God het ons elkeen met ‘n groot kapasiteit vir ‘n diep soeke geskape...
En elkeen van ons interpreteer daardie soeke of begeerte op verskillende maniere.

Vir sommige van ons is die soeke van ons hart na die ideale lewensmaat. Vir ander is dit die perfekte huis en kar. Vir ander ‘n posisie in jou beroep. Maar ons kom op ‘n plek waar ons voel: dis nie genoeg nie. Ek hét die huis. Ek hét die werk. Ek hét die vrou en kinders. Dis nie genoeg nie. Iets kort. Dis leeg.

Agter elke soeke is ‘n groter soeke waarmee ek in kontak moet kom. Paulus sê in Efesiërs 5:5: “ ... Dit moet julle goed besef, iemand wat ontug pleeg, onsedelik lewe of  ń gierigaard is, — want gierigheid is afgodery — het nie deel aan die koninkryk van Christus en van God nie.”

Hy sê daar is ‘n plek in my lewe, ‘n soeke in my lewe, wat gereserveer is vir God en sy Koninkryk. God is my bron. Niks en niemand behalwe God kan daardie begeerte vrymaak nie. Dis waar my geluk lê. Dis waar my sekuriteit lê. Dis waar my lewe lê. Dit beteken nie dat God nie my behoeftes ontmoet deur ander nie, en dat God nie my behoeftes ontmoet deur iets nie. Maar Hy is die bron. Hy is die oorsprong, en dit verander alles in die vervulling van my behoeftes: as ek weet dat dit van God af kom. Hy het my gemaak met hierdie behoeftes en met hierdie begeertes wat binne my is. Nou kyk ek na Hom vir die vervulling daarvan.

Ter nadenke

Watter begeertes waarmee jy leef, voed jou verhouding met God?

Gebed

Here, gee my die genade om die verlange van my hart te verwoord.

Die Boodskap vir jou Lewensreis

Daaglikse oordenking wat voortbou op die dag se tema