Die geboorte van Christus was dan soSample

Advent roep ons tot hoopvolle nadenke

Advent begin op die vierde Sondag voor Kersfees en duur tot en met Oukersaand (24 Desember). Gedurende hierdie feestelike tydperk word ons tot dieper nadenke begelei. Ons beskou Advent as 'n geestelike en innerlike reis wat ons met hoop besiel. Dit is 'n hoop wat stewig gegrondves is in die beloftes van God, die persoon en werk van Jesus Christus, die genadige beskikbaarheid van verlossing en die vooruitsig van 'n beter toekoms. Die kosbare verhaal van die geboorte van Christus laat ons opnuut waardering kry vir die getrouheid en groot genade van God. Advent is 'n tydperk van geestelike introspeksie, want ons dink intensioneel aan die wonder van Christus se geboorte en hoe dit ons lewens raak. Daarom is Advent 'n seisoen wat gelowiges aanmoedig om met blydskap nabetragting oor die verlede te doen, met verwagting na die toekoms uit te sien terwyl ons elke dag met hoop aanpak. Gedurende Advent leer ons opnuut dat Jesus Christus die inhoud van die hoop is waarmee die Christen-geloofsgemeenskap besiel word.