Stiltyd GedigteSample

Psalm 46:11 (NLV): “Wees stil en weet Ek is God! Ek sal vereer word deur die nasies, verhewe wees oor die hele aarde.”

2 Korintiërs 12:9a (NLV): “Hy het egter vir my gesê: 'My genade is genoeg vir jou, want my krag kom juis in swakheid tot volle verwesenliking.'”

Stil

Tot siele-stilstand gedwing

wat introspeksie bring

Vae hoop ontrafel

met al my kaarte op die tafel

Blootgestel aan realiteite

soos soliede beton feite

Legio vrae gelys

My denke koud soos ys

Iets roer van binne

en bring my tot sinne

Een dag op ‘n slag,

dis waar genade wag

My hart word ontroer

met vrede wat my kop ontvoer

My gees buig skaam

voor ‘n baie groter Naam

“Wees stil en weet

Ek het jou nie vergeet” ...

Gebed: Here, ek sukkel om stil te word. Sóveel dinge druis ongevraagd deur my denke. Kom waai deur u Gees my siel tot stilstand.

Sagte strelende musiek het dikwels ‘n stil-word effek in jou denke. Binne oomblikke voel jy rustig. Probeer dit gerus wanneer jy stil gaan sit voor ons Vader se voete.