Yohanes Uram 10
10
Yesus biryi Erdamnyi biti, “Nira domba kalingnanyi kunun,” eboka eterebmou uram
10:1-21
1“Niryi sunsi diboka ebkwinsin. Unanyi biryi domba kalingna ai wekingnyi ura, domba kalingna ai bublan bisik kum wekingnyi ura, erda domba kalingna lika asi iniboka likingnyi ura, sun ato nang ara domba kalingna nang kum kunung. Eda, a nang ara domba asi ukula don nang ato kunung. Tonda, ‘Yuk nang dinyi araboka dobdobkwayeb,’ tenen nang ato kunung. ‘Domba asi ukula dobkwan,’ tenen nang ato kunung. 2Ba, domba kalingna ai bublan bis wengnandanyi bira diboka domba kalingnanyi kurandiryi. 3Anyi bira domba kalingna ai bublan dam yaci ura, bublan kalingnanyi biryi, ‘Ur wengyarum,’ eboka bublan kukeibkwande. Ura, domba kalingnanyi biryi uram ebmaci ara, domba aryi er uram bikwaming. Domba kalingnanyi biryi er domba nirya asi diboka bingdur ati, erci sun si yuk-yuk si siboka nabmaci ura, kalingna ai dam aryi kuboka baitam bobinkwande. 4Domba kalingnanyi biryi er domba nirya asi baitam bobinmou ura, erci menekoka bobinkwande. Ura, domba aryi er uram kekebmang uca, ersi milibkwaming. 5Bok, domba ara sun kalingnanyi bikwa milibkwaming. Yuknyi bisi kum milibkwaming. Eda, sunci yuknyi bisi takloboka bindobkwaming. Yuknyi biryi en uram kum bingnung ati, sunci er uram asi kum milibkwaming,” eboka eterebmou. 6Er Yesus biryi ato eboka Er Uram keken nang asi a kiklina uram aryi eterebmou. Eterebmou bok, sun a uram kekenmai nang ara a kiklina uram deyok kum bikmai.
7Ura, Yesus biryi sun Er Uram keken nang asi ato eboka eterebmou. “Niryi sunsi diboka ebkwinsin. Nira dib kobdob domba dongoboka kalingna ai bublan atonyi kunun. 8Ni yangana kabul talak aryi ninyi ilinto minob meneki yandoka domba kalingna ai wengnamnyi nang ara ukula don nang akwe kuramnyi. Tonda, ‘Domba asi iniboka oyibkwan,’ tenen nang akwe kuramnyi. A nang aryi domba asi namdamnyi bok, domba aryi sun uram kum kekeramiryi, sunsi kum miliramnyi. 9Nira domba kalingna ai bublan atonyi kunun. Domba ara Ni biriman aryi wengyamingnyi uca, lemna dinyi dobdobkwaming. Dobdobingnyi ura, sunci aitam wengyandoka baitam anabindoka teleb maning yibde binkwaming. 10‘Domba ukula dobkwan,’ tenenanyi yaci ura, domba asi ukula oyibkwande ati yankwande. Bok, Nira domba kalingnanyi yanman ara iya kam kun dinyi karebkwan ati yanman. Ara, langdeiboka kubde binkwaming ati Ni yanman.
11Nira domba kalingnanyi teleb kunun. Domba kalingnanyi teleb ara, ‘Ni domba kalikwan,’ tenen, ‘Nira da obkwaningnyi ababyi iya kalikwan,’ tenen er domba asi diboka kalingnande. 12Ba, dengna dorona ati domba kalingmilirandinyi bira domba kalingnanyi diboka kum kurandiryi, domba damnyi kuma aryi a domba ara diboka kum kalingnande. Kalikoka kunmaci asi, bai kam aryi, ‘Domba oyibkwan,’ tenen yangaci asi, domba kalingmilinanyi biryi asing eibci ura, er ilil aryi a domba mer deibloboka bindobkwande. Ba, a domba mer ara ur talyi deiblobmaci asi, bai kam aryi yandoka a domba asi oyibkwande. Ba, a domba mer ara daluboka dantam-dantam binsekwaming. 13Anyi bira er ilil aryi cung dorbinkwamaci ara domba damnyi kuma deyok aryi, domba asi bico tenena kum uca diboka kum kalikwande.
