryi dengna weik keil uang waningna deyok ati kebdeiboka eterebmou uram
15:8-10
8Er Yesus biryi neik deyok ati enmouci, yuk kemdeirina ton ebmou, “Ani, tonda ner tentok aryi dengna weik keil uang takubaryi deibdante uca, tentok wanikmote. Ura, uk ubna una kumkum nimalyi kwarakdeiboka ai sungsunga kiboka ingkiringmote ura, eibdobte do? Erci, ‘Malyi, tentok dinyi ara a wanikmanyi ababyi weika ara tuba deibdobman,’ kum tenebte. Eda, nimalyi kwarakdeiboka ingkiringdonmote ani, dobdobte. 9Sirya dobdobte ura, er ka nerabwe ab er ai dam nerabwe ab naboka ato ebte, ‘Ni ka yabwe, ni keil uang wanikmonwe dinyi ara tubto sirya dobdobman ati, ni kanya kilkil kubmanir,’ eboka nukarebte ura, er ka yabwe ababyi kanya kilkil kubte. 10Niryi sunsi ebkwinsin, a neiktoto kuboka ninyi tentok aryi er malyi kuranci dinyi takloboka Er Imtamnyi Uram eanci to kununanyi kibci ura, Er Imtamnyi ab Er Uram eryuryangan nang ababyi kanya kilkil kurande,” ebmou.
Er Yesus biryi kele mi waningna deyok ati kebdeiboka eterebmou uram
15:11-32
11Er Yesus biryi eterenmouci, neik deyok ati ton ato kemdeirina winiryi dinyi kebdeiboka eterebmou. “Bona bonanyi tentok aryi mabwe bitinyi deibdante. 12Ura, uki tentok tum aryi kelenyi biryi er nai bisi ato ebte, ‘Nai, kan talerum bona, “Aminda ara er dinyi kibkwande,” teneraniminyi bona talena ara ukuca karebnurum!’ eboka molobdobte. Ba, sun nai biryi er talerante bona talena sun bitinyi mabwe ati bokdeibte.
13Ura, kelenyi bira uki bitinyi kum winiryi kum ara erti karebmote bona ara dengdonmote ani, co bok akwe kibdobte ura, ‘Bobde binkwan,’ tenen dinyi akwe dekdobte ura, ninyi atei asi yuk mutuk tingdorbite. Yuk mutuk bindoka kurante ai ara, ‘Aminda ara ato kubde binkwan,’ tenen kanya teneirdena kum kurante. Eda, er bobdante bona talena nirya ara malyi kun dinyi ati kuboka waningsinirante. 14Ani, er bobdante bona talena nirya kum dandeibokte bok, er bindoka kurante mutuk dam ara kwaning atana li dobte ba, a mi ara kwaning ab ukutotoa nirya kum danabmurubte. 15Ura, er bindoka kurante atei asi ninyi tentoknyi bisi wa irmilirbite. Ba, anyi biryi, ‘Ni bisam kalingkwanirim,’ eboka wa in dam bokdonokte. #15:15 Sun Yahudi yala nang ara bisam kalingna wa ara iya malyi wa teneramnyi wa asi karebmou. 16Ba, a bindoka kalingnante talak ara kwaning atarante ura, ‘Bisam yina karebmating yina asi ton yibtinyi se,’ tenerante. Bok, ninyi tentok ababyi ersi yina ton kum kareranting.
17Ato kuranturyi, er kanya dam aryi ato tenebte, ‘Nai kobe ato kubse to ara malyito kubse. Ni nai ai dam wa inung nang ara yina bulung ton kum bunung asi nira kwaning atan asa kunun uca, ni talya dibkwan. 18Ati, anabdobniryi, ni nai bisi bindobnyi ura, ato ebkwan, “Nai niryi Imtamnyi urasintam ab nai kan urasintam asi manmalibdongobsise. 19Ati, nai kanci ni mi enina ara malyito ati, kanci nira wa irmilinanyi ebkwanurum,” ebkwan,’ tenebte. 20Ura, anabdobturyi, er nai bisi tubto tamuboka bindobte.
