YOANO 11

1KWAKADI lolo muntu amatata kusama, Lasalusu a ku Betani ; muna bula bwa Mali yi Mata mukulwanci. 2You ndo Mali akaxinga Fumu manyi a ncobo, akakupulula makasa anci yi nyonyi yenci, akadi yi mukulwanci Lasalusu muna kusama. 3Mbwôso bangasananci bakatuma kudiyi ene, Fumu, you ananga Owe udi yi kusama. 4Mo pakakwombwa Yisu, yei ene, Kusama koku kakuna pa lufu, kate bwalo bwa kinemu kia Ncembi, bixetumbixibwa Mwana a Ncembi kudiku. 5Yisu lolo akananga Mata, yi mwakunyenci, yi Lasalusu.

6Mbwôso pakakwombwayi ene, Udi yi kusama, akasala matuku abidi ku kikondo kieki ku kidi kiakadiyi. 7Kunyuma lolo kwakatôyelayi beyi banci ene, Cuyi ku Yudiya kabidi. 8Beyi bakamwambila ene, Labi, mo nkyekyu bena Yuda bamapalala kukuxipa mabwe ; uyeya koku kabidi ? 9Yisu akapingasa ene, Ki ku munyinya kudi ola disangi yi ibidi ? Aka muntu endenda ku munyinya, kasopuma diya, bwalo bwamamonayi obo a loboko lolu. 10Kaninga ndo muntu endenda ku butuku, amapuma diya, bwalo butasoakala obo munda mwanci. 11Malo aa noku ndo akatôyayi ; yi kunyuma akabambila ene, Lasalusu, kimbila kiecu, amalala tulu ; kate nceya kuya mubisa mu tulu. 12Biakamwambila beyi ene, Fumu, ndo amalala tulu, unapanda môyo. 13Yisu pako akatôya dia lufu lwanci ; kaninga bobo bakakisa ene, amatôya dia kwomowa mu tulu. 14Biakabasakolela Yisu dyendeli ene, Lasalusu amafwa. 15Ngwaxekyelela ku bwalo bwenu bwalo buntakadi koku, binuxekwetabusa. Kaninga cuyi kudiyi. 16Mbwôso Tomasa, abikilabo ene, Didimusu, akatôyela beyi, bena kwanci, ene, Coco cuyi kabidi, tufwi yinanci.

17Yisu lolo, pakafikayi, akamusañana amalala nkyekyu mu lukita matuku anai. 18Ku Betani pako kwakadi pepe yi Yelusaleme, ambeci “ stadia ” disangi yi itano, 19yi bena Yuda bangi bakalwa kudi Mata yi Mali kulwa basambanina bwalo bwa ngasanabo. 20Mata lolo pakakwombwayi ene, Yisu utanalwa, akaya pomana yinanci ; kaninga Mali akaxikama mu ncibo. 21Mbwôso Mata akakwambila Yisu ene, Fumu, ximbi Owe wakakala kunu, ngasanami kaxefwa. 22Kate isanga nkyekyu, ngwalubukwa ene, kintu kiosô kinalomba Owe kudi Ncembi, Ncembi unakupakio. 23Yisu akamwambila ene, Ngasanebe unabika kabidi. 24Mata akamwambila ene, Ngwalubukwa ene, unabika kabidi ku kwombuluka kwa bafu, ku diba dia ku sula. 25Yisu akamwambila ene, Meme ndi kwombuluka kwa bafu, yi meme ndi môyo ; you amangwetabuxila meme, isanga uxefwa unakala yi môyo ; 26yi muntu mwoso utani yi môyo yi amangwetabuxila meme, kanafwa pô. Owe wapwetabusa noku ? 27Yei akamwambila ene, E, Fumu ; meme namakwetabusa ene, Owe udi Kalistu, Mwana a Ncembi, uxelwa ku loboko. 28Pakadi amatôya noku, akaya yi akabikila mwakunyenci Mali ku Dusoko, ene, Mweyexi apulwa, ukwabikila.

