Lukas Uram 16
16
Er Yesus biryi co bok inina dongnanyi kebdeiboka eterebmou uram
16:1-9
1Er Yesus biryi yuk kemdeirina aryi Er miliramnyi nang asi ato eboka eterebmou. “Bona bonanyi tentok kuranturyi er co bok talenanyi tentok wiante. Bok, bona bonanyi biryi kekenmote uca, yuk nang aryi yandoka ato ebting, ‘Kan co bok ara co bok talenanyi wibumnyi biryi ton wanikwe,’ ebting. 2Ato ebting asi kekebte ura, er co bok talenanyi bisi naboka ato ebte, ‘Kanda ni co bok ara waningdum ba, yuk nang aryi ni dam yandoka ebmang asi sirya kekebmakin. Ati, ukuryok akiryi kanda ni co bok talen wa kum inkwandim deyok aryi, kan wa irum to asi, “Nira, co bok ara ato-ato kubse,” eboka lak ebdum!’ ebte.
3Ura, co bok talenanyi kanyatam aryi ato teneibte, ‘Ni nai biryi ni wa co bok talenanyi kunun ara sirya dobkwetebkwamanir. Ati, ni tukwe talena ara ni mitang deyok aryi, ni wa ibdobman kum kunurur. Ba, niryi ninyi yuk nang asi bona molorkiringna ara ni alyi kunurur ati, aminda kubdobkwan tam asi una kubdobtinyi uca, teleb kubdobtinyi do?’ tenebte. 4Ato tenebte ura, bita kanya teneinmote ani, ato kubkwan tenebte, ‘ “Wa kum inkwandim!” ebnici ura, ni nai bona boblobyi nang asi ninyi bun dakoka abniryi sun kanya teleb kibdeibnyi ura, sun ab tonkwa kubdobkwayeb,’ tenebte. 5Ura, Er nai bona bobloanting nang asi yuk-yuk nabte ura, yuma nabmatunyi bisi ato ebte, ‘Kanda ni nai bona ara unabaryi dekmanto asi boblobumwe do?’ eboka asibdete. 6Uca anyi biryi, ‘Nira minyak zaitun kwen moyok asi weik moyok seratus baryi boblobse,’ ebte. Ura, co bok talenanyi biryi, ‘Er kanya teleb kibdeibkwan,’ teneboka outamtoto molobturyi ato ebte, ‘Kan bona boblobumwe dinyi ati kerek sengna umbura dam ara keil moyok seratus baryi boblobumwe dinyi ara kilibkaboka, keil moyok lima puluh baryi tuba boblobse eboka sekdongobdum!’ ebte.
7Ura, yuknyi bisi ato eboka asibdete, ‘Kanda ni nai bona ara unabaryi dekmanto asi boblobumwe do?’ eboka asibdete. Uca, anyi biryi, ‘Nira, gandum du kin aling asi weik aling seratus baryi boblobse,’ ebte. Ura, co bok talenanyi biryi, ‘Er kanya teleb kibdeibkwan,’ teneboka outamtoto molobturyi, ato ebte, ‘Kan bona boblobumwe dinyi ati kerek sengna umbura dam ara gandum du kin aling seratus baryi boblobumwe dinyi kilibkaboka, aling delapan puluh baryi tuba boblobse eboka sekdongobdum!’ ebte ba, sunci, ‘Anyi bira ninyi teleb,’ ebdobting.
8Ura, er nai biryi co bok talenanyi kubmote dinyi bikte ura, er bona asi ton wanikante deyok ati kum kisal dakwamote. Bok, erda co bok talenanyi biryi, ‘Aminda tam ara una kubnyi uca, teleb kubdobkwan do?’ tenen aryi yuk nang asi dam-dam kiboka teleb kimnante deyok aryi, er nai biryi a co bok inina dongnanyi bisi kisal dakwamote,” ebmou. Ura, Er Yesus biryi Er miliramnyi nang asi ato ebmou. “A kebdeiboka eterebmasin dinyi ara ato ati ebmasin. Sun tukwetam kuraming nang ara neik kanya boraming nang ati sun mamun dibnilibdandoka aminda kubkwamingnyi tam dinyi ati kiknirminingdonung. Bok, sun berengna dam kurandum nang ara Er Imtamnyi Uram neik uram kekerandum nang sun mamun asi ton dibnilibdandoka aminda tam kubkwandum dinyi ati diboka ton kum kiknirminingdondarur! 9Ati, Niryi sunsi ebkwinsin, sunci tukwetam kuboka bona bon dinyi kareboka sun kwit yabwe mambul kanya bobmangnyi nang asi milibdandarur. Ato kuramunyi ba, bona bon dinyi ara sun taruk tuba kum kubsici ura, sunda teleb kuboka aminda imtam ai wengbindoka iya kubdobkwandum,” eboka kebdei eterebmou.