14Nira domba kalingnanyi teleb kunun. Niryi Ni domba asi diboka bingnun ba, Ni domba ara Nisi diboka bingnunung. 15Ni Nai Imtamnyi biryi Nira Er Mi asi bingnurur to, Nibabyi Ni Nai bisi bingnun. Ba, Niryi, ‘Ni domba asi kam kubkwaming,’ tenen ati Niryi Ni damnyi karebdankwan. 16Ura, yuk domba ababyi Ni domba kunung. Ara, domba kalingna ai yuk ai kunung domba ababyi Ni domba kunung. A domba ababyi Niryi boyankwan. Boyanyi ura, a domba mer ab o domba mer ab antaniboka Ni domba mer tentok asi kibdeibkwan. Ba, domba kalingnanyi bira tentok aryi a domba mer asi kalikwande. 17A deyok aryi, Ni Nai Imtamnyi biryi Nisi boukwe weik kunurur. Ara, Niryi, ‘Lebkwan,’ tenen Ni damnyi karebdankwan deyok aryi, Erci Nisi boukwe weik kunurur. Ni damnyi karebniryok dibmanyi ani, tubto kam bukokwan ati ebman. 18Ninyi tentok ababyi Ni isin asi kum dakabokwanir. Eda, Niryi Ni damnyi karebdandoka isin dakdobkwan. Niryi Ni damnyi karebdankwan mikib bonunyi kunun. Tonda, kam tubto bukokwan mikib bonunyi kunun. Ni Nai Imtamnyi biryi Nisi ebdeibnou to, kunubkwan ati ebman,” ebmou.
19Yesus biryi ato ebmou ba, sun Yahudi yala nang aryi kekebmai ura, sun mamun lulubdanmai. Sun Yahudi yala nang kankan aryi kuboka ninyi ilinto aryi Yesus biti ato ebmai. 20“Isa aryi er kanya asi wekwe uca, luba kanya borur. Ati, sunda, unato ati Er uram tuba kekermurunkwandum do?” ebdanmai. 21Ba, yuk nang aryi ato ebmai. “Isa kanya wekanci nang ara ato uram ton kum eraming. Anyi bira asing kuamunyi bisi asing kwetebmar. Isa aryi asing kun nang asing kwetebte do? Ato ara ukubman kum,” ebdanmai.
Sun Yahudi yala nang aryi Yesus bisi dokdonokmai uram
10:22-39
22Kunmai ani, Yerusalem atei aryi kuboka kwalina weik kwalibmai. Ara, “Bait Allah ai ara minob ura bisik bublan kukmai,” tenen kanya teneiboka kwalibmai. A kwalina ara muryi talak aryi kwaliramnyi. 23Kwalina kwalibmai cok, Yesus bira Bait Allah ai dam doamnyi ai weik ai si Salomo biryi doamwe ai asi yibanmou. Akai ara abilinga imna kum uca, duma dem deibloamnyi ai asi yibanmou. 24Yibanmou bok, sun Yahudi yala nang aryi bindoka aknabdongobmaici, sunci Yesus bisi ato eboka asibdenmai. “Nun kanya ara kankana kusurur ati, unato ati Kanci Kandamnyi biti lak en uram tuba kum erdarandim do? Ati, Kanda diboka Er Imtamnyi biryi Bokwetebkounyi kurantum ura, Kanci, ‘Yo, diba,’ eboka nunsi lak ebsurum,” eboka asibdenmai.
25Ato eboka asibdenmai uca, Yesus biryi sunsi ato ebmou. “Niryi sunsi lak ebmasin bok, sunci Ni uram asi dib kum tenerandum. Niryi Ni Nai si biriman aryi teleb dinyi kununun dinyi lak kibmar ati, sunci Ni kununun deici aryi, ‘Anyi bira atonyi,’ sirya bikmarim. 26Sirya bikmarim cok, sunci Nisi diboka dib kum tenerandum. Ara, sunda Ni domba kankan aryi kum kurandum ati, dib kum tenerandum. 27Ni domba ara Ni uram sirya kekebmangnyi uca, Nisi miliraning. Niryi Ni domba asi bingnun ati ebman. 28Niryi Ni domba asi iya kam kun dinyi karebkwan. Tonda, sunda kum danana iya kum kubkwaming. Niryi Ni domba asi taruk aryi talenun ati, yuk nang aryi ukula dobdobmana kum kubkwaming. 29Ni Nai Imtamnyi biryi Nisi a domba karebnou. Tonda, Erda iya erebdob mikibnyi kurur ati, ninyi tentok ababyi Ni domba asi ukula kum dobkwamote. 30Ni ab Ni Nai Imtamnyi ab tonkwa tentok kununum ati ebman,” ebmou.
