Yohanes Uram 9
9
Er Yesus biryi asing kuamunyi bisi kwetebmou uram
9:1-12
1Ura, Er Yesus bisik yibanmouci, asing dinmou uca, ninyi tentok ara asing kuamunyi bisi eibmou. Anyi bira er kwin biryi deinmou talak uca, asing kuamwe tok asi iya kuramunyi. 2Asi, Yesus Er miliramnyi nang ababyi anyi eibmaici, sunci Yesus bisi ato eboka asibdenmai. “Nai, ninyi Eterenanyi, Anyi biryi er malyi kun dinyi kuamwe uca, asing kubmurubwe do? Ato kum ura, er nai er kwin aryi malyi kurandei dinyi aryi sun mi asing kubminikamwe mi deibmarei do?” eboka asibdenmai.
3Ato eboka asibdenmai uca, Er Yesus biryi ato ebmou. “Anyi bira er kwin mundu umbura aryi asing kuamwe bok, deibmarei. Ara, er malyi kun dinyi deyok aryi, ato kuboka kum deibmarei. Tonda, er nai er kwin aryi malyi kun deyok aryi ato kuamwe bok, kum deibmarei. Eda, ‘Er Imtamnyi biryi ilil tenen dinyi kiknibmar,’ en dinyi lak kibkwamwe ati, anyi bira asing kuamunyi bisi deibmarei. 4Kitingtam tuba kurande ba, nunci tanglona kum uca wa ibmurubde binkwayeb. Ara, Ni Nai bokwetebnounyi biryi takubdeibnou wa ibmurubde binkwayeb. Lukunda dam kubmar ati ato ebman. Lukunda talak kubde ba, ninyi tentok ababyi wa ina kum kunubte. 5Nira tukwetam tuba kuran cok, sun tukwetam nang ati berengdeirisinanyi kunun,” ebmou.
6Ato ebmou ura, Er Yesus biryi, “Asing kuamunyi bisi kwetebdeibkwan,” tenen si maka tukwetam tulubdeibmou. Tulubdeibmou si maka ara tukwe ab talbalibmou ura, Erci a talbalibmou dinyi dobtaleboka asing kuamunyi asing tam deibdongobmou. 7Sirya deibdongobmou ura, Erci asing kuamunyi bisi ato ebmou. “Kanci anaboka me kwan si Siloam biminyi ura, kandamnyi me ilikdarum. A me kwan si, ‘Siloam,’ ara nun uram umbura danguboka, ‘Bokdonokmou,’ enub,” ebmou. Ura, Yesus biryi anyi bisi ato eboka bokdonokmou uca, erci anaboka erdamnyi me ilikdanmou. Me ilikdanmou uca, asing eibkatabmou.
8Ura, asing kuamunyi ai dam kuramnyi nang ab ersi yuma eiriramnyi nang yuk nang ababyi ato eboka asibdanmai. “Nai e, anyi bira asing kuamunyi kurur do? Bisik dam bukoka, ‘Co bok karebsindarur,’ eboka moloramunyi kurur do?” 9Ton nang ara, “Diba, asing kuamunyi asing eibkatabmar,” ebmai. Ba, yuk nang ara, “Ato kuma. Anyi bira yuknyi, er urasin ara asing kuamunyi urasin atonyi kurur.” Ba, asing eibkatabmunyi biryi, “Yo diba, nira asing kubnou ba, kununyi bisi asing eibkatabman,” ebdanmou. 10Ura, sunci ersi ato eboka asibdenmai. “Una kuboka kan asing eibkatabmarim do?” eboka asibmai. 11Asibdenmai ba, erci sunsi ato ebmou, “Ninyi si Yesus bira tulubdeiboka si maka mintal ab talbalibmou ura, ni asing tam deibmanou. Sirya deibmanou ura, Erci Nisi ato eboka arukdeibmanou. ‘Kanci anaboka Siloam me kwan biminyi ura, kandamnyi me ilikdarum.’ Ati, niryi anaboka ni damnyi me ilikdanman uca, asing eibkatabman,” ebmou. 12Ura, sunci ato eboka asibdenmai, “ ‘Kandamnyi me ilikdarum,’ ebmakiranyi bira dantam binmar do?” Asibdenmai bok, erci, “Ni kum bikman,” ebmou.
