YOANO 15

1MEME ndi muci ă finyo ă sôsôlwo, yi Tetemi udi munami. 2Ditamba dioso munda mwamene ditasokama mamoma, yei udiancula ; yi ditamba dioso diamakama mamoma, yei udiakupulula bixekamadio amo mamoma. 3Nonu nudi susu nkyekyu bwalo bwa diyi dinamanutôyela. 4Nusali munda mwamene, yi meme munda mwenu. Bea bitabiyi ditamba kudikamina mamoma mikyedio kutena diamasala mu muci ă finyo, ndo binutabiyi nonu kabidi, kutena nwamasala munda mwamene. 5Meme ndi muci ă finyo, nonu nudi matamba. You amasala munda mwamene, yi meme munda mwanci, kayou akamañana mamoma mangi, bwalo bunutabiyi kwenca kintu kioso kutena meme. 6Aka muntu kasosala munda mwamene, amakwelebwa mutu luna ditamba, amakwoma ; bantu lolo basangisa yi belela mu mudilu, yi alolwa kwoxebwa. 7Aka nwamasala munda mwamene yi meyi amene amasala munda mwenu, nulombi mwoso munwananga yi munanukixidibwa. 8Nako kwamatumbixibwa Tetemi, nonu kukama mamoma mangi, yi nunakala beyi bamene.

9Bea biamangunanga Tete ndo binamanunanga kabidi ; nusali mu nyinga yamene. 10Ndo nunanama milangu yamene, nunasala mu nyinga yamene ; bea binamanama milangu ya Tetemi, yi ngwasala mu nyinga i yenci. 11Namanwambila malo aa bixeakala kiango kiamene munda mwenu, yi bixekukixibwa kiango kienu. 12Kunu kudi mulangu ămene, ene, nunanganani bea binamanunanga. 13Muntu kienako udi yi nyinga yadika yei wungi, muntu kuladika môyo ănci ku micwe ya bimbila bienci. 14Nonu nudi bimbila biamene ndo nwencenca bintu binwalanga meme. 15Kisonubikila basadi kabidi nyô, bwalo butasolubukwa musadi biencenca fumwanci ; kaninga namanubikila bimbila, bwalo bwa malo moso anamakwombwa kudi Tetemi, namanulubukisao. 16Nonu nwakadi kanusongusungula meme, kate meme nakanusungula nonu, yi nakanuteka nonu binuxeya kama mamoma mangi, yi bixesala mamoma enu ; kintu kioso lolo kinuxelomba Tete ku dina diamene, uxenupakio.

17Meme nwalanga malo aa binuxenangañana. 18Ndo loboko lunwanyañana, nwalubukwa ene, lwakangunyañana buxi bwenu. 19Ximbi nwapwakala bena loboko, loboko luxenanga bantu banci ; kaninga bwalo bunutena bena loboko, kate meme namanusungula mu loboko, ndo bwamanunyañana loboko. 20Nweli diyi nkanyi dinakanwambila ene, Musadi kasodika fumwanci bunene. Ndo bamangukolomona bananukolomona kabidi ; ndo bamanama diyi diamene, bañanama dienu kabidi. 21Kate bananwencela bintu bioso bebi noku, ku mucwe ă dina diamene, bwalo butasolubukwabo you akangutuma. 22Kutena namafwa bambila, kabaxeakala yi kwona ; kaninga nkyekyu kabena yi kisokokyelu kia kwona kwabo.

23You ungwanyañana anyañana kabidi Tetemi. 24Kutena namakwenca makisa kudibo atakwenca munga muntu nyô, kabaxeakala yi kwona ; kaninga nkyekyu bamamona yi bamanyañana yi meme yi Tetemi. 25Kate bixefikixibwa diyi diakafundibwa ku bwadi bwabo, ene, Bakangunyañana kutena bwalo. 26Kaninga binakala Musamunini amalwa, unatuma kunudi kudi Tete, Mwoxixi a sôsôlwo, abatuka kudi Tete, yei unangutôbôlela ntôbô ; 27yi nonu kabidi nwatôbôla ntôbô, bwalo bunwamasala yinami pôi bubangabanga.

Atualmente Selecionado:

YOANO 15: Luna_NT

Destaque

Copiar