Lukas Uram 14
14
Er Yesus biryi wa in kum uki si Sabat tum yuk tum aryi u yiramunyi bisi kwetebmou uram
14:1-6
1Uki si Sabat tum yuk tum aryi, Er Yesus biryi Musa kerek sengna dirniliramnyi nang sienyi Farisinyi tentok ab yina tonkwa yibkwamai ati anyi ai binmou. Ba, akai wekmai ninyi nirya aryi, “Er Yesus bira wa in uki tum si Sabat tum bok, Musa kerek sengna umbura dam aryi mem ebsou ba, nun minob kunubde yanganub dinyi asi ton dakbisibkwamar do?” tenen diblilibmai. 2Asi, Er Yesus biryi diramwe uca, mundu deiboka er nong nirya bubungnamunyi tentok bukmou asi asing eibmou. 3Ura, Er Yesus biryi Musa kerek sengna etereramnyi nang ab Musa kerek sengna dirnilin nang ara Farisi nang ab asi ato eboka asibdenmou. “Musa kerek sengna umbura dam ara wa in uki tum si Sabat tum aryi u yin nang ara ur kwetebkwandarur ebsou do mem ebsou do?” eboka asibdenmou. 4Uca, Er Yesus biryi sunsi asibdenmou uram ara Musa kerek sekamwe to kum kuramnyi erda suncok-suncok tabakdongoboka eramnyi ati asibdenmou. Ba, sun alyi mitik kum kubmou deyok aryi, uram ton doboka ebman kum kubmou ba, dingdang ebokmai. Ura, Erci anyi taruk talebdongoboka kwetebmouci, ato ebmou, “Kan ai bindobdum!” ebmou. 5Anyi bisi sirya ebmou ura, Musa kerek sengna etereramnyi nang ab Farisi nang ab asi ato ebmou. “Unanyi biryi wa in uki tum si Sabat tum bok, er mi kum, er bisam si sapi kum, asi tukwe ungdona bisik wekmote. Ura, ‘A uki tum ara taruk louboka bun tum ati takmanyi ani, ambutum yuk uki tum berekci uca, dobkwan,’ ton tenebte do? Ato kum kubte, erda er boukwe aryi ola dobkwamote,” ebmou. 6Bok, sunci etereramnyi uram ara, “Ur kunubdarur!” eamwe uram asi kum kunuramnyi ba, Er Yesus biryi deyok bita liliboka ebmou. Ba, sunci uram tamuboka dekeibman kum kubmou.
Er Yesus biryi, “Yuk nang aryi nunsi erebdeibsiting,” tenen erebdob sokon bun deyok ab yuk nang ara malyi kiboka luknurdein deyok ab ati liliboka eterebmou uram
14:7-11
7Er Yesus biryi dinmou uca, Farisinyi tentok aryi yina kwalibmouci, ninyi ilinto nabmou. Ba, a kwalina yiryanmai nang ara erebdob bun sokon akwe wiboka bunmai asi asing eibmou. Ura, Erci kebdeiboka sunsi ato ebmou. 8-9“Sunsi ninyi tentok aryi yina kwaliboka nabmasici ura, ‘Erebdob bun sokon asi burbinkwan,’ tenena mem. Erebdob sokon ara nabmasirinyi biryi sunsi lobdeibkwansurur. Sunsi nabmasirinyi biryi yuknyi erebdob sokon bukmantonyi nabmaci ba, anyi wengyaci ura, sun nabmasirinyi biryi, ‘A sokon ara anyi bukwande ati louboka tukwetam buryurbirum,’ ebsici ba, sun alyi kubsiribok, tukwetam buryurbimunyei. Ati, sunbiramnyi erebdob sokon wimboka burwelebana mem! 10Ato kubsicei ati, ninyi tentok aryi yina kwalibdeiboka nabmasici ura, bindoka tukwetam burbinkwandarur! Ba, a nabmasirinyi biryi yandoka diransici uca, tukwetam bukmamunyi eibsici ura, ato ebkwansurur, ‘Ni kwit, kanda eitam erebdob bun sokon burwelebirum!’ ebkwansurur. Ato kubdeibsici ba, sun ab tonkwa buluboka kwalibmaci yina yinmamunyi nang urasin dam aryi erebdeibkwansunung. 11Ara, ato deyok ati ebmasin, unanyi biryi dub erebdandoka wingdan kanya boranci ura, aminda ara Er Imtamnyi biryi luknubdeibkwande. Ba, unanyi biryi luknubdob kanya borandinyi bira aminda ara erebdeibkwande,” eboka eterebmou.
