YOANO 16

1NAMANWAMBILA malo aa, binutaxeponexebwa. 2Bananwela bixingidilu ixongo ; ya, ola ulolwa unakala muntu mwoso unwaxipa nonu unakisa ene, utanasadila Ncembi. 3Yi banakwenca bintu bebi bwalo butalubukwabo ndo Tete ndo meme. 4Kate namanwambila bintu bebi, binuxebiela nkanyi, palolwa ola abio, munakanwambila. Kaninga kinwambidili bintu bebi pôi bubangabanga, bwalo bunakadi yinenu. 5Mo nkyekyu ntanaya kudiyi akangutuma, yi kakuna muntu yinenu amangwapangusa ene, Kuyeya kudi kupai ? 6Kate bwalo bunapunwambila bintu bebi, buxitu bwamakwolubisa mucima ěnu. 7Kaninga meme napunwambila sôsôlwo ene, Kudi loko ku bwalo bwenu, meme kuncuka ; akali meme kisoya, Musamunini kanalwa kunudi ; kaninga meme ndo nakuya, nakumutuma kunudi. 8Panakala yei amalwa, unatongola loboko dia kwona, yi dia nkwami, yi dia lopelo ; 9dia kwona, bwalo butasongwetabuxilabo ; 10dia nkwami, bwalo bungwancuka kuya kudi Tetemi, yi kanusongumona kabidi ; 11dia lopelo, bwalo bwamabelebwa fumu a loboko lolu.

12Nkidi yi bintu bingi kunwambila, kate kanuoponyañana yi kwombwa nkyekyu. 13Kaninga panakala yei apulwa, Mwoxixi a sôsôlwo, unanuxiya xiya mu sôsôlwo mwoso ; kanaditôyela bienci kanana, kate bwalo bwoso bunakwombwayi ndo bunatôyayi ; yi unanwebesa bwalo bwa bintu bilolwa. 14Yei unangutumbisa, bwalo bunangatayi ku bintu biamene, yi unanwebesabio. 15Bintu bioso biapwangata Tete bidi ndo biamene ; ndo binaputôya ene, yei unangata biamene, yi unanwambilabio. 16Mo kakondo kabende yi nonu kanusongumona ; kakondo kabidi kabende yi nunangumona.

17Banga beyi banci lolo bakatôyañana ene, Diyi kai dedi ditwambilayi ene, Kakondo kabende, yi kanusongumona ; kabidi lolo ene, Kakondo kabende yi nunangumona ; yi ene, Bwalo buntanaya kudi Tete ? 18Biakatôyabo ene, Diyi kai diatôyayi dia kakondo kabende ? Katubiyi diatôyayi. 19Yisu akabalubukwa bamananga kumwapangusa, yi akabambila ene, Nonu nutanakwapangusañana dinaputôya ene, Mo kakondo kabende, yi kanusongumona, yi kakondo kabende kabidi, yi nunangumona ? 20Sôsôlwo, sôsôlwo, nwambila ene, nunancula masonci yi nunadila nonu, mo loboko lunaxekyeleia ; yi nonu nunakwombwa buxitu ; kate buxitu bwenu bunakulumunibwa ku kiango. 21Mwamukaxi, oka alela udi yi buxitu bwalo bwapulwa kikondo kienci ; kaninga papulelebwa kana, kasokwela kabidi kusama lukanyi bwalo bwa kiango kia muntu amalelebwa ku loboko. 22Mbwôso nonu nkyekyu nudi yi buxitu ; mo nakunumona kabidi, yi mucima ěnu unaxekyelela, yi kiango kienu,— muntu kasokincula kunudi. 23Yi ku diba dedi kunakala kanunangwapangusa kintu kioso. Sôsôlwo, sôsôlwo, nwambila ene, Aka nunalomba kintu kioso kudi Tete, unanupakio ku dina diamene. 24Pôi nkyekyu kanwalomba kintu kioso ku dina diamene ; nulombi yi nunangata, bixekukanana kiango kienu.

25Namanwambila bintu bebi ku miele ; ola ulolwa untasonwambila kabidi ku miele, kate nakunusakolela dyendeli dia Tete. 26Ku dituku dedi nunalomba ku dina diamene ; yi meme kisonwambila ene, meme nakunwapanguxila kudi Tete, 27bwalo bwamanunanga Tete mikyenci, bwalo bunwamangunanga meme, yi nwamakwetabusa ene, meme nakabatuka kudi Tete. 28Nakabatuka kudi Tete, yi namalwa ku loboko ; ngwaxiya kabidi loboko yi ntanaya kudi Tete. 29Beyi banci bakamwambila ene, Mona, nkyekyu wamasakola loko, kusotôya mwele pô. 30Nkyekyu twalubukwa ene, Owe ubili bintu bioso, yi kusokwabila muntu mwoso akwapangusi. Nako twamakwetabusa ene, wakabatuka kudi Ncembi. 31Yisu akabapingasa ene, Nwamakwetabusa nkyekyu ? 32Mona, ola utanalwa,—apulwa nkyekyu,—ununacakana, muntu kwanci, muntu kwanci, yi nunanguxiya mikyemi mutupu ; kaninga kiena mutupu, bwalo budi Tete yinami. 33Namanwambila malo aa binuxeakala yi polo munda mwamene. Ku loboko nunakala yi mpeya ; mo nukolesi micima yenu ; meme namapidila loboko.

Atualmente Selecionado:

YOANO 16: Luna_NT

Destaque

Copiar