Yohanes Uram 8
8
1Sun atei yuk-yuk barsengdonmai bok, Er Yesus bira anaboka mutuk kon si Zaitun welebinmou. 2Mabmou ani, belekuna kobdob ara Erci anaboka Bait Allah ai ara Er Imtamnyi dama deirin ai dam tamuboka yanmou. Yanmou ura, ninyi nirya buluboka Er dam kekerbinmai ba, Erci bukoka eterebmou. 3Ura, sun Musa Uram eteren nang ab sun Farisi nang ab yandoka ner tentok asi boyanmai. A ner ara talyi yobmou asi sunci eiboka talebmaici, sun bulubmai nang urasintam boyanmai. 4Boyanmai ura, sunci Yesus bisi ato ebmai, “Nai ninyi Eterenanyi, a ner ara talyi yobmou ba, ninyi aryi eiboka talebmang ati boyanmab. 5Ati, ‘Ukubdarur-Ukuna mem,’ arukdeibmasou uram umbura aryi Musa biryi ato eboka ebdeiansou, ‘Talyi yon nerabwe ati keil yongoboka obdarur.’ Musa biryi ato eboka ebdeiansou ati, Kanci a ner ati una kubkwayeb ati ebdeibkwansirim do?” ebmai. 6Ato eboka asibdenmai cok, sunci Er Yesus biti, “Sakeibtibyi,” tenen asibdenmai. Ara, “ ‘Musa biryi arukdeibmasou uram kunubmunyei,’ ebsute uca, nunci Ersi tatab-tatab ebtibyi,” tenen asibdenmai. Ato tenen asibdenmai bok, Yesus biryi uram ton kum dekeibmou. Eda, Erci ngang dakdongoboka Er taruk du aryi tukwetam asi kerek sengdongonmou. 7Ura, sun Musa Uram eteren nang ab sun Farisi nang ab ara tanglona kum uca tuba-tuba asinmai ura, Er Yesus biryi Er nong ninikoka tikmou ura, ato ebmou. “Sun kankan aryi, ‘Ner ukula yobtinyi,’ iya ton kum tenerandinyi biryi erci yuma keil doboka a ner asi yongobci ba, sunci ur obdarur,” ebmou. 8Ato ebmou ura, Er Yesus bira tubto ngang dakdongoboka Er taruk du aryi tukwetam tamuboka kerek sengdongonmou. 9Ato ebmou uca, sun kekebmai nang aryi, “Nunbabyi ato kuboka malyi kubmoubwe se,” tenen bikdanmaici, anaboka yuk-yuk binsekmai. Sun wise nang ara yuma kobdob binsekmai ani, sun kam nang ara aminda aryi barsengdonmai. A bulubmai nang nirya binsekdobmai ura, Yesus ab talyi yon ner ab akwe tonkwa bukmarei. 10Ura, Yesus biryi Er nong ninikoka tikokmou ura, Erci a ner asi ato eboka asibdenmou. “Nong, kansi boyanmakungwe nang ara dantam binsekdaming do? Ninyi tentok ababyi kansi ton kum wenebkwamakungwe do?” eboka asibdenmou. 11Ato ebmou uca, a ner aryi Yesus bisi ato ebmou. “Ninyi tentok ababyi nisi ton kum wenebmanir,” ebmou. Ura, Er Yesus biryi ersi ato ebmou. “Ato ura, Nibabyi kansi kum wenebkwamakin. Ati, kanci ur anaboka bindobminyi ura, arub aryi kuboka malyi kun dinyi tamuboka dobdobminyei,” ebmou.