Er Yesus biryi, “Yina kwalibmamunci, nabkwamunyi ura, ato nang asi nabkwandarur,” eboka eterebmou uram
14:12-14
12Er Yesus biryi Ersi, “Yina kwalibman dinyi tonkwa yibkwayeb, ati ni ai yarum” eboka nabmounyi Farisinyi bisi ato ebmou. “Sunci kitingtam aryi yina kwalibmamunci kum lukunda aryi yina kwalibmamunci kum sun kwit yabwe ab sun du weit yabwe ab sun yala nang ab sun ai dam ninyi bona ilinto taleramingnyi nang akikwe namna mem! Ato kuamunyi deyok aryi, ‘Sunbabyi yina kwalibmangnyi tum ara nabkwansunung,’ tenen namdarandum. Ato kurdaranmunyi ura, aminda imtam ai dam ara dengna kum dobdobkwandum. 13Ati, sunci yina kwalibmamunyi tum ara sun ab tonkwa antaniboka kum kurandum nang asi nabkwandarur. Ara, utotoa kum nang ab, nong malyi kuanci nang ab, yan deneanci nang ab asing kuanci nang ab asi nabkwandarur. 14Ato nang ara sunda utotoa kum nang ati, sunci tamuboka kum dekeibkwansunung. Sunci ato nang asi diblilibde namdamunyi ura, utotoa kum nang aryi tamurkaresina kum kuransingnyi bok, teleb kuramingnyi nang kam bukeibkwande tum aryi Er Imtamnyi biryi sunsi dengna weik dinyi karebsici ba, dobdobkwandum. A deyok aryi, sunsi Er Imtamnyi biryi kisal dangdur nang esunung,” ebmou.
Er Yesus biryi likibna bukam deirin nang kebdeiboka eterebmou uram
14:15-24
15Er Yesus biryi ebmou uram kekebmai ura, yina kwalibmai ba, tonkwa bukoka yinmainyi tentok aryi Er Yesus bisi ato ebmou. “Aminda ara Er Imtamnyi bira ninyi leboka kalikwande Weik Sienyi ai imtam kuboka yina tonkwa yiboka kubkwandanyi ab kubkwande ner ab ara ukuryok ababyi Er Imtamnyi biryi kisal dangdur nang kunung,” ebmou. 16Ato ebmou bok, Er Yesus biryi anyi bisi ato ebmou, “Ninyi tentok aryi weik kwalina kwalibkwanturyi ninyi ilinto asi, ‘Niryi yina kwalibkwan tum ara tonkwa yibkwayeb ati, ni ai yandarur,’ eboka nabte.
17Ato eboka nabloante ba, kunmating ani, a yina kwalin uki tum kubte ura, er wa irmilin nang bisi ato ebdeibte, ‘ “Ura, yina utotoa nirya sirya kiknibminikmasin ati yandarur,” erbirum,’ eboka bokeibte. 18Ato eboka bokeibmote bok, a nabmote nang nirya sun yuk-yuk aryi ato ebting, ‘Ni kwit, ni kum yankwaman ati, kansi molobmakin,’ ebting. Yumanyi biryi nabmatunyi bisi ato ebte, ‘Niryi kansi molobmakin ni wa ukuryok dekdobmanci dirbinkwaman ati ni kum yankwan,’ ebte. 19Ba, ton yuknyi biryi ato ebte, ‘Ni bisam sapi takubaryi ukuryok dekdobmanci a bisam sapi aryi wa ara, “Una kuboka ibkwan do?” tenen ukurderbinkwaman ati, niryi kansi molobmakin ni kum yankwaman,’ ebte. #14:19 Sun Yahudi yala nang minob wa in bisam sapi ara bitinyi-bitinyi lelebdeiboka co noutam kolongdeiriramnyi aryi a bisam sapi bitinyi aryi co linman ura, tukwe kurungnamwe. 20Ba, ton yuknyi biryi ato ebte, ‘Ni ner ukuryok dobdobman ati ni kum yankwaman,’ ebte. Ato enmating ani, erci nabmote nang nirya ‘Ni kwit, ni kum yankwaman ati, kansi molobmakin,’ ebting.
21Ato ebting ura, nabmatunyi wa irmilinanyi tamubindoka er nai bisi a nang ebmating to ebte. Ura, yina kwalina deyoknyi bira yu kubte ura, er wa irmilinanyi bisi ato ebte, ‘Olong anabdobminyi ura, akatei dam weik bisik nirya yibinkirikoka akatei kunung nang nirya iniboka boyarum! Ara, utotoa kum nang ab, nong malyi kun nang ab, asing kun nang ab, yan denerur nang ab asi iniboyarum!’ eboka bokdonokte. 22Ura, a wa irmilinanyi biryi binmote ani, tubto yandoka er nai bisi ato ebte, ‘Nai kan ebmarim to kunubman aryi ninyi sirya naboka dongoryanman bok, ai nirya kum libmar,’ ebte 23Ura, yina kwalina deyoknyi biryi er wa irmilirantunyi bisi tubto ebte, ‘Anabdobminyi ura, ninyi yibaramingnyi bisik nirya yibinkirikoka lumun ai doboka kunung nang ababyi nirya tatab-tatab eboka iniboka boyarum ba, ni ai ara nirya libde bok, ni kwalibman yina yibkwamab,’ ebte. 24Ato deyok aryi, Niryi sunsi diboka ebkwinsin. Kwalina deyoknyi biryi nabmou bok, ‘Nun kum yankwayeb ati molobmakib,’ ebmai nang ara yina kwalibmou dinyi tonkwa kum yibmai. Ato kuboka Niryi minob, ‘Ni dam yandarur!’ eboka naanse bok, ‘Nun kum yankwayeb,’ tenenung nang ara aminda weik kwalina kwalibkwan ara Ni ab tonkwa kum yibkwayeb,” ebmou.