29Yei, pakakwombwayi noku, akakwemana mangwoso yi akalwa kudiyi. 30Mo Yisu akadi ukidi kaluli munda mwa bula, kate akadi ku kidi kiakalwa Mata kulwa pomana yinanci. 31Mbwôso bena Yuda bakadi yinanci mu ncibo badi mu kumusambanina, pakamonabo Mali amakwemana mangwoso, amaya kunci, bakamulanda, bakakisa ene, Uyeya ku lukita kuya dila koku. 32Mali lolo, pakalwayi kwakadi Yisu, yi pakamumonayi, akapona ku makasa anci yi akamwambila ene, Fumu, ximbi Owe wakakala kunu, ngasanami kaxefwa. 33Mbwôso pakamumona Yisu udi mu kudila, yi bena Yuda bakalwa yinanci badi mu kudila, akakabana kungi ku mucima ănci, yi akadixenga, yi akatôya ene, Kunwamamuteka kudi kupai ? 34Bakamwambila ene, Fumu, Iwaka lwa moni. 35Yisu akadila masonci.

36Mbwôso bena Yuda ene, Mona mwakamunangayi. 37Mo banga babo bakatôya ene, You muntu akalubukwa kudipula meso a bafofo, kiena akalubukwa kabidi kuximba muntu you, kafwi ? 38Yisu lolo akadi mu kukabana kungi munda mwanci kabidi, akalwa ku lukita. Lwakadi dina mu lubyenga yi dibwe diakakala padidio. 39Yisu ene, Nunculi dibwe. Mata mufu ngasananci, akamwambila ene, Fumu, utani nkyekyu mukufu, bwalo bwapwakalayi koku matuku anai. 40Yisu akamwambila ene, Ki napukwambila ene, Aka owe unakwetabusa unamona dikai dia Ncembi ? 41Biakanculabo dibwe. Yi Yisu akasangola meso anci kulu, yi akatôya ene, Tete, nkwaxinga, bwalo bwapungwombwa. 42Yi namalubukwa ene, ungwombombwa matuku moso ; kate ku bwaio bwa kimbukuma kunu ndo kunaputôya, bixekwetabusabo ene, Owe wakangutuma. 43Pakadi amatôya nako, akakwamena yi diyi dikola ene, Lasalusu, lwaka kunci. 44Mufu lolo akabatuka kunci, musuka makasa yi makaci yi mbuxa ya lukita, yi mpala anci akadingibwa kitambala. Yisu akabambila ene, Numusuli, numulekyeli.

45Mbwôso bantu bangi ba bena Yuda bakadi bamalwa kudi Mali, biakamonabo mwakakwencayi, bakamwetabuxila ; 46kaninga banga babo bakaya kudi baFalaxi, bakabambila biakakwenca Yisu. 47Makanda manene lolo yi baFalixi bakakokyeya kikokye yi bakatôya ene, Twenci beci ? bwalo bwencenca muntu you bilayixilu bingi. 48Ndo tunamulekyela noku, bantu boso banamwetabuxila, yi bena Loma banalwa ncula kidi kiecu yi bubila bwecu. 49Kaninga muntu abo umoumwe, Kayafa, akadi bokanda bunene ku mbula you, akabambila ene, Nonu kanusolubukwa pô, 50kanusokwela lukanyi ene, kudi loko ku bwalo bwenu, muntu umoumwe uxefwa ku bwalo bwa bantu baba, bitaxepya bubila buncimancima. 51Kaninga akadi kasoditôyela bienci ; kate bwalo bwakakalayi bokanda bunene ku mbula you, akabadimusa ene, Yisu uxefwa ku bwalo bwa bubila bobu ; 52yi kumoni ku bwalo bwa bubila bobu butupu, kate bixekokyeyayi kabidi bana ba Ncembi kibumbu kimokimwe bamacakana ca. 53Mbwôso pôi dituku dedi pakakwelañanabo nkanyi bixemuxipabo. 54Biakadi Yisu kasokwenda kabidi kunci kudi bena Yuda, kate akancuka koku ku mbata pepe yi mbata a kisobe, ku bula bwabikilabo ene, Efelaimi, yi akakala koku yi beyi banci.

55Mo Kidikixilu kia bena Yuda kiakadi pepe, yi bantu bangi bakaximuna ku Yelusaleme bamalwa mu mbata, buxi bwa Kidikixilu, bixedikusulabo mikyeabo. 56Mbwôso bakapalala Yisu yi bakatôyelañana pakakwemanabo mu tempeio ene, Nwakanyakanya beci ? yei kanalwa ku kituia ? 57Yi makanda manene yi baFalixi bakadi bamalanga mulangu ene, Aka muntu mwoso amamulubukwa kidi kidiyi, asakoli, bixemukwatabo.

Atualmente Selecionado:

YOANO 11: Luna_NT

Destaque

Copiar