Er Yesus biryi, “Nira im dangna tukwe dangna nang ati berengdeirisununyi kunun,” eboka lak ebdanmou uram
8:12-30
12Ura, ninyi buluboka wekmai nang asi Er Yesus tubto eterebmouci, Erci sunsi ato ebmou. “Nira sun im dangna tukwe dangna nang ati berengdeirisununyi kunun. Ati, unanyi-unaner ara Nisi miliraningnyi nang ara kunuk dam kum yibinkwaming. Eda, berengna dinyi asing eibingnyi uca, iya kam kun dinyi dobdobkwaming,” ebmou. 13Ato ebmou ba, sun Farisi nang ara Ersi ato ebmai. “Kanci Kandamnyi biti, ‘Nira berengdeirisurununyi kunun,’ ebdanmarim ati, Kan lak en dinyi ara ninyi aryi, ‘Diba,’ tenebmakin kum uram asi ebdanmarim,” ebmai. 14Ato ebmai bok, Er Yesus biryi uram dekeiboka ato ebmou. “Nira Ni damnyi biti, ‘Imtam aryi kuboka yuryase,’ tenen diboka bingdanun. Tonda, ‘Imtam tubto welebinkwan,’ tenena ababyi Ni diboka bingdanun. A deyok aryi Niryi Ni damnyi biti uram lak ebdanman bok, Ni lak erdanun uram ara diba ati ebdanman. Bok, sunci Niti, ‘Dantam aryi yanganmou do?’ tenen diboka kum bingnanurum. Tonda, ‘Dantam binkwande do?’ tenen diboka kum bingnanurum. 15Sunci tukwetam tenen dinyi deici aryi, ‘A dinyi dib dinyi, o dinyi tola dinyi,’ tenerandum cok, talyi ati tatab-tatab erandum. Ba, Niryi ninyi tentok ababyi talyi ati tatab-tatab ena kum kunun. 16Niryi ninyi deyok lilibde banun cok, Niryi, ‘A dinyi dib dinyi, o dinyi tola dinyi,’ tenen lilibde banun ara manmalina kum uca lilibde banun. Ni tikwe ato kum esunun. Eda, Ni Nai Imtamnyi bira Nisi bokwetebnounyi bira Ni dongtam tikoka neik uram akwe erur. A deyok aryi, Niryi deyok lilibde banun ara dib dinyi deici aryi lilibde banun. 17Sunda Yahudi yala nang aryi talerandum uram ara, ‘Ato-ato kubdarur,’ en uram umbura aryi ato esurur. Ninyi bitinyi ara neik dinyi asing eibingiryok, ‘Ato-ato dib kubmar,’ lak erandingnyi uca, a lak ena uram ara diboka kubkwande. 18Niryi Ni damnyi biti dib en uram lak erdanun ba, Ni Nai Nisi bokwetebnounyi bibabyi Niti dib en uram lak enurur. Ati, Ni Nai ab Ni ab ara ninyi bitinyi aryi neik uram lak eranim ati, a lak en uram ara diboka kurur ati ebman,” ebmou.
19Ato ebmou ba, sunci Ersi ato eboka asibdenmai. “Kan nai ara dantam kubmar do?” eboka asibdenmai. Uca, Yesus biryi sunsi ato ebmou. “Sunci Ni ab Ni Nai bibabyi diboka kum bingnandum. Sunci Nisi diboka kum bingnanurum ati, Ni Nai ababyi diboka kum bingnandum,” ebmou. 20Er Yesus biryi ato eboka eterebmou ara Bait Allah ai dam aryi kuboka co bok deirin co sangkol dam tikmouci, eterebmou. Ato eboka eterebmou asi sun Yahudi yala nang aryi, “Nun li,” tenebmai bok, ninyi tentok ababyi Ersi kum talebmou. Ara, Er Imtamnyi biryi teleb tenebmou talak ara ninyi aryi Ersi talebkwamai talak kum berekmou ati, sunci Ersi kum talebmai.
21Ura, Er Yesus biryi sunsi tubto ebmou. “Niryi anaboka bindobkwan asi sunci, ‘Dantam binmar do?’ tenen ingkirikwanurum cok, sunci Nisi asing kum eibkwanurum. Sunci Niti, ‘Nun li,’ tenebmurubde binmamunyi ani, dibkwandum. Ni binkwan ai ara sunda wengyangana kum kubkwandum,” ebmou. 22Erci ato ebmou ba, sun Yahudi yala nang aryi ato eboka sisikdanmai. “Erdamnyi obdankwamar ati, ‘Ni binkwan ai ara sunci wengyangana kum kubkwandum,’ ebmasir do?” eboka sisikdanmai.
