Lydenstyd Reis - Water in Die WoestynSample

INNERLIKE STILTE

“Wees stil en weet dat Ek God is.” – Psalm 46:10

“Ontvlug, wees stil, bid gedurig.” – Woorde van Arsenius

Afsondering, stilte en onophoudelike gebed, is moontlik die drie kernbegrippe van woestyngeestelikheid. Dit is deur te ontvlug en te bid wat ons gehelp word om ook stilte te verkry. Ontvlugting is eers om jouself af te sonder. Dit is om in die woestyn in te gaan, dit is ’n plek waarheen die Gees ons lei en uitnooi. Volgens Henri Nouwen is daar nie eintlik ’n geestelike lewe sonder afsondering nie. Uiterlike stilte, die afsny van stimulasie en geraas, is egter nie genoeg om innerlike stilte mee te bring nie. Dit is ook deur gebed wat die innerlike stilte meegebring word. Twee baie ou bekende maniere is om ’n kort gebed saggies by jouself te bid, ’n gebedswoord of ’n kort frase gereeld te herhaal. Die oomblik wanneer jy daarvan bewus word dat jou gedagtes dwaal en dat jy besig is met iets anders, gebruik jy net die woord om jou voorneme om na God terug te keer, te bevestig. Op hierdie manier kan daar innerlike stilte in jou teweeggebring word. Dit is ’n plek van groot vrede en rus. Paulus beskryf hierdie plek as ’n plek waar die vrede van God, wat alle verstand te bowe gaan, jou hart en sinne in Christus Jesus sal bewaar. (Filippense 4:7)

“Enige beproewing wat jou pad langs kom, kan in stilte oorwin word.” – Abba Pastor

GEDAGTE VIR DIE DAG

“Wanneer ons die woord of frase gevind het wat ons in gebed anker, die prewelgebed wat ons laat stil word en gefokus hou, ontdek ons iets van die genade en krag wat ons in ooreenstemming met God se kommunikasie bring, in gesprek sowel as stilte.”  – Rowan Williams

VIR NADENKE

Dink vir ’n oomblik terug oor die dag wat verby is. Vra die Here om jou te help om hierdie dag deur sy oë te sien. Wat was jou hoogtepunt? Wat was jou laagtepunt? Praat met die Here daaroor. Was jy vandag bewus van God se teenwoordigheid in jou lewe? Het jy innerlike stilte ervaar? Was daar ’n kort frase waarnatoe jy gereeld teruggekeer het? Het jy God daardeur beleef? Vra die Here om vir jou ’n frase te gee wat jy môre herhaaldelik deur die dag kan bid, wat jou aan Hom kan herinner.