YOANO 5

1KUNYUMA kwa bintu bebi kwakadi kitula kia bena Yuda, yi Yisu akaximuna ku Yelusaleme. 2Ku Yelusaleme lolo, ku kibwelelu kia mikwakwa, kutani didiba diabikidibwa luna Ebeleo ene, Beteseda, didi yi tutanda tutano. 3-4Munda mwatu mwakalala kibumbu kia bena masama, bafofo, bena bitumbi, bena bikomo. 5Yi muntu akadi koku, akadi amatata yi kusama kwanci mbula masangi asatu yi mbula yenana. 6Pakamumona Yisu, ulele koku, yi akalubukwa ene, amasala noku kikondo kingi nkyekyu akamwambila ene, Owe wakyeba kupanda ? 7Muna kusama akamwambila ene, Mukyelengi, kiena yi muntu, papunyingixibwa mai, a kungwela mu didiba ; mo pandolwa meme, munga amangupwekyela buxi. 8Yisu akamwambila ene, Bika, ombulula bolelo bwebe, enda. 9Yi muntu akapanda ku nkyekyu you, yi akakwombulula bolelo bwanci, yi akakwenda ; yi ku dituku dedi kwakadi sabado.

10Mbwôsô bena Yuda bakatôyela you akapandixibwa ene, Lelo ndo sabado ; kakusolelekyela yi bwadi owe kwombulula bolelo bwebe.

11Yei akabapingasa ene, You apungupandisa apungutôyela mikyenci ene, Ombulula bolelo bwebe, enda.

12Bakamwapangusa ene, Ñani you muntu apukwambila ene, Ombulula bolelo bwebe, enda. 13Mo you akapandixibwa akadi kasolubukwa ndo ñani, bwalo bwakasokowa Yisu ku kimbukuma kiakadi mu kidi kieki.

14Kunyuma, Yisu akamusafiana mu tempelo, yi akamwambila ene, Mona, owe wamapanda ; kwoni kabidi ximbi bunga bwalo buxekuponena bwadika bobu bubi. 15Muntu you kaya yi akakwambila bena Yuda ene, Yisu ndo akamupandisa. 16Ndo biakakolomona bena Yuda Yisu, bwalo bwakakisayi bintu bebi ku sabado.

17Mo Yisu akabakulumuna ene, Tetemi encenca pôi nkyekyu, yi meme ngwencenca. 18Mbwôso ku bwalo bobu kwakadika bena Yuda kupalala kumuxipa, kumoni bwalo bwakalengolayi sabado butupu, kate bwalo bwakatôyayi kabidi ene, Ncembi udi Tetenci, akadielekyesa mikyenci yi Ncembi bileli. 19Mbwôso Yisu akapingasa yi akabambila ene, Sôsôlwo, sôsôlwo, nwambila ene, Mwana kabiyi kudiencela bwalo bwoso, butena bwalo bwamonayi Tete ubwakisa ; malo moso akisa yei, Mwana ndo akisa kabidi mo nako. 20Bwalo bwananga Tete Mwana, umwebesa malo moso encencayi mikyenci ; yi unamwebesa makisa anadika aa noku, binuxekama kama nonu. 21Byekyene biabisa Tete bafu, ubapapa môyo, bipapa Mwana bantu boso môyo bakyebayi. 22Bwalo butasosambola Tete muntu mwoso, kate amapa Mwana kusambola kwoso ; 23bixenemeka bungi bwa bantu Mwana, bea bianemekabo Tete. You utasonemeka Mwana kasonemeka Tete akamutuma.

24Sôsôlwo, sôsôlwo, nwatôyela ene, You ombombwa diyi diamene, yi amakwetabusa you akangutuma, udi yi môyo ă kô kô, yi kasolwa ku lopelo, kate amabatuka mu lufu ku môyo. 25Sôsôlwo, sôsôlwo, nwatôyela ene, ola ulolwa, udiko lolo, unakwombwa bafu diyi dia Mwana a Ncembi ; yt bobo bombombwa banakala yi môyo. 26Byekyene bidi Tete yi môyo munda mwanci, ndo biamapayi Mwana kabidi ndo kwakala yi môyo munda mwanci, 27yi amamupa bumanya bwa kusambola malo, bwalo budiyi Mwana a Muntu. 28Kanukamini diembi dedi, bwalo bulolwa ola unakwombwa diyi dienci bungi bwa bantu badi mu nkita, 29yi banabatuka ; bobo bamakwenca kunengela ku kwombuludibwa kwa môyo, vi bobo bamakwenca bubi ku kwombuludibwa kwa lopelo. 30Meme kibiyi kudiencela kintu kioso mikyemi ; bingwombombwa, ka bingwasambola ; yi kusambola kwamene kudi yi nkwami bwalo buntasopalala nyinga yamene, kate nyinga yenci ya you amangutuma. 31Aka meme ndiatôbôlela dia mikyemi, ntôbô yamene kayina sôsôlwo. 32Kudi munga muntu atôbôla ntôbô ku bwalo bwamene, yi namalubukwa ene, ntôbô yingwatobôlelayi ku bwalo bwamene idi sôsôlwo. 33Nonu nwakatuma kudi Yoano, yi yei amatôbôla ntôbô dia sôsôlwo. 34Kaninga meme kisoangata ntôbô kudi muntu, kate ngwatôya noku binuxepandixibwa nonu. 35Yei noku akadi mwinda ămalumuka yi ămateka obo, yi nonu nwakananga kuxekyelela obo anci kakondo kabende. 36Kaninga meme ndi yi ntôbô yamadika ntôbô ya Yoano ; makisa akampa Tete kumana, makisa mikyeo angwakisa, amangutôbôlela ntôbô ene, Tete akangutuma. 37Tete mikyenci lolo akangutuma, amangutôbôlela ntôbô. Nonu kanwombweli diyi dienci ku kikondo kioso, yi kanumonene mwocindu ănci. 38Yi kanuna yi diyi dienci dixikika munda mwenu, bwalo bunutasokwetabuxila you akatumayi.

39Nwatebela mu mikanda ya Ncembi, bwalo bunwakisa nonu ene, munda mwayo ndo munwakala yi môyo ă kô kô ; yei noku lolo idi bena ntôbô batôbôla ku bwalo bwamene. 40Yi kanunakwetabusa kulwa kundi binuxeakala yi môyo. 41Kisoangata kinemu kudi bantu, 42kate namanulubukwa ene, kanuna yi nyinga ya Ncembi munda mwenu. 43Meme namalwa ku dina dia Tetemi, yi kanusongwangata ; aka munga unalwa ku dina dienci mikyenci, you nunamwangata. 44Nonu nunalubukwa kwetabusa beci, bangatañana kinemu, yi kabasopalala kinemu kilolwa kudi Ncembi mutupu. 45Kanukixi ene, meme nakunusanya kudi Tete ; umoumwe udiko unwasanya, isanga Mosese unwamadingila nonu. 46Ximbi nwamakwetabusa Mosese nuxengwetabusa meme, bwalo bwakafundayi ku bwaio bwamene. 47Kaninga ndo kanusokwetabusa mikanda yenci, nunakwetabusa meyi amene beci ?

Atualmente Selecionado:

YOANO 5: Luna_NT

Destaque

Copiar