Zenezi 27
27
Izaqui, Zacoho ãma, 'Re ihâimana u'âsi mono, iwẽ te te tãma 're pisutu mono da, te te ãma irowaptẽrẽzé wasu'u
1Tawamhã Izaqui ma tô si'ihi pese oto. Tahawa te te oto rob'madâ'â waihu'u õ di, tob'a wa. Tawamhã nimahã bâtâ na ma tô ti'ra si'aibâ poto'rata zô hã hâ, Ezauhu zô. Te tãma tinha, ãne:
— Ĩ'ra!
— E marĩ ĩmama. Ãhãta ãme wa ĩhâiba. — Ãne ma te timama sada'â.
2Tawamhã te imama tãma tinha ãne:
— Wa tô oto ĩsi'ihi pese. Duré wa hã bâdâ hã te ĩsina waihu'u õ di, ĩdâ'âzéb da hã. 3Tahawa ma'ãpé, asimnhi'ã ate ti hã âri, rom na aba ĩzada 're aimorĩ da, abaze zô. 4Asõpãrĩ nhi na, dasa ise te ĩsima iwẽzé hã ĩma ãma 'manharĩ da. Tawamhã ta hã te za we ĩma i'â. Ĩsai parip si ĩdâ'â õ ré, wa za ai'ãma mre, 'Re ihâimana u'âsi mono iwẽ te te aima 're apisutu mono da hã.
5Tawamhã Rebeca, Ezauhu ma, Izaqui te te roti ré, ma tô mreme wapa. Tahawa rom na aba 're morĩ da, watobro za'u hã, 6ma tô Zacoho ma tãma tinha ãne:
— Ãhã na aimama hã wa tô mreme wapa, adub'rada Ezauhu ma, te te roti ré. Ãne te aimama tãma tinha: 7“Ma'ãpé, rom na abaze zô 're aimorĩ, 'maiwĩrĩ wa, dasa ise hã ãma ĩma 'manharĩ da. Tawamhã ĩsai parip si, wa za 'Re ihâimana u'âsi mono ma, ĩdâ'â õ ré ai'ãma mre, iwẽ te te aima 're apisutu mono da.” 8Ĩ'ra, tahawa te za ĩwapa, te aima iwaihu'uzéb zarina, za i'manharĩ da hã. 9Ma'ãpé tahawa, wanhimizama isimasabzéb u hã aimorĩ, maparane pone'ẽrebâ zéré uzé 'ra iwẽ uptabi hã mrami da. Tawamhã wa hã aimama te te sima iwẽzéb uwaibaba, wa za ise na hã ãma tãma api. 10Taha parip si te za te te 'rẽne da hã tãma i'â. Ãhã wamhã, te za aimama hã dâ'â õ ré ai'ãma mre, 'Re ihâimana u'âsi mono ma, iwẽ hã te te aima 're apisutu mono da.
11Tawamhã Zaco, te tina ma asa tãma tinha ãne:
— Ĩdub'rada hã hâiba sui 'ré di. Wa hã ĩhâiba sui õ di. 12Bété za ĩmama te te ĩhâiba upi mono wamhã, te za ĩwaihu'u, ĩhâimana nhipese sina marĩ te tãma i'manharĩzém na hã. Tawamhã iwẽ hã te te ĩ'ãma 're apisutu mono da nherẽ, te za taha wa'rãmi iwasété si ĩmama hã te te ĩ'ãma 're apisutu.
13Tane nherẽ, ma te ina ãne ãma sada'â:
— Ĩ'ra, tiha hã tô ai'upana iwasédé hã ĩ'ãma hâimana. Tihai õ di. Tahawa te aima iwaihu'uzé hã, te za tô i'manha. Tahawa ma'ãpé pone'ẽrebâ zéré uzé 'ra we ĩma mrami da hã, te za tô sô aimo.