Mitik bona asi kanya deiboka kalingna uram ab yan memen uram ab
16:10-18
10Er Yesus biryi ninyi eterenmouci, ton ato eboka eterebmou, “Unanyi biryi mitik bona ababyi tanglona kum uca busul kuboka kalingdanci ura, weik bona ababyi tanglona kum uca busul kuboka kalikwandur. Ba, unanyi biryi mitik dinyi ababyi diboka kum kuranci ura, weik dinyi ababyi diboka kum kubkwandur. 11Ati, sunci co bok deyok ababyi kanya deiboka kum kalingdamunyi ura, Er Imtamnyi biryi sunsi, ‘Kam kun dinyi ababyi kanya deiboka kum kalikdobkwaming ca,’ tenen kum karebkwansurur. 12Tonda, Er Imtamnyi biryi tukwetam bona kareansici dinyi asi kanya deiboka kalingna kum kuramunci tangloramunyi ura, Er Imtamnyi biryi, ‘Sun dinyi iya kam kubkwande dinyi ababyi, kanya deiboka kalingdona kum uca taklobkwaning ca,’ tenen kum karebkwansurur.
13Ninyi tentok aryi weik nang bitinyi wa asi ton kum inung. Ato kuboka irante ura, tonyi bira malyi kimdante ba, tonyi bira boukwe kimdante. Kum, ato kurante tonyi wa asi tanglona kum uca kanya deiboka irante ura, tonyi wa ara tanglorante. Ati, sunci Er Imtamnyi wa asi kanya deiboka ibkwandarur kum, co bok doron wa asi kanya deiboka ibkwandarur kum. Ninyi tentok aryi wa bitinyi-bitinyi ara kanya deiboka ibman kum ati ebmasin,” ebmou. 14Er Yesus biryi ato ebmou ba, sun Farisi nang co bok kanya deiriramnyi nang nirya kekebmai. Ura, sun kanyatam aryi, “Ara, malyito ebmar,” tenebmaici, akwi tubmai. 15Ba, Erci sunsi ato eboka erekdobmou, “Er Imtamnyi bira sun kanya dam teneibmarum dinyi ara bikmasir bok, ninyi urasintam ati, ‘Nunda iya telebto akwe kunub nang aca,’ tenen wingdanmarum. Ati, ninyi aryi teleb teneraming dinyi ara Er Imtamnyi bira iya malyito tenerande.
16Er Musa kerek sengna sekdeiamwe to ab, Er Imtamnyi Uram ebdeibmaci to lak etereramnyi nang kerek sengna sekdeiamnyi to ab kunubde yangarandau tok ani, Yohanes ninyi me dongonanyi kuramwe talak sirya kunurandau. Ba, Yohanes kuramwe talak aryi ara Er Imtamnyi Weik Sienyi kibdiryi, leboka kalikwansir eboka eterena deyok koun talak kubmar. Ati, sun ninyi yuk-yuk aryi tatabkaboka, ‘Nibabyi Er Imtamnyi ab kunanyi kibdeibnute,’ tenen ingkirikdobkwandarur. 17Ati, im ab tukwe ab kum dankwande ara malyi bok, Musa kerek sengna uram umbura dam kurur kerek sengna ara iya mitika tentok ababyi dakbisibman kum dinyi kurur.
18Ara, kiklin dinyi ara ato dinyi ababyi kum danana kum kubkwande. Ninyi tentok aryi er doanci ner takloboka, yuk ner dobdobci ura, ukula a kunum yobde kurandiryi. Ba, unanyi biryi yuknyi biryi takloanci ner asi dobdobci ura, ukula a kunum yobde kurandiryi,” ebmou.