Banmote ani, atei damtoto baute ura, er nai biryi dinmote uca, er mi kelenyi yuk mutuk do yanganmote asi asing eibte. Ura, er mi boukwe aryi kanya sangkuruk-sangkuruk ebte ba, er mi yanganmote dam cungbindoka iribdobturyi, u kunkunubdobte. 21Uca, a mi aryi ato ebte, ‘Nai niryi kan urasintam ab Er Imtamnyi urasintam ab asi manmalibdongobsise ati, nai kanci nisi ni mi enina ara malyito ati, kanci nira wa irmilikinanyi ebnurum,’ ebte.
22Ato ebte bok, a mi er nai biryi er wa irmilin nang asi ato ebte, ‘ “Ni mi nong,” tenebkwan ati, minola cungbindoka ongon aling teleb asi ongordeiryandarur. Ba, “Erda akai kurur dinyi kalingna mi,” tenebkwan ati taruk du dongona ababyi dongordeiryandarur. Ba, tonda “Erda ni wa irmilinanyi kuma,” tenebkwan ati, yan karuk ababyi ongordeiryandarur. 23-24Sirya ongobdeibmunyi ura, bisam sapi ukuryok kabunyi nebmarci, tub kablobmar bisam asi oboka yubdarur! Ni mi ara dibninto kubwe ani, tubto kam bukokninto kubmar. Tonda, waningnaming mi ato kubse asi yanmar ba, eibdanmanim deyok aryi, a uki tum ara teleb uki tum kubmar ati, kanya karyi asa aryi tonkwa yibkwayeb,’ ebte. Ura, sun nirya kanya kilkil aryi sun nai ebmote to kunuboka kwalibmatingiryi, mot sebting.
25Bok, er mi dunyi bira wa in dam kunmote ani, yanganmote ani, ai dam yandoka kekerante uca, ai umbura ara bu eboka mot lilim ilinto enmating asi kekebte. 26Ura, wa irmilinanyi tentok asi naboka asibdete, ‘Akai umbura dam ara una kunmarumci, ato enmarum do?’ eboka asibdete. 27Uca, a wa irmilinanyi biryi ato ebte, ‘Kan weit wanikdau ani, arub aryi sirya yanmar. Ba, kan nai ab teleb kuboka ebdanmaringci, kan nai biryi ukuryok kabunyi nebmarci, tub kablobmar bisam sapi asi oboka yubmarci, kunmab,’ ebte.
28Ato ebte ura, a mi dunyi bira er yu aryi akai wengbana kum kubte. Ba, er nai biryi sakweteboka nenem yaute. 29Bok, a mi aryi er nai bisi ato ebte, ‘Nai bita kanya teneibderum! Nira kwalina o kwali-o kwali banunga nirya ara kan wa akwe ikunun. Ara, kan uram ebdeibmaminyi to ara niryi mitik ton kum lebesengnun bok, kanci bisam kambing mi ababyi ton kum karenurum. Ba, ni kwit yabwe ab kanya kilkil aryi a bisam kambing oboka kwalibmabibiryi, tonkwa ton kum yinub. 30Bok, kan mi ara kan bona boboka talyi yortamni nerabwe bobkirikoka kan bona nirya kum danardeirbiu ani, arub aryi yaranyi bitikwe ilila bisam sapi oboka yubmarim,’ ebte.
31Uca, er nai biryi er mi dunyi bisi ato ebte, ‘Ni mi, kanda ni ab tonkwa iya tuba kununumci, ni bonun bona ab talenun dinyi ab nirya ara kan dinyi kibkou. 32Ati, kan weit ara dibninto kubwe ani, kam bukokninto kubmar. Tonda waningnaming mi ato kubse asi yanmar ba, eibdanmanim ati, ni ab kan ab tonkwa antanibdobnimiryi kanya kilkil kuboka mot semkwanim,’ ebte.” Ato eboka Yesus biryi kebdeiboka eterebmou.
Selectat acum:
Lukas Uram 15: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
