Staan weer opSample

Hoe kan jy weer opstaan nadat jy platgeslaan is?

Maak vergifnis deel van jou leefstyl

"En julle moet nie oordeel nie, dan sal julle nooit geoordeel word nie. Julle moet nie veroordeel nie, dan sal julle nooit veroordeel word nie. Spreek vry, en julle sal vrygespreek word" (Lukas 6:37 AFR53).

Vergifnis is 'n gelaaide en gewigtige onderwerp. Indien jy egter wil opstaan om vorentoe te beweeg, is dit noodsaaklik dat jy diegene sal vergewe wat 'n onreg teenoor jou gepleeg het. Vergifnis beteken nie dat die onreg wat teen jou gepleeg is gering of van verbygaande aard is nie. Nee! Vergifnis beteken dat jy die gesindheid wat Christus teenoor jou geopenbaar het ook teenoor ander sal bewys. Vergifnis beteken dat die vryheid waarna jy hunker vir jou 'n sterker begeerte is as morbiede neerslagtigheid as gevolg van die teleurstelling en seerkry.

Moenie langer toelaat dat bitterheid jou van lewensvreugde beroof en jou ganse menswees vergiftig nie. Moenie langer die gyselaar van die verlede wees nie. Luister, jy kan nie vryheid ervaar of genesing van teleurstelling en seerkry ontvang indien jy nie besluit om te vergewe nie.

Vergewe en jou binnemens sal weer begin lewe. Wanneer jy vergewe, word die gewig van dit wat jou teen die grond wil vasdruk om jou te verhinder om weer op te staan, verwyder. Daarom, wanneer jy vergewe sal jy ervaar hoe die wind van vryheid jou op nuwe hoogtes neem om te sweef soos 'n arend. Wanneer jy vergewe, word daar met neerslagtigheid afgereken en kan daar 'n nuwe lofsang van genade en volkome vryheid in jou binnemens posvat.