Bona bonanyi ab utotoa kumnyi si Lazarus ab uram
16:19-31
19Er Yesus biryi eterenmouci, ton ato eboka eterebmou, “Bona bonanyi tentok kuramuryi er alib ongon aling ara kuruta bol aling asi dengna weik aling akwe ongoramwe. Ba, er nunungna ongon aling ababyi, dengna weik aling akwe ongoramuryi kanya kilkil asa aryi dubnyi nong-nong kibdandoka tuba-tuba kwaliberekde yiramwe. 20Ato kuramwe talak ara utotoa kum aryi moloryiramunyi bisi er nong bol ara susa aryi inten irande to kuramunyi si Lazarus ton kuramwe. Ba, anyi bira yuk nang aryi boboka a bona boramunyi ai bublan sangkwetena lika dam deiryangaramnyi ba, marongnamwe. 21Ba, kwaning atanmaci ura, ato teneramwe, ‘Bona bonanyi biryi kwaning co lamna deici deibdongoboka yinmaci uca, sungsunga sakmaci asi baitam kibkwetebingnyi asi kum, kam ati kareryangnyi asi kum buboka doyiboktinyi,’ teneramwe. Ato tenen kalikoka buramwe bok, kam aryi er nong bol susa mulakoka korokde yiryangaramnyi ba, u mitik kum yiramwe.
22Ato kuramwe ani, uki tentok tum ara utotoa kumnyi bira dibmou. Ura, Er Imtamnyi Uram eryuryangan nang aryi boboka Abraham dam kamdeirirbinmai. Ura, uki kum kunmai cok a bona bonanyi bibabyi dibmou ba, tukwe ukoka dongorbinmai. 23Ura, a bona boramunyi bira uk dam bakan bindoka mambul donmouci, yana mutuk aryi dirwelenmou uca, Lazarus bira Abraham dam bukmou asi asing eibmou. 24Ura, ato ebmou, ‘Nai Abraham, ni boukwe kibdobnurum se, ni uk buk ilinto angmara kankan kunman uca, u yinmanir. Ati, kanci Lazarus bisi ebminyi ba, er taruk du aryi me toubdongoboka, ni silalum asi lingdongoryanurur!’ ebmou.
25Ato ebmou bok, Abraham biryi anyi bisi, ‘Se a mi, kan kanya bita teneibderum! Kanda, kam kuramoumwe talak ara telebto kubde kuramoumwe ati, ukuryok ara u mitik kum kunkwankir. Bok, Lazarus bira kam kuramwe talak ara malyi kubde kuroramwe deyok aryi, ukuryok ara erda kanya kilkil kun dinyi dobdobmar. 26Tonda a kum ababyi, kan kunmarim ai ab nun bukmanim ai ab noutam ara sangkurukman kum kot aryi seksou. Ati, nun bukmanim tam nang aryi kan kunmarim tam yanman kum. Ba, kan kunmarim tam nang ababyi atam yanman kum kot seksou,’ ebmou.
27Ura, anyi biryi ato ebmou, ‘Nai, ato ebmarim ura, niryi kansi molobkwinkin, Lazarus bisi ni nai ai dam bokdonokdum. 28Ba, bindoka ni weit yabwe amubaryi kam tuba kunmang nang asi erbirur. Ba, aminda sunda ni wengyanman ai kum wengyankwaming ati,’ ebmou. 29Uca, Abraham biryi, ‘Kum, sun dam ara Musa kerek sengna ab, Er Imtamnyi Uram ebdeibmaci to lak etereramnyi nang kerek sengna ab sirya kubwe. Ati, a kerek sekdeiamnyi to asi diboka kekeboka kunubdobkwanung,’ ebmou. 30Uca, anyi biryi, ‘Kum Nai Abraham, a dem ara kikiman kum ati, diandinyi bisi tubto kam bukoka sun dam bici ura, sun malyi tenen dinyi takloboka Er Imtamnyi bisi kanya teleb kurdeirin dinyi akwe kunubkwaming,’ ebmou. 31Bok, Abraham biryi anyi bisi ato ebmou, ‘Musa kerek sengna ab, Er Imtamnyi Uram ebdeibmaci to lak etereramnyi nang kerek sengna ab umbura dam kerek sekdob dinyi asi diboka kekeboka kum kunuramingnyi ura, diamingnyi nang kam bukoka sun dam bingnyi ababyi diboka diba kum tenebkwaming,’” Ato eboka Yesus biryi eterebmou.
Selectat acum:
Lukas Uram 16: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