23Ato eboka sisikdanmai bok, Er Yesus biryi sunsi ato ebmou. “Niryi Ni damnyi kum obdankwan se. Sunda tukwetam nang kurandum ati tukwetam dinyi akwe tenerandum ati ebman. Ba, Niryi imtam aryi kuboka yuryasinyi kunun. Sunda tukwetam dinyi tenen nang kurandum. Nira tukwetam tenen dinyi tenenanyi kum kunun. 24A deyok aryi Niryi sunsi sirya eabsunwe. Sunci malyi kun dinyi kunubmurubde baramunyi ani, dibkwandum ati sirya eabsunwe. Ati, sunci Ni lak erdana uram asi dib kum tenebnumunyi uca, sunci malyi kun dinyi kunubmurubde baramunyi cok, dibkwandum,” ebmou. 25Ato ebmou ura, sunci Ersi ato eboka asibdenmai. “Kanda unatonyi kurum do?” eboka asibdenmai. Uca, Erci sunsi ato ebmou. “Niryi Ni damnyi biti lak ebdanmasiryok, ‘Nira atonyi kunun,’ eboka sirya ebmase ati, Ni sunsi tubto uram ena ara unatoa ati kubkwamasitinyi? Ni sunsi uram ena ara kum kubtinyi. 26Ba, sunda malyi kun nang kurandum ati Niryi tatab-tatab eboka sunti uram weik lak ebsitinyi. Sunci Nisi dib kum teneranurum bok, Ni Nai Nisi bokwetebnounyi bira dib en uram erurunyi kurur. Ni Nai biryi Nisi lak eterebmanou to, Niryi sun im dangna tukwe dangna nang asi lak eteresunun,” ebmou.
27Er Yesus biryi, “Ni Nai biryi Nisi bokwetebnou,” eboka eterebmou bok, sun Yahudi yala nang ara Erci ebmou to diboka kum bikmai. 28Sunci diboka kum bikmai ati, Er Yesus biryi sunsi ato ebmou. “Sunci Nisi taleboka co lase deici aryi erebdeibmaningnyi ura, sunci Niti, ‘Anyi bira Ninyi Daunyi kurur,’ tenen diboka bikwandum. Tonda, Niryi Ni damnyi biti lak ebdanman uram ati dib kurur ati bikwandum. Tonda, Ni kanya yuk aryi a dinyi kum eterenun. Eda, Ni Nai biryi eterebmanou to eterenun ati bikwanurum. 29Nisi bokwetebnounyi bira Nisi milinurur ba, Ni ab tonkwa kununumnyi kururci, Erci Nisi kum taklobmanir ati ebman. Niryi Er kanya teleb tenerur dinyi nirya kunubde banun ati, Erci Nisi kum taklobmanir ati ebman,” ebmou. 30Er Yesus biryi ato eboka eterebmou ba, ninyi ilinto aryi Ersi dib tenebmai.
Sun Yahudi yala nang aryi, “Nunda nun abwe Abraham er mabwe kunub,” ebdanmai uram
8:31-41
31Ura, Er Yesus biryi sun Yahudi yala nang kankan aryi Ersi dib tenebmai nang asi ato ebmou. “Sunci Ni eterebmasin uram asi diboka talebnurubdobmunyi nang ara Nisi milinina nang asi diboka kuramunci. 32Ara, sunci Nisi milinina nang kuramunci, dib dinyi bikwandum. Dib dinyi bikmamunyi ura, sunda dib dinyi bikwandum biriman aryi tabwe lobdeibdob nang ato kubkwandum,” ebmou.
33Ura, sun Yahudi yala nang aryi Ersi ato ebmai. “Nunda nun abwe Abraham yala nang kunub ati, tabwe demna nang kum kuramoubwe se. Nunci yuk nang ati wa arungna nang kum kuramoubwe. Ati, Kanci unato ati, ‘Tabwe lobdeibmou nang ato kubkwandum,’ ebmasirim do?” ebmai. 34Ura, Yesus biryi sunsi ato ebmou. “Niryi sunsi dib en uram ebkwinsin ati sunci diboka kekebdarur. Unanyi-unaner ara malyi dinyi kunuramingnyi nang nirya ara malyi dinyi aryi tabwe demna nang ato kunung. 35Ura, wa arungna nang ara sun nai ai umbura aryi sokon iya kum kunung. Ba, sun mabwe kobdoba ara sun nai ai umbura aryi sokon iya kunung. 36Ati, Er Imtamnyi Mi sunsi tabwe lobdeibsici uca, sunci tabwe lobdeibsou nang ato diboka kubkwandum. 37Sunda nun abwe Abraham yala nang kurandum ara Ni bingsunun. Bok, sunci Niti Ni eterena uram ati, ‘Nun li,’ tenerandum deyok aryi, ‘Obkwayeb,’ tenebmanurum. 38Nira Ni Nai Imtamnyi urasintam aryi kuboka asing eiriranse tok sunsi eteresunun. Ba, sun nai bira ninyi orminingnanyi kurur ati, sunci er uram ebdeibmasou tok kunurandum ati ebman,” ebmou.