Sun Farisi nang aryi, “Asing kuamunyi bisi kwetebmaranyi bira unanyi do?” tenen deyok diblilibmai uram
9:13-41
13Ura, sun bulubmai nang aryi asing eibkatabmunyi bisi boboka sun Farisi nang dam bobinmai. 14Ura, Er Yesus biryi si maka aryi mintal kibdeiboka asing kuamunyi bisi kwetebmou tum ara sun Yahudi yala nang wa in kum uki si Sabat tum kubmou bok, kwetebmou. 15A deyok aryi, sun Farisi nang aryi, “Wa in kum uki tum ninyi kwetebmar ati, Musa Uram yan yanibmar,” tenebmai. Tenebmai cok, sunci asing eibkatabmaranyi bisi, “Una kuboka asing eibkateibmakir do?” eboka asibdenmai. Asibdenmai ba, erci sunsi ato ebmou. “Anyi biryi mintal doboka ni asing tam deibmanou. Sirya deibmanou ura, niryi anaboka ni damnyi me ilikdanman uca, ni asing eibkatabman,” ebmou.
16Ato ebmou uca, sun Farisi nang kankan aryi ton nang ara ato ebmai. “Anyi bisi asing eibkateibmaranyi bira Er Imtamnyi biryi bokdonokmounyi kum kurur. Wa in kum uki tum kubmar bok, anyi bisi kwetebmar deyok aryi, Musa Uram yan yanibmar. Ati, a asing kubunyi kwetebmaranyi bira Er Imtamnyi biryi bokdonokmounyi kum kurur,” ebmai. Ato ebmai bok, yuk nang aryi ato ebmai. “Malyi kun nang ara ato kuboka ilil tenen dinyi kiknibting do? Ato ukubman kum,” ebdanmai. Ura, sun a bulubmai nang sun mamun asi lulubdanmaici, bokdanmai.
17Bokdanmaici, sun bulubmai nang aryi asing eibkatabmaranyi dam bindoka ato eboka asibdenmai. “Kanci Anyi biti una ebkwandim do? Anyi biryi kan asing asi eibkateibmakir ati, kanci Anyi biti una ebkwansirim do?” eboka asibdenmai. Uca, asing eibkatabmaranyi biryi ato ebmou. “Anyi bira Er Imtamnyi Uram ebdeibmaca bobananyi kurur ati ni tenebman,” ebmou.
18Ato ebmou bok, sun Yahudi yala nang aryi, “Anyi bira, ‘Asing kuanounyi kunun,’ ebdanmar bok, tola ati ebdanmar,” tenebmai. Tenebmai cok, sunci, “Asing kuamunyi er nai er kwin ab asi iniboka boyandarur,” ebmai. 19Asing kuamunyi er nai ab er kwin ab yanmarei ura, sunci a nang bitinyi asi ato eboka asibdenmai. “Anyi bira sun mi asing kuamwe bok, deibmanumnyi erurumnyi a kunum do? Er asing eibkatabmar ara una kuboka eibkatabmar do?” asibdenmai.
20Ato eboka asibdenmai bok, er nai er kwin ab aryi ato ebmarei. “Diba. Anyi bira nun mi a kunum. Nun bingnunum ara asing kuamwe bok, deibmanoumwe mi a kunum. 21Bok, er asing eibkatabmar ara una kuboka ebmar ara nun kum bikmanim. Ba, er kwetebmaranyi bibabyi nun kum bikmanim. Erbabyi sirya nebdobwe ati, sunci ersi asibdendarur. Asibdemunyi ura, erci sunsi anmalakoka lak ebkwansir,” ebmarei. 22Ura, sun Yahudi yala nang aryi ato eboka uram tubdeiamnyi, “Ninyi tentok ababyi, ‘Yesus bira Er Imtamnyi bokwetebwe lemsina weik sienyi a kunum kurur,’ ebmai ba, nunci ato eboka lak eramingnyi nang asi, ‘Musa Uram eteren ai tubto wengyamunyei,’ eboka yakdonokwayeb,” ebmai. Ati, asing eibkatabmounyi er nai er kwin ara, “Sun Yahudi yala nang aryi malyi kibsingnyei,” tenen ilil kanya borandei. 23A deyok aryi, asing eibkatabmunyi er nai er kwin ara, “Erbabyi sirya nebdobwe kurur ati, ersi anmalakoka asibdendarur,” ebmarei.
24Ura, sun Yahudi yala nang ara asing eibkatabmunyi bisi liki bitinyi ato ebmai. “Kan kwetebdeibmakiranyi bira malyi kunanyi kubmar ati kanci Er si weik ebminyei. Ati, kanci, ‘Er Imtamnyi biryi kwetebmanir,’ eboka Er Imtamnyi si weik ebdum,” ebmai.
25Ato ebmai ba, erci sunsi ato ebmou. “ ‘Nisi kwetebdeibmaniranyi bira malyi kunanyi kubmar do kum do?’ tenen ni walwal. Ba, niryi diboka bikmanto ara ato. Ni asing kuamunyi kuranse ani, ukuryok ara Erci kwetebmanir ba, asing eibkatabmanyi kunman asi bikdanman,” ebmou.
