YOANO 17

1MALO aa ndo akatôya Yisu, akasangola meso anci lwa diulu yi akatôya, ene, Tete, ola apufika ; tumbisa Mwanebe, bixekutumbisa Mwanebe ; 2bea biamamupa bumanya kulu kwa munyu mwoso, api bantu boso môyo bakamupa Owe, ă kô kô. 3Yi kunu kudi môyo ă kô kô, bobo kukulubukwa Ncembi umoumwe a sôsôlwo, yi Yisu Kalistu akatuma Owe. 4Meme namakutumbisa paxi, bwalo bunamamana mudimo ăkangupa Owe kukisa. 5Nkyekyu lolo, Tete, ungutumbisi yinebe mikyebe yi dikai dinakadi yinadio yinebe buxi bwakadi loboko kalunako. 6Namakwebesa bantu dina diebe bakangupa Owe mu loboko. Bakadi bebe, yi wakangupabo, yi bamanama diyi diebe. 7Nkyekyu bamalubukwa ene, bintu bioso biakangupa Owe biamalwa kudi ; 8bwalo bwa mambi akangupa Owe, meme namabapao, yi bobo bamangata, yi bamalubukwa sôsôlwo ene, nakabatuka kudi ; yi bamakwetabusa ene, Owe wakangutuma. 9Ngwapangusa ku bwalo bwabo ; kisokwapangusa bwalo bwa loboko, kate walo bwabo bwa bantu bamangupa Owe ; bwalo budibo bantu bebe, 10yi bintu bioso bidi biamene bidi ndo biebe, yi biebe bidi biamene, yi meme namatumbixibwa munda mwabo. 11Meme lolo kisoakala ku loboko kabidi nyô, mo baba badi ku loboko, yi meme ndolwa kudi. Tete a babala, ubanami ku dina diebe diamangupa Owe, bakali umoumwe bea bitudi. 12Panakadi yinabo, meme nakabanama ku dina diebe bakangupa Owe ; meme namabasamunina, yi kakusoncimina muntu abo umoumwe kutena you mwana a buncimini, bixefikixibwa mukanda ă Ncembi. 13Nkyekyu lolo ndolwa kudi ; yi naputôya bintu bebi ku loboko, bixeakalabo yi kiango kiamene kiamakukanana munda mwabo tô. 14Meme namabapa diyi diebe, yi loboko lwamabanyañana bwalo butasoakalabo bena loboko, bea bintasoakala meme muna loboko. 15Kisokwapangusa ene, ubanculi ku loboko, kate ene, ubanamuni ku bubi. 16Bobo kabena bena loboko bea bintasoakala meme muna loboko. 17Ubabaloli ku sôsôlwo ebe ; diyi diebe didi sôsôlwo. 18Bea biakangutuma meme ku loboko, ndo binamabatuma ku loboko. 19Yi ku bwalo bwabo ndo kundiabalola mikyemi bixebalolebwabo bobo kabidi ku sôsôlwo.

20Kisokwapangusa bwalo bwabo butupu, kate ku bwalo bwa bantu bangwetabuxila ku diyi diabo ; 21bixeakalabo umoumwe bungi bwabo, bea bidi Owe Tete munda mwamene, yi meme munda mwebe, bixeakalabo umoumwe kabidi munda mwecu ; bixekwetabusa loboko ene, Owe wakangutuma. 22Yi dikai diakangupa Owe, meme namabapadio, bixeakalabo umoumwe bea bitudi umoumwe ; 23meme munda mwabo, yi Owe munda mwamene, bixelundixibwabo umoumwe, bixelubukwa loboko ene, Owe wakangutuma, yi ene, Owe wamabananga bea biamangunanga.

24Tete, bwalo bwabo bwa bantu bamangupa Owe, ngwakyeba ene, ku kidi kingwakala mikyemi, bobo kabidi baxeakala koku yinami, bixemonabo dikai diamene diamangupa Owe, bwalo bwakangunanga buxi bwa kibangolelu kia loboko.

25Tete a nkwami, loboko kalwakulubukwa, mo meme nakakulubukwa ; yi bantu baba bakalubukwa ene, Owe wakangutuma. 26Namabalubukisa lolo dina diebe, yi nakubalubukisadio ; bixeakala nyinga munda mwabo yamangunanga Owe yinayo, yi meme munda mwabo.

Atualmente Selecionado:

YOANO 17: Luna_NT

Destaque

Copiar