39Ba, sunci Ersi ato ebmai, “Abraham bira nun abwe kisok kuramwe ati nunda er deibdoba nang kunub,” ebmai. Ura, Erci sunsi ato ebmou, “Nun abwe Abraham bira Er Imtamnyi urasintam aryi teleb dinyi akwe kuramunyi kuramwe. Ati, sunda Abraham er mabwe diboka kurandate ura, sunci Abraham kuramwe to teleb dinyi kunurandate. 40Nira Ni Nai bira ebmaci dib en uram kekeboka sunsi dib en uram eterebmasinyi bok, sunci Niti, ‘Obkwayeb,’ teneranurum. Nun abwe Abraham bira ato dinyi kum kunuramwe ati ebman. 41Sun nai bira ninyi malyi kiminingnanyi kurur ati, sunbabyi neiktoto neik dinyi kurandum,” ebmou.
Ato ebmou bok, sun Yahudi yala nang aryi Ersi ato ebmai. “Nunda Abraham er mabwe kobdob kunub. Nun abwe ab tabangdongon ner ab aryi deibmarei mabwe kum kunub ati ebmab. Tonda, nun Nai Imtamnyi bikwa nun nai kurur,” ebmai.
Er Yesus biryi, “Sunda isa sienyi si Iblis er mabwe kundarur,” eboka eterebmou uram
8:42-47
42Ura, Er Yesus biryi sun Yahudi yala nang asi ato ebmou. “Sunda Er Imtamnyi mabwe diboka kurandate ura, sunci Niti boukwe weik kuranindate. Nira Er Imtamnyi dam aryi kuboka yuryase ura, sun kankan kuran anyi kunun ati ato ebman. Ni kanya yuk aryi, ‘Tukwetam yuryibinkwan,’ tenena kum kuranse. Eda, Er Imtamnyi biryi bokwetebnou uca, tukwetam yuryase. 43Niryi sunsi dib en uram lak eteresunun bok, unato ati sunci Ni uram asi bita kum bingnandum do? Sunci Ni uram deyok diboka kekebman kum kurandum ati bita kum bingnandum ati ebman. 44Isa sienyi si Iblis bira sun nai kurur ati, sunda er milin nang kurandum. Ati, sunci, ‘Nun nai biryi teleb tenebmaci tok kunubde binkwayeb,’ tenerandum. Iblis bira yuma kobdob talak aryi kuboka ninyi orminingnanyi kuramwe. Tonda, dib en uram talermuruna kum kuramunyi kurur. Iblis bira dib en uram ebman kumnyi kurur ati ebman. Erda tola uram enanyi ton, tola en uram deyoknyi kurur. Erci teleb tenebci tok ara tola uram en dinyi erur. 45Ura, Niryi sunsi dib en uram eteresunun bok, sunci Ni uram ati dib kum teneranurum se. 46Niryi malyi dinyi utotoa kum kunubde banun. Unanyi biryi Nisi, ‘Malyi kubumwe,’ eboka tatab-tatab ebnute do? Ba, Niryi sunsi dib en uram eteresunun bok, unato ati sunci Nisi dib kum teneranurum do? 47Ura, sun Er Imtamnyi mabwe nermabwe ara Er Imtamnyi biryi Ni biriman aryi eteresurur uram diboka kekeraming. Ba, sunda Er Imtamnyi mabwe kum kurandum deyok aryi, sunci Ni uram kum kekeranurum,” ebmou.