26Ato ebmou ba, sunci ersi ato eboka asibdenmai. “Anyi biryi una kuboka kwetebdeibmakir do? Una kuboka kan asing eibkateibmarim do?” eboka asibdenmai.
27Asibdenmai ba, erci sunsi ato ebmou. “Niryi sunsi ato-ato kuboka kwetebdeibmanir ati sirya nukmasin bok, sunci kum kekebmanurum. Unato ati sunci, ‘Tamuboka lak nukeibsurum,’ ebdeibmanurum do? Sunbabyi, ‘Anyi bisi milin nang kibtibyi,’ tenebmarum do?” ebmou.
28Ato ebmou ba, sunci ersi malyi uram ebmai. Ati, sunci, “Kanda Anyi bisi milinanyi kurandim bok, nunda Musa milin nang kunub. 29Er Imtamnyi biryi Musa bisi Er Uram lak ebdeibmou ati nun bingnub. Bok, Anyi bira dantam aryi yandoka kunmar ati nun kum bingnub,” ebmai.
30Ato ebmai bok, asing eibkatabmunyi biryi sunsi ato ebmou. “Nai e, Anyi bira ilil tenen dinyi kikniboka ni asing eibkateibmanir bok, sunci, ‘Anyi bira dantam aryi kuboka yanganmar do?’ tenen kum bingnandum. 31Er Imtamnyi bira malyi kun nang aryi molona kum kekerur ati nun bingnub. Eda, Erci sun Erti, ‘Nun Nai,’ tenen nang Er Uram kunubde ban nang aryi molona akwe kekerur. Ati, Anyi bira malyi kunanyi kurante ura, Erci nisi kum kwetebdeibnute. 32Asing kuanou bok, deianireinyi bisi kwetebdeibmanir ara ilil tenen dinyi kurur ati ebman. Ato kuboka ilil tenen dinyi ara minob kum kekeramoubwe. 33Anyi bira Er Imtamnyi biryi Bokwetebmounyi kum kurante ura, Erci ilil tenen dinyi utotoa kum kiknibte ati ebman,” ebmou.
34Ato ebmou ura, sun Yahudi yala nang aryi Ersi ato ebmai. “Kansi deiankirei talak aryi kuboka malyi kunanyi kuramoumwe ani, ukuryok ababyi malyi kunanyi kurandim. Ati, kanci nunsi eterebsiminyei.” Ato ebmai ura, sun Yahudi yala nang aryi asing eibkatabmunyi bisi yakdonokmai. 35Ura, Yesus biryi kekenmou uca, “Sun Yahudi yala nang ara asing eibkatabmaranyi bisi yakdonokmang,” en uram asi kekebmou ura, Erci asing eibkatabmunyi bisi ingkirikde binmou. Ni, sirya eibmou ura, Erci anyi bisi, “Kanci Ni Ninyi Dasinyi bisi dib tenebmarim do?” eboka asibdenmou. 36Uca, anyi biryi Yesus bisi ato eboka asibdenmou. “Nai, Anyi bira unanyi kurur asi dib tenebkwan ati Kanci nisi lak eterebnurum,” asibdenmou. 37Ura, Yesus biryi ersi ato ebmou. “Anyi bisi sirya asing eibmanirim. Erda, kan ab tonkwa uram sisingmanimnyi bira Er Imtamnyi bokwetebnounyi a kunum ati ebman,” ebmou. 38A sirya ebmou ura, asing eibkatabmunyi biryi, “Nai Du, niryi Kansi dib tenebmakin,” ebmou ura, erci er kutam ikdongoboka Yesus bisi si weik ebmou. 39Ura, Yesus biryi ato ebmou. “Ni tukwetam yuryase ara ninyi deyok lilibkwan ati yuryase. Ara, sun asing kuranci nang asi asing kwetebdeibkwan ati, Ni yuryase. Tonda, sun asing eiriramingnyi nang asing kubdeibkwan ati, yuryase,” ebmou. 40Ura, Farisi nang kankan ton nang ara er ab tonkwa yandoka a uram kekebmaici, sunci, “Nunbabyi asing kun nang kunub darib?” asibdenmai. 41Asibdenmai ba, Yesus biryi sunsi ato ebmou. “Diba, sunda asing kun nang ato kurandum. Asing kun nang kurandum cok, sunci, ‘Nunda dib en uram asing eibkatabmab nang kunub,’ erdarandum se. Sunci, ‘Asing kusin nang kunub,’ lak erdarandate uca, tatab-tatab ebmana kum kurandate. Ba, sunci, ‘Dib en uram asing eibkatabmab,’ lak erdarandum ati sun malyi deyok tuba kubmar ati ebman,” ebmou.
Selectat acum:
Yohanes Uram 9: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
