Wat is die grootste geskenk wat jy nog ooit ontvang het? Kan daar iets groter wees as die gawe van jou lewe? As jy nie geleef het nie, het jy nie bestaan nie, was daar niks wat jy kon ontvang nie. Jou lewe en die feit dat jy bestaan, is ‘n geskenk. Jakobus sê dat ons deur sy wil voortgebring is. (Jak 1:17)

Jy ís omdat Hy wou gehad het jy moet wees. Jy is sy idee. Nie jou pa en ma s’n nie. Nie ‘n glips nie. Hulle was net die kanale en die manier hoe jy die lewe ingekom het. Daar is iets groter agter alles. Hy is. Hy het nie net die lewe vir jou gegee nie, maar hou jou lewe daagliks in stand. Handelinge 17:25 stel dit baie duidelik dat: “Hy self aan almal lewe en asem en alles gee. Dit beteken dat ons nie net aan onsself oorgelaat is nie. Hy is daar, Hy gee om.

 Ter Nadenke 

Neem ‘n oomblik en kyk na alles wat jy het. Alles wat jou lewe moontlik maak. Jou familie, jou gesin, vriende, die mate van gesondheid wat jy geniet, kos, klere, kar ... Kan jy sien dat dit van Hom af kom? Hy het dit vir jou gegee. Dit alles is geskenke. Kan jy dankie sê vir Hom?

Gebed

Here, gee my die genade om te ontwaak tot die lewe saam met U.

Die Boodskap vir jou Lewensreis

Daaglikse oordenking wat voortbou op die dag se tema