14Tawamhã Zacoho ma, ina tãma sadahutu õ wa, te oto sô mo. Tahawa, ma tô pone'ẽrebâ zéré uzé 'ra hã timra. Duré ta norĩ hã ma tô oto tina ma mrami zahuré. Taha na Izaqui te te sima iwẽzéb zarina dasa ise na ma tô ãma tãma 'manha. 15Taha pari, Rebeca ma tô Ezau uza ihâi wẽ uptabi 'ri 're inomro hã ti'â. Taha na ma tô Zaco hã ãma uza. 16Tawamhã pone'ẽrebâ zéré uzé hâ na ma tô ãma sib'rata ubu. Ibutu sui'õi ãma zama ma tô duré ãma butu ubu. 17Taha pari dasa isei uptabi na tinhipi, i'u'ẽtẽ wapu te te i'manharĩ me ma tô tãma sõmri zahuré.
18Tawamhã Zaco, timama hâimanazéb u ma tô oto iré mo. Ãne te tawamhã 'mahâ:
— Ĩmama.
— E marĩ. Ãhãta wa nhamra. — Ãne ma te sada'â asa.
Te duré sadanha ãne:
— E ma hã, a hã ĩ'ra.
19— Wa hã Ezau, dadub'rada. Ĩma i'ruzéb uwaibaba, wa tô asa hã aima 'manha. Ma'ãpé ĩzawi na hã ai'utu. Duré asahâ na asãmra, ĩnhisõpãrĩ nhi na asai hâ. Taha parip si, te za ĩ'ãma aimre, 'Re ihâimana u'âsi mono ma, iwẽ hã te te ĩma 're apisutu mono da.
20Tawamhã Izaqui te sadanha ãne:
— Ĩ'ra, e niha ma te merẽ waptu na asõwẽ su.
Tawamhã Zaco, ma te ãma sada'â ãne asa:
— Uburé Danhib'apito, ate 'Re ihâimana u'âsi mono ma tô ãne na hã ãma ĩpawapto.
21Tawamhã Izaqui, te duré Zacoho ma tinha ãne:
— We ĩtẽme asina rotété pé, 'râwi te ai'upi mono da. Ãhã wamhã, wa za tô aiwaihu'u, sena tô a hã ĩ'ra Ezau na hã, niha wamhã duré ta hãi õ na hã.
22Tawamhã Zaco, Izaquihi tẽme ma tô 'râwi itẽme ai'ré. Imama te te upi mono sina, ma tô ãne duré tãma tinha:
— Aimreme hã, tô Zacoho mreme ne, a hã. Tane nherẽ, asib'rata si hã, tô Ezau nhib'rata ne.
23Ãne wa, Izaqui, Zaco hã te te waihu'u õ di, Ezau nhib'rata ne sib'rata sui 'ré wa. Tahawa ma tô aré ãma imreme na hã sãna'rata, 'Re ihâimana u'âsi mono ma, iwẽ hã te te tô tãma 're apisutu mono da. 24Tane nherẽ, ãma mreme õ ré, te duré sadanha ãne:
— E tô a hã, ĩ'ra Ezau.
— Ĩhe, wa hã tô Ezau.
25Tawamhã imama te oto tãma tinha ãne:
— Wẽ di tô. Asisõpãrĩ nhi na ĩsa da, we ĩma âri pé. Taha parip si, wa za ai'ãma mre, 'Re ihâimana u'âsi mono ma, iwẽ hã te te tô aima 're apisutu mono da.
Tawamhã Zaco, timama ma hã ma tô ti'â. Duré uwa 'rãi wa'u isé zama hã ma tô tãma ti'â. Tahawa Izaqui ma tô ti'rẽ. Ma tô duré simizâ, tisa hã. 26Taha pari te imama hã ãne oto tãma tinha:
— Ĩ'ra, we ĩtẽme ai'ré na 'râwi, ĩtob'rata hârâ da.
27Tawamhã Zaco, timama u hã ma tô 'râwi pesere oto itẽme ai'ré. Tahawa, ma tô timama hã tob'rata hârâ na sawi. Tawamhã Zaco, ãma isi'uzazé te te hãi waihu'u wamhã, ma tô Izaqui ti'ra ãma hã mre ãne:
“Ĩ'ra hâiba zadaze hã, rom na danhib're ma, Uburé Danhib'apito iwẽ te te tãma 're apisutu mono wa, isadaze ne.
