YOANO 10

1SOSOLWO, sôsôlwo, nwatôyela ene, You utasobwela mu lumbu lwa mikwakwa ku mbelo, kate abanda kunga, kayou ndo mwefi yi musancañani. 2Kaninga you abwela munda ku mbelo udi kalama ka mikwakwa. 3Munami a mbelo umwadipudila ; yi mikwakwa yombombwa diyi dienci ; yei abikila lolo mikwakwa yenci ku dina ku dina yi uyaxiyaxiya kunci. 4Panakala amabatusa bungi bwa mikwakwa yenci, uyeya ku buxi bwayo, yi mikwakwa yimwalanda, bwalo bwalubukwayo diyi dienci. 5Kaninga kayinalanda muntu abene, kate yinamucina bwalo butasolubukwayo diyi dia bantu babene.

6Mwele ou ndo ăkabambila Yisu, kaninga bobo bakadi kabasolubukwa bwalo bwakabambilayi. 7Ndo biakabambila Yisu kabidi ene, Sôsôlwo, sôsôlwo, nwatôyela ene, Meme ndi mbelo a mikwakwa. 8Bantu boso bakalwa buxi bwamene badi befi yi basancafiani, kate mikwakwa yakadi kayisobombwa. 9Meme ndi mbelo ; aka muntu mwosô abwela kundi, unapandixibwa, unabwela munda, unabatuka kunci, yi unasafiana maxindi. 10Mwefi kasoiwa kutena ulolwa yi kweba yi kwonda yi kuxipa ; meme namalwa bixeakalabo yi môyo yi bixeakalabo yinau bungi bungi. 11Meme ndi kalama kanengela. Kalama kanengela ndo kamaladikila mikwakwa môyo ănci ; 12kaninga you asala ku bwalo bwa difuto utena kalama, utena fumu a mikwakwa, amamona ngasama ulu kulwa, amaxiya mikwakwa, yi amacina ; ngasama lolo amayikwata, amacakanisa mikwakwa. 13You noku asala bwalo bwa difuto amacina bwalo bwasadilayi difuto, yi kasodinyingisa bwalo bwa mikwakwa. 14Meme ndi kalama kanengela ; ngwalubukwa mikwakwa yamene, yi mikwakwa yamene yingwalubukwa, 15bea biamangulubukwa Tete, yi bea binamalubukwa Tete ; yi ngwaladikila mikwakwa môyo ămene.

16Ndi lolo yi minga mikwakwa yitena ya lumbu lolo ; nakucwala yei noku kabidi, yinakwombwa diyi diamene ; yi yinakala kibumbu kimokimwe yi kalama kamokamwe. 17Ku bwalo bobu kwamangunanga Tete, bwalo bungwaladika môyo ămene, ndo kuwangata kabidi. 18Kakuna muntu umoumwe ungwanculau, kate ndialadikilau biamene. Ndi yi bumanya bwa kuladika, ndi lolo yi bumanya bwa kuwangata kabidi. Nakangata mulangu ou kudi Tetemi.

19Bakanamukanana bonamu kabidi kudi bena Yuda bwalo bwa meyi aa. 20Mo bangi babo bakatôya ene, Udi yi kidimu kibi, amapasuka ; kukai numwombombwa ? 21Bamo ene, Mambi aa noku kayena a muntu amakwacibwa kudi kidimu kibi. Kidimu kibi kiamalubukwa kudipula meso a bafofo ? 22Kitula lolo kia kubalolebwa kwa tempelo kiakadiko, ku Yelusaleme ; kwakadi ngondo ya maxika. 23Yi Yisu akakwendakana ku tempelo ku mbalanda a Solomono. 24Mