YOANO 4

1PAKALUBUKWA Fumu lolo mwakakwombwa baFalixi ene, Yisu adika Yoano yi kweyesa yi kunumeya beyi, 2(kaninga Yisu akadi kasonumeya mikyenci, kate beyi banci), 3akaxiya Yudiya yi akancuka kuya kabidi ku Ngalili. 4Yi akadi yi dibambu dia kudika mu Samalia. 5Akalwa lolo ku bula bwa Samalia bwabikidibwa ene, Sukala, pepe yi mbata akapa Yakobo mwananci Yosefe. 6Yi mpokolo a Yakobo akadi koku ; mbwôso Yisu akadi yi bokôkô bwalo bwa lwendo lwanci, akaxikama nako ku mpokolo. Kwakadi pepe yi ola amusambomo.

7Mwamukaxi akalwa, muna Samalia, kulwa suna mai ; Yisu akamwambila ene, Mpi mai a kunwa. 8Bwalo bwakamaya beyi banci ku bula kuya ola bidya. 9Mwamukaxi a Samalia akamutôyela lolo ene, Owe muna Yuda ungwalombela mai beci ? udi mwamukaxi a Samalia ; bwalo butasoputolañana bena Yuda yi bena Samalia. 10Yisu akapingasa yi akamwambila ene, Ximbi wamalubukwa dilongi dia Ncembi yi you amakutôyela ene, Mpi mai a kunwa, owe uxemulomba, yi yei uxekupa mai a môyo. 11Mwamukaxi akamwambila ene, Mukyelengi, kuna yi kintu kia kusuna yinakio, yi mai adi kulekule twakô ; mbwôso owe wapwangata mai aa a môyo ku kidi kai ? 12Owe wamadika tetecu Yakobo bunene, akatupa mpokolo, yi akanwa momu mikyenci yi bana banci yi bibôbô bienci ? 13Yisu akapingasa, akamwambila ene, Muntu mwoso unonwa mai aa noku unakwombwa nyota kabidi ; 14kaninga muntu mwoso unonwa mai anamupa, kanakwombwa kabidi nyota nyô ; kate mai anamupa analwa munda mwanci mpokolo a mai, amatamba tamba ku môyo ă kô kô. 15Mwamukaxi akamwambila ene, Mukyelengi, mpi mai aa, bintasokwombwa nyota, bintasolwa kunu kulwa suna mai. 16Yisu akamwambila ene, Yaka ya bikili bayebe, nunalwa kunu. 17Mwamukaxi akamupingasa ene, Kiena yi bayami. Yisu akamwambila ene, Waputôya sôsolwo ene, Kiena yi mwamulumi ku bayami. 18Bwalo bwakadi yi babalumi batano, yi you apwangata nkyekyu kiena bayebe ; nako waputôya sôsôlwo. 19Mwamukaxi akamwambila ene, Mukyelengi, ngwamona owe udi mudimuxi. 20Batetecu bakaxingila ku lupongo lolu, yi nonu nwatôya ene, Munda mwa Yelusaleme mudi kidi kixexingila muntu. 21Yisu akamwambila ene, Mwamukaxi, ungwetabusi, ola ulu kulwa ununaxingila Tete kumoni ndo ku lupongo lolu, ndo ku Yelusaleme. 22Nonu nwaxingila kinutabiyi ; coco twaxingila kitubili, bwalo bulolwa kipandilu kia môyo kudi bena Yuda. 23Kaninga ola ulolwa, udiko lolo, unaxingila Tete baxingidi ba sôsôlwo ku mwoxixi yi ku sôsôlwo ; bwalo bwapalala lolo Tete bantu ba noku ndo kwakala baxingidi banci. 24Ncembi udi Mwoxixi, yi bobo bamwaxingila baxemuxingila ku mwoxixi yi ku sôsôlwo. 25Mwamukaxi akamwambila ene, Ngwalubukwa ene, Mesiya ulolwa, abikidibwa ene, Kalistu ; panakala yei amalwa, unatwambila malo moso. 26Yisu akamwambila ene, Meme kayou, atôya yinebe.