28Ĩ'ra, 'Re ihâimana u'âsi mono, hâiwa hawi atébré hã te te aima 're sõmri mono da si, iwẽ hã.
Duré rom na aiburu na 're irob're mono, aima 're 'rãipese mono da si iwẽ hã, amnho norĩ hã, uwa 'rãi wa'u isé me.
29A'uwẽ mono bâ asapari te te aima 're iromhuri za'ra mono da si, iwẽ hã.
Duré daro mono bâ da te dasiwi 're i'aiwazé mono da si, iwẽ hã.
Duré asisãnawã norĩ nhib'apito na 're i'aihâimana mono da si, iwẽ hã.
Duré ana zé're hawi a'uwẽ norĩ hã, asõ'remhã aima 're isiwẽ'ẽ za'ra mono da si, iwẽ hã.
Tawamhã duré iwasédé te te aima 're ipisutu za'ra mono norĩ ma hã, 'Re ihâimana u'âsi mono, ta norĩ ma, iwasédé te te tãma 're ipisutu za'ra mono da si, iwẽ hã. Duré iwẽ te te aima 're ipisutu za'ra mono norĩ ma, 'Re ihâimana u'âsi mono, iwẽ te te tãma 're ipisutu za'ra mono da si, iwẽ hã.”
30Tawamhã Izaqui, ti'ra Zacoho ãma, iwẽ hã te te tãma 're apisutu mono da, ãma mreme pari, Ezau, aba hawi iwisi 'wab'rere ma tô oto watobro, timama hawimhã. 31Tawamhã taha zama ma tô tinhipi ise hã timama ma 'manha. Taha pari, ma tô tãma ti'â. Tahawa te ãne timama hã 'mahâ:
— Ĩmama, ma'ãpé ĩzawi na hã ai'utu, abaze te i'maiwĩrĩ nhi na asai hâ. Taha parip si, te za 'Re ihâimana u'âsi mono ma, ĩ'ãma aimre, iwẽ hã te te ĩma 're apisutu mono da.
32Tawamhã imama te sadanha ãne:
— E 'wa hã, a hã.
— Wa hã, ai'ra Ezau ipoto'rada.
33Tawamhã Izaqui, ãne na imreme te te wapari wamhã, ma tô tãma pẽ'ẽwara. Ma tô duré popo. Tahawa, te tãma tinha ãne:
— E 'wa ma te bété tinhisõpãrĩ hã we ĩma ãwisi. Taha na, we aiwisi wana ré, wa tô ĩsai pa. Duré taha pari, wa tô 'Re ihâimana u'âsi mono ma hã ãma mre, iwẽ hã te te tô tãma 're apisutu mono da. Tahawa, te za tô õhõ ma si iwẽ hã tãma 're hâimana.
34Tawamhã Ezau ãne hã te te wapari wamhã, ma tô rosa'ratazé te 're sadari. Tahawa te duré tãma tinha ãne:
— Ĩmama, ĩ'ãma zama te za aimreme, 'Re ihâimana u'âsi mono, iwẽ hã te te tô ĩma zama 're apisutu mono da.
35Tane nherẽ, asa ma te ãma sada'â ãne:
— Ano we imorĩ hã ma tô ĩma sadawa hapese. Tahawa taha ãma si wa tô mre ai'upana, aré aima ihâimana da hã.
36Tawamhã Ezau, te ãne tinoi hâiba na ãma tãma tinha:
— Ã hã oto maparane ãma hã ma tô taré hâimana nhipese na ĩhâiba na hã ĩ'ãma apsaihu. Tô ibâre tô, ma te sisi ni, Zaco#27.36 Zaco hã hebreu norĩ mreme na “dazadawa nhipe” aiwa prã na ne iwapari na hã. na hã. Imorĩ'rata na dama ipoto'rata ma, 're ihâimana za'ra mono zé, ma tô ĩwi waze. Ãhã na hã ma tô oto ĩwi waze, iwẽ aré ĩma 're ihâimana mono da hã. Ĩmama, e duré iwẽ hã ĩma ipisutuzéb da hã 'maihâimana õ di.