31Yesus biryi ato ebmou ati, sun Yahudi yala nang aryi Erti, “Er Imtamnyi bisi ina ngilikmar,” tenen, “Keil aryi doboka obkwayeb,” tenen keil dobmai. 32Keil dobmai bok, Er Yesus biryi sunsi ato ebmou. “Ni Nai Imtamnyi biryi teleb dinyi ilinto kiknibmou asi sunci asing eibmarum ati, unato ati sunci Niti, ‘Keil aryi doboka obkwayeb,’ teneranurum do? Niryi Er Imtamnyi wa in dinyi lak kibmasin ati, sunci Niti, ‘Obkwayeb,’ teneranurum do?” ebmou. 33Yesus biryi ato ebmou uca, sun Yahudi yala nang aryi Ersi ato ebmai. “Teleb dinyi kununa deyok aryi, kum obkwankib. Eda, Kanci Er Imtamnyi bisi ina ngilikmarim deyok aryi, obkwankib. Ati, Kanda tukwetam nang kurandim cok, ‘Ni ab Er Imtamnyi ab tentoknyi kununum,’ ebdanmarim ati, Kanci Er Imtamnyi si ina ngilikmarim ati, ‘Obkwankib,’ tenen kunmakib,” ebmai. 34Ato ebmai bok, Yesus biryi sunsi ato ebmou. “Er Imtamnyi arungna uram umbura aryi ato eboka kerek sekamwe.
‘Sun nirya ara iya erebdob nang Er Imtamnyi kurur to kun nang kurandum,’ eboka kerek sekamwe. (Mazmur 82:6)
35Ati, a eboka kerek sekamwe uram ara tukwetam nang ati, ‘Er Imtamnyi kurur to kun nang,’ ebmou ara dib en uram kurur ati ebman. Er Imtamnyi Uram ara talyi uram kuma. 36Ura, Nira Er Imtamnyi biryi Bokwetebnounyi kunun ati ato en uram ara, ‘Er Imtamnyi kurur to kururnyi,’ en uram ara kikib en uram kurur. Ati, unato ati sunci Niti, ‘Er Imtamnyi bisi ina ngilikmar,’ ebmarum do? Niryi Ni damnyi biti, ‘Nira Er Imtamnyi Mi kunun,’ ebman ara dib en uram kurur ati ebdanman. 37Ati, Niryi Ni Nai Imtamnyi wa irmilin dinyi kum kunurantinyi uca, sunci Nisi dib tenenin kum. 38Bok, Niryi Er Imtamnyi wa irmilin dinyi diboka kununun ati, sunci Ni kununun dinyi deici aryi dib tenebdarur. Ati, sunci Niryi lak ebmanyi uram asi dib kum teneramunyi uca, Ni kununun to dinyi ara dib tenebdarur. Sunci ato kubmunyi ura, sunci Niti, ‘Ei, nun Nai Imtamnyi biryi Er dam wa irur,’ tenen bikwandurum. Tonda, ‘Ei, anyi bira Er Imtamnyi dam kunanyi kurur,’ tenen bikwandurum,” ebmou. 39Yesus biryi ato ebmou uca, sun Yahudi yala nang aryi, “Obkwayeb” tenen Ersi talebdenmai. Talebdenmai bok, Yesus biryi kisibloboka sun kankan aryi kuboka anaboka bindobmou.
Yesus biryi anaboka me si Yordan koubkaboka binmou uram
10:40-42
40Anardorbinmou ura, Yesus biryi me si Yordan koubkaboka binmouci, likoka Yordan me otam mutuk binmou. Ara, Erci Yohanes ninyi me dongoramunyi biryi minob me dongoramwe dam bina kubmou. 41Kubmou ani, ninyi ilinto Er dam yandoka Yesus biti ato eboka lak ebmai. “Yohanes biryi ilil tenen dinyi kum kiknibmou cok, erci Anyi biti lak ebmou uram nirya kunubmou ati dib en uram kubmou,” ebmai. 42Ato ebmai cok, ninyi ilinto aryi Yesus bisi dib tenebmai.
Selectat acum:
Yohanes Uram 10: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
