Die Grootste GeskenkSample

Prys die Here!

Lees: Psalms 113; Lukas 1:46–55

SOAP: Psalms 113:1–2

“Prys die Here!

Prys, dienaars van die Here, 

prys die naam van die Here. 

Die Naam van die Here moet geloof word, 

nou en vir altyd.”

Oordenking

Vandag is ‘n dag vir groot viering! Ons Verlosser het gekom — die Koning van die konings en die Heer van die here! Ons Verlosser is gebore en ons kan saam met die engele in die hemel sy lof besing. Prys die Here voordat die geskenke oopgemaak word, voordat die kersliedere gesing word, want Hy alleen is waardig. 

Prys God vir die gawes van hoop, geloof, vreugde en vrede wat Hy ons gegee het. Prys Hom vir die glorieryke gawe van sy Seun, Jesus. Prys Hom vir alles wat Hy gedoen het en vir sy Woord wat vertel van sy goedheid, barmhartigheid en liefde. Prys God vir alles wat Hy in jou lewe gedoen het, sing vir Hom van die verhaal wat Hy in jou lewe geskryf het. Prys Hom vir die maniere waarop Hy jou gered het, jou gehelp het, beskerm het, liefgehad het, jou genees het, verlos het en jou hartseer verruil het vir vreugde.

Prys God dat Hy ons so liefhet dat Hy oor duisende jare, in die lewens van ontelbare mans en vroue enigiets sou doen om sy plan vir ons redding perfek te laat uitwerk. Prys Hom dat die verlossing wat Hy bied ‘n geskenk is, nie iets wat ons kan verdien of waarvoor ons kan werk nie, maar ‘n geskenk wat vrylik gegee word. 

Prys Hom, net soos Maria, “omdat die magtige groot dinge vir my gedoen het en sy naam Heilig is” (Lukas 1:49). Wees bly, liewe vriende! Ons vier vandag die geboorte van Jesus — die grootste geskenk wat ons goeie en volmaakte Gewer gegee het. 

Gebed

Almagtige God, al u gawes is goed en volmaak. Dankie dat U u Seun gestuur het om ons te red en dat U elkeen die geleentheid gebied het om u gratis gawe van verlossing te aanvaar. Dankie vir die gawes van hoop, geloof, vreugde en vrede wat U ons gegee het – geskenke vir vandag en vir ewig. Amen.