37Tawamhã Izaqui, ma te ãne asa sada'â:
Wa hã Zacoho ma, pire na aima 're ihâimana mono zéb da hã wa tô tãma pisutu pa. Duré uburé isisãnawã norĩ te te tãma 're romhuri za'ra mono da hã, wa tô tãma pisutu. Duré amnho na sa'ẽtẽ na te ãma 're upari u'âsi mono da hã, duré uwa 'rãi wa'u isé sa'ẽtẽ na te ãma 're upari u'âsi mono da hã, wa tô tãma pisutu. Tahawa ãhã na hã ĩ'ra, te ai'ãma irowaptẽrẽ da hã waihu'u õ di.
38Tane nherẽ, Ezau timama ma hã te nasi tãma si'ru ãne:
— Ĩmama, e tô misi haré te asimirowaptẽrẽzé iwẽ na hã tihâiba. Ma'ãpé ĩ'ãma zama 'Re ihâimana u'âsi mono ma hã aimreme, iwẽ hã te te tô ĩma 're apisutu mono da.
Ãne te te sina tãma nharĩ pari, ma tô wawa 'rãihâ na hã oto aiwa'õ, sina siwamri pese wa.
39Tawamhã imama te tãma tinha ãne:
“Romhâ na ti'ai wẽ nhiti te za 're aihâimana mo, atébré hâiwa hawi we te te 're irobdi'i mono nhiti.
40Ãhã wa, te za asi'wa i'wa pa ré si 're aihâimana mo. Asisãnawãi ma, te za duré 're iromhuri mo.
Tane nherẽ, niha na tãma aihâimanazéb da, sada asiptete õ wapsi hã, te za tiwi asiwaze, asima iwẽ na 're aihâimana mono da oto.”
Zaco, Mezopotãmia u imorĩzé wasu'u
41Tawamhã Ezau, Zacoho da ma tô ab'rui pese. E marĩ wa. Imama, 'Re ihâimana u'âsi mono ma, iwẽ õhõ ma si te te 're apisutu mono da, ãma mreme wa. Tahawa ma tô ãne sima rosa'rata: “Ĩmama dâ'âzé hã romhuture di oto. Te za tidâ'â su'u. Tawamhã nimahã na apâ wapo're simrami wa, wapẽ'ẽ hâza'õtõ wapsi, wa za ĩno hã tiwĩ za.”
42Tawamhã Rebeca, Ezau te te sima irowa'õtõzé ma tô tiwi waihu'u. Tahawa, Zacoho zô te sima sô hâ. Tawamhã te ãne tãma tinha:
— Te za ĩwapa! Adub'rada Ezau hã te sima rosa'rata, si'ruiwa'âbâ da, te te aiwĩrĩ da. 43Tahawa, ĩ'ra, ĩmreme hã te za iwapa. Ãhã na te za ai'aba'ré na aimo ĩhitébré Labã, Harã na 'ri nho'õmo nhisi ãma 're ihâimana mono nhorõwa u, 44tame a'â i'rata 're aihâimana mono da, niha bâtâ na adub'rada asada isiti'ruzé hã tãma isi'utõrĩzéb u, 45tãma asimi'manharĩzém na ãma ipo're si'ârizéb u. Ãhã wapsi, wa za ni'wa hã ãma asô satõ, we apâ ãwa te te asaprõni da hã. E tihai wa. Wa hã te ĩsima wẽ õ di, misi bâtâ na ĩ'ra norĩ te i'asimini aba da hã.
46Taha pari Rebeca, te Izaquihi u hã mo. Tawamhã te ãne tãma tinha:
— Ezau, hitita norĩ nhipi'õ maparane tãma 'maihâimana zahuré wa, ma tô ĩwĩ sina ro'wa'ré pese zahuré. Tahawa, Zacoho zama hitita norĩ nhipi'õ na mro wamhã, ĩdâ'â da si za oto, ĩnhimirosa'rada hã.
Atualmente Selecionado:
Zenezi 27: xavBP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc.All rights reserved.