27Ku kikondo kieki kwakalwa beyi banci, yi bakakama bwalo bwakatoyayi yi mwamukaxi, kaninga kakwakadi muntu amatôya ene, Wapalala kai ? ndo ene, Kukai wamakwambilañana yinanci ? 28Mwamukaxi lolo akaxiya dibungu dienci yi akaya ku bula ; yi akatôyela babalumi ene, 29Nulwi mona muntu amangwambila malo moso anamakwenca, ki yei ndo Kalistu ? 30Bakancuka lolo ku bula, yi bakadi mu kulwa kudiyi.

31Kaninga beyi bakalwa papo kulwa mwapangusa ene, Labi, dyaka. 32Mo yei akabambila ene, Meme ndi yi bidya bia kudya binutabiyi nonu. 33Mbwôsô beyi bakatôyelañana ene, Ape muntu apumucwadila kintu kioso kia kudya ? 34Yisu akabambila ene, Bidya biamene bidi ndo kukisa nyinga yenci ya you amangutuma, yi kumana mudimo ănci. 35Ka nonu nwatôya ene, Ngondo yikidi inai ; kunyuma kunalwa kikondo kia kibukilu ? Mona meme nwatôyela ene, Nusangoli meso, numoni bibidi, bwalo budibio lowa isanga nkyekyu kubuka. 36You abuka kangata difuto, kakokyeya muxekye ku môyo ă kô kô, bixexekyelelañana you akuna yi you abuka. 37Mo nako, diyi didi sôsôlwo, ene, Muntu umoumwe ndo akuna, munga ndo abuka. 38Meme nakanutuma kuya buka kunwakadi kanusokwenca mudimo ; banga bamakwenca mudimo yi nonu nwamabwela ku mudimo ăbo.

39Mo bena Samalia bangi ba ku bula bobu bakamwetabuxila bwalo bwa diyi dia mwamukaxi akatôbôla ntôbô ene, Akangwambila malo moso anamakwenca. 40Mbwôso pakalwa bena Samalia kudiyi, bakamulomba asali yinabo, yi akasala koku matuku abidi. 41Yi banga bakakwetabusa bangi bangi bwalo bwa diyi dienci, 42yi bakakwambila mwamukaxi ene, Kumoni kabidi ku bwalo bwa kutôya kwebe ndo kutwapwetabusa, bwalo butwamamwombwa mikyecu, yi twalubukwa ene, you udi Mupandixi a loboko sôsôlwo. 43Mo kunyuma kwa matuku abidi aa, kwakabatukayi koku kuya ku Ngalili, 44bwalo bwakatôbôla Yisu mikyenci ntôbô ene, Mudimuxi kiena yi nkumbu mu mbata anci mikyenci. 45Mbwôso pakalwayi ku Ngalili, bena Ngalili bakamwangata bwalo bwakamonabo bintu bioso biakakwencayi mu Yelusaleme ku kitula, bwalo bwakayabo kabidi ku kitula.

46Ndo biakalwayi kabidi ku Kana a Ngalili, kwakakulumunayi mai ku finyo. Koku kwakadi muna kikupu, akadi yi mwananci yi kusama ku Kapenaumu. 47Yei pakakwombwayi ene, Yisu amancuka mu Yudiya kulwa ku Ngalili, akaya kudiyi yi akalomba ene, apwekipo kulwa pandisa mwananci, bwalo bwakadiyi pepe yi kufwa. 48Biakamutôyela Yisu ene, Kutena nwamona bilayixilu yi bikamakama, kanunakwetabusa pô. 49Muna kikupu akamwambila ene, Mukyelengi, pwekapo buxi bunafwa mwanami. 50Yisu akamwambila ene, Yaka ; mwanebe udi yi môyo. Yi muntu akakwetabusa diyi diakamutôyela Yisu, yi akaya mu ncila anci. 51Mo pakadi ukiapweka, basadi banci bakapomanañana yinanci bamamucwadila diyi ene, Mwanebe udi yi môyo. 52Mbwôso akabapanguxila pa ola akancincilayi. Yi bakamwambila ene, Mankyelo ku ola a sambwali ndo kwakamuncuka mudilu. 53Tetenci lolo akalubukwa ene, kwakadi ola you akamwambila Yisu ene, Mwanebe udi yi môyo, yi mikyenci akakwetabusa yi nkumbu anci bungi bwabo. 54Kilayixilu kieki kabidi kiamubidi ndo kiakakwenca Yisu, pakadi amalwa mu Yudiya kulwa ku Ngalili.

Atualmente Selecionado:

YOANO 4: Luna_NT

Destaque

Copiar