YOANO 13

1MO buxi bwa kitula kia Kidikixilu Yisu akalubukwa ene, kikondo kienci kiamafika kixencukayi mu loboko kuya kudi Tete,—bwalo bwakanangayi bantu banci bakadi ku loboko, akabananga dyendeli pôi ku sula.

2Pa kitula, pakadi diabolo diamateka lukanyi nkyekyu mu mucima ă Yudaxi a Ximono, muna Ixikalioto, lwa kumwenga,— 3Yisu lolo akalubukwa ene, Tete akalonga bintu bioso ku makaci anci, yi ene lolo, amabatuka kwa Ncembi yi uyeya kwa Ncembi,— 4akakwombuluka ku kitula, akakwekyeya binkutu bienci, akangata kitambala yi akadidinga yinakio. 5Kunyuma kwakakwelayi mai mu dilonga dinene, yi akabanga kwowesa makasa a beyi mai, yi kwakupulula yi kitambala kiakadingibwayi yinakio. 6Akalwa lolo kudi Ximono Pita. Yei akamwambila ene, Fumu, Owe wakusula makasa amene ? 7Yisu akapingasa yi akamwambila ene, Mungwencenca, owe kusolubukwa nkyekyu, mo unalubukwa kunyuma. 8Pita akamwambila ene, Kunakusula makasa amene pô. Yisu akamupingasa ene, Ndo meme kisokukusula, kuna yinami bwalo bumobumwe. 9Ximono Pita akamwambila ene, Fumu, kumoni ku makasa kutupu, kate ku makaci amene kabidi yi ku mucwe ămene. 10Yisu akamwambila ene, You amakwowa mai dyendeli kiena yi bwalo butena bwa kukusula makasa anci, kate udi susu bya ; yi nonu nudi susu, kate bungi bwenu kumoni. 11Bwalo bwakalubukwayi uxemwenga ñani ; ndo biakatôyayi ene, Kanusoakala susu bungi bwenu.

12Mbwôso pakadi amakusula makasa abo, yi amangata binkutu bienci, yi amaxikama kabidi, akabambila ene, Nwalubukwa munapunwencela ? 13Nonu nungwabikila ene, Mweyexi yi Fumu, yi nwatôya loko, bwalo bundi noku. 14Ndo meme lolo, Fumu yi Mweyexi, amakusula makasa enu, nonu kabidi nuxekusulañana makasa enu, 15bwalo bunapunuxiyila lwedi, binuxekwenca nonu kabidi bea binapunwencela. 16Sôsôlwo, sôsôlwo, nwatôyela ene, musadi kasodika fumwanci munene ; mutumibwi lolo kasodika you munene amamutuma. 17Ndo nwalubukwa bintu bebi, balwangwasanibwi nonu aka nubiakisa. 18Kisotôya bwalo bwa bungi bwenu ; meme mbili bantu banakasungula ; kate bixefikixibwa diyi dia mukanda ă Ncembi ene, You udedya bidya yinami apungwombuludila dincinci dienci. 19Pôi nkyekyu meme nwambila buxi butalulidio, binuxekwetabusa palolwadio, ene, meme ndi you. 20Sôsôlwo, sôsôlwo, nwatôyela ene, you amangata muntu mwoso ungwatuma, amangwangata meme ; yi you ungwangata meme amangata you akangutuma.

21Pakamanayi bintu bebi kutôya, Yisu akadi yi buxitu ku mucima, yi akatôbôla yi akatôya ene, Sôsôlwo, sôsôlwo, nwambila ene, Muntu enu umoumwe unangwenga. 22Beyi bakatebelañana, bakadi yi mbata bwalo bwa muntu akatôyelayi. 23Ku mesa lolo kwakadi mweyi anci umoumwe mu kiedi kia Yisu, akananga Yisu. 24Biakamusongela Ximono Pita kianca yi akamwambila ene, Apangusa dia nani diamatôyayi. 25Yei pako akakwengama nako ku kiedi kia Yisu akamwambila ene, Fumu, ñani you ? 26Yisu akapingasa ene, You noku ndo yei unamupa kicini, binamakitopesa. Yi pakadi amatopesa kicini, akakiangata yi akakipela Yudaxi a Ximono, muna Ixikalioto. 27Kunyuma kwa kicini, kwakabwela Satana munda mwanci. Biakamwambila Yisu ene, Bwalo bwencenca, ubwenci mangwoso. 28Kaninga ku mesa kakwakadi muntu umoumwe amalubukwa bwalo bwakamutôyelayi noku. 29Banga bakakisa ene, bwalo bwakadi Yudaxi yi mwosokye, ambeci Yisu amamwambiia ene, Ola bintu bituxeakala yinabio ku kitula ; sungu ambeci uxepela bakombi kintu. 30Yei pako, biakangatayi kicini, akaya kunci mangwoso ; yi kwakadi butuku.

31Mbwôso pakadi amabatuka, Yisu ene, Nkyekyu Mwana a Muntu amatumbixibwa, yi Ncembi amatumbixibwa munda mwanci. 32Ndo Ncembi amatumbixibwa munda mwanci, Ncembi unamutumbisa munda mwanci mikyenci, yi unamutumbisa nkyekyu nkyekyu. 33Bana, nkiasala yinenu mo kakondo kabende. Nonu nunangupalala ; yi bea binakakwambila bena Yuda ene, Kunceya, nonu kanubiyi kulwa, ndo binwambila nkyekyu nonu kabidi. 34Meme nupapa mulangu mupyamupya, ene, nunanganani ; byekyene binamanunanga, binuxenangañana kabidi. 35Nako bantu boso banalembetela ene, nudi beyi bamene ndo nwanangañana nyinga. 36Ximono Pita akamwambila ene, Fumu, kuyeya kudi kupai ? Yisu akamupingasa ene, Kunceya, owe kubiyi kungulandudila nkyekyu, kaninga unangulandudila kunyuma. 37Pita akamwambila ene, Fumu, ku bwalo kai meme kibiyi kukulandudila nkyekyu ? Nakukuladikila môyo ămene. 38Yisu ene, Unanguladikila môyo ěbe ? Sôsôlwo, sôsôlwo, nkwatôyela ene, Ntala kanakwela diyi buxi bunakala wamangunyañana manyafiana asatu.

Atualmente Selecionado:

YOANO 13: Luna_NT

Destaque

Copiar