Er Yesus biryi, “Nisi milibkwanumunyi ura, utotoa ara nirya taklobmuncok, Ni milibkwanindarur,” ebmou uram
14:25-35
25Uki tentok tum ara bisik ai aryi ninyi ilinto Er Yesus bisi miliryanmai. Ura, Er Yesus biryi dongtam danguboka ato ebmou. 26“Unanyi-unaner aryi, ‘Er Yesus bisi milibkwan,’ teneboka Ni dam yanmariryok, er nai er kwin ab er mabwe ab er du weit yabwe ab er malnerabwe ab erdamnyi ab asi malyi kimdana kum kubdinyi bira Ni milinanyi kum kibkwandur. 27Tonda, unanyi-unaner aryi, ‘Er Yesus bisi milibkwan,’ ebmarinyi bira ato tenebkwandur. Ara, ato, ‘Tanglona kum uca, ni co lase bobkwan ara Er Yesus deyok aryi, ikin dinyi takubdeibningnyi ababyi, tonda yuk nang aryi nisi obningnyi ababyi, niryi kilkil asa aryi ni Du Yesus milibkwan,’ tenebkwandur!” ebmou.
28Ato ebmou cok, Erci neik eterenmou deyok akikwe kiklina bitinyi ton doboka kiklibmou. Yuma kiklina ara ato ebmou, “Sun kankan dam ninyi tentok aryi dukoka don ai dobkwanci ura, ‘Ai don nang dekwan co bok ab ai don keica dekwan co bok ara kikiman buluboka deibse do kum do?’ tenen bukoka nukoka lilindarur do? Yo, ninyi ara ton talyi bukman-bukman ani, ‘Ai dobkwan,’ ton kum tenenung. Eda, sunci ai dona dengna ara, ‘Ukuboka dekde binanyi ani, ukuboka deknyi uca, akai sirya dobkwan,’ tenen lilibdeibmuncok akai dorkalirandum. 29Ba, akai dobkalibmaniryok, sirya dona kum uca taklobnyi ura, ninyi aryi asing eibningiryi ngilikoka ato ebningnyei. 30‘ “Anyi bira ai dorkalina ati dobkalibwe bok, sirya dona ara kum bikwe darib,” ebningyei,’ tenen co bok bukoka nukoka lilibdeibingnyi ura, ai dorkalinung,” ebmou.
31Ato ebmou cok, kiklina bitinyi dinyi ara ato ebmou, “Dantam mutuk weik sienyi biryi, ‘Yuk mutuk weik atei sienyi ab mar bobdanimnyi ura, ni ab tonkwa mar ibinkwayeb nang ara yubwa-yubwa takubaryok. Ba, yuk atei weik sienyi ab tonkwa mar iyankwansing nang ara yubwa-yubwa dinatam inbaryi ara kikiman obdankwayeb do kum do?’ tenen ton kanya teneibde bunung. 32Eda, ‘Nai e mar bobdandoka ordana ni ilil, ni tam nang nirya obkiribningnyei,’ tenebci ura, yuk mutuk weik sienyi tam nang bisik noutam tuba iyanganmangnyi talak aryi ninyi tentok bokeiboka uram ato erdeiraming. ‘Mar te murubkwanimnyi ura, una kuboka te murubkwanunum do?’ eboka bongdonongnaming. 33Ato kuboka ninyi nirya ara sun kankan aryi, ‘Utotoa nirya takloboka Er Yesus milibkwan,’ kum tenebdinyi bira Ni milinanyi kum kibkwandur.
34-35Ati, sunda uwa to teleb erande ato nang kundarur. Bok, uwa ara to kum dananci ura, tubto tamuboka to kibdeibman kum kurur. Erda baitam deirirlorbaraming. A neiktoto kuboka sunbabyi Ni milin nang kiamun cok takloboka bindamunyi ani, tubto Nisi milibkwan tenen tamuryanman kum. Ati, unanyi biryi ninyi uram keken dinyi amol kuanci ura, a ebman uram asi diboka kekeboka bikdobkwandur!” ebmou.
Selectat acum:
Lukas Uram 14: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