Er Yesus biryi Erdamnyi biti, “Sun abwe Abraham deirina kum talak ara Ni minob kuanse ani, ukuryok ababyi tuba kunun,” ebdanmou uram
8:48-59
48Ura, sun Yahudi yala nang aryi Er Yesus bisi ato ebmai. “Nunci kuboka Kanda malinyi ati Samaria ateinyi bitonyi kurum ebkitibyi ara diboka do? Kanda isa kanya wekounyi kurum ebmakib ati diboka ebmakib,” eboka asibmai. 49Ura, Er Yesus biryi sunsi ato ebmou. “Nira isa kanya wekounyi kum kunun. Eda, Niryi Ni Nai Imtamnyi si ati, ‘Erebdeibkwan,’ tenen kunun. Bok, sunci Nisi boukwe kum kimdanurumci, talyitam, ‘Malinyi,’ eranurum. 50Bok, Niryi Ni damnyi biti, ‘Ni si weik erebdeibdankwan,’ tenena kum kunun. Bok, Ni Nai Imtamnyi biryi Niti, ‘Ninyi aryi Er si weik erebdeibkwanung,’ tenenurur. Ni Nai Imtamnyi bira ninyi deyok lilina deyoknyi biti ato ebman. 51Niryi sunsi dib en uram ton ebkwinsin ati diboka kekebdarur. Unanyi-unaner ara Ni eterena uram taleboka kunubde baramingnyi ura, a nang ara iya din dinyi kum dobdobkwaming,” ebmou.
52Ato ebmou ba, sun Yahudi yala nang aryi ato ebmai. “Kanda isa kanya wekankounyi kurum ati ukuryok lak kibdanmarim sirya bikmakib. Nun abwe Abraham bira sirya dibmou ani, Er Imtamnyi Uram ebdeibmaci to lak etereramnyi nang ababyi diamnyi. Ati, Kanci unato ati, ‘Ni eterena uram kunubde baramingnyi nang ara din dinyi kum dobdobkwaming,’ ebmasirim do? Tola ati ebmasirim se. 53Nun abwe Abraham bira weik sienyi kuramwe asi Kanci bisibkaboka iya erebdob sienyi kibdanmarim do? Nun abwe sirya dibmou. Tonda, Er Imtamnyi Uram ebdeibmaci to lak etereramnyi nang ababyi diamnyi. Kanci Kandamnyi erebdeibdanmarim se,” ebmai.
54Ato ebmai ba, Er Yesus biryi sunsi ato ebmou. “Niryi Ni damnyi kum erebdeibdanman. Niryi Ni damnyi erebdeibdanmatinyi uca, talyi ati akwe erebdeibdanmatinyi. Bok, Ni Nai Imtamnyi biryi Nisi erebdeibmanir ati ebman. Ni Nai Imtamnyi bira sunci, ‘Nun moloramibnyi,’ erandumnyi biti ato ebman. 55Sunci Ni Nai Imtamnyi bisi diboka kum bingnandum bok, Niryi Ersi diboka bingnun. Niryi Er Imtamnyi biti, ‘Ni walwal,’ ebtinyi ura, Nibabyi suntonyi kiboka tola enanyi kibdatinyi. Nira Er Imtamnyi bisi diboka bingnunci, Niryi Er Uram asi diboka taleboka kunubde banun. 56Ura, sun abwe Abraham bira Ni yuryangana ati dibde buranou ura, kilkil weik kanya boramwe. Ati, Erci, ‘Imtam aryi kuboka yuryankwande,’ tenen minob asing eibmanou ba, kilkil kanya boramwe,” ebmou. 57Er Yesus biryi ato ebmou ba, sun Yahudi yala nang aryi Ersi ato ebmai. “Kanda kwalina lima puluh baryi kum kwalibmamincok, Kanci una kuboka nun abwe Abraham minob kuboka diamunyi bisi asing eiboka biktum do?” ebmai.
58Ato ebmai ba, Er Yesus biryi sunsi ato ebmou, “Niryi sunsi dib en uram ebkwinsin ati diboka kekebdarur. Sun abwe Abraham deina kum talak ababyi, Ni minob kuranse ani, ukuryok tuba kunun,” ebmou. 59Ato ebmou ba, sun Yahudi yala nang aryi, “Keil yongoboka obkwayeb,” tenen keil dobmai. Keil dobmai ba, Er Yesus biryi Bait Allah ai aryi kuboka anabdobmouci, inirdarorbinmou.
Selectat acum:
Yohanes Uram 8: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
