Stiltyd GedigteSample

Psalm 18:3-4 (NLV): “Die HERE is my rots, my vesting en my redder, my God, en my rots by wie ek skuil. Hy is my skild, my magtige redder, my veilige vesting. Ek het tot die HERE geroep, Hy wat lofwaardig is, want Hy red my van my vyande.”

SALUUT VIR 'n VROU

Jy blyk graniet van buite, jou raamwerk yster,

maar jou hart is watte, rou en verbysterd

Jou wese gewoond dat jy nooit gaan lê

Jou kinders het jóú nodig, hulle moet vir jou hê

Jou menswees is eerlik, jou hart vol van gee

jou oë spreek van liefde, kalm soos die see

Jou gemoed van deursetting maak ‘n hart week

Daar is soveel meer wat diep binne jou steek

Ek luister en hoor ‘n vrou seer maar braaf

Ek voel die Here se hand haar saggies laaf

My binneste staan op, wil uitroep teen haar pyn,

maar Hy maak my stil, dit is sy samesyn

Die lewe soms kru, selfs net te veel

Wie is dit ... die Satan wat dit reël?

Ek val op my knieë, gee die pakkie vir Hom

en my siel erken weer — “God, ek staan stom”

Hy lawe my hart wat swaarkry vir ‘n vrou

wat lafenis soek in niks, net als wat sou

Hy wys my op meer, ‘n plan heeltemal nuut

Ek begryp sy wye hand en ek saluut!

Jy is kosbaar en sag, van werkbare staal

die eindproduk wat sy grootheid sal bepaal

Ek ervaar die oorwinning, vanuit ‘n ver hoër plek

en ek staan weer met my hand uitgestrek

Ek saluut jou volstoom-hart dapper vrou

Vir wat jy verduur maar ook wat jy behou

God sien raak, ook engele saluut jou

Jy is veilig, staan vas — jou tyd is nou!

Gebed: Here, ek weet ek kan in oorwinning leef met U langs my ... my Rots en veilige hawe.

Alhoewel hierdie gedig vir ‘n vrou geskryf is, is dit beslis van toepassing vir mans ook. Meestal kan baie mense vereenselwig met hierdie woorde. Deur fyn te luister kan jy ook ander se seer voel en hul opdra in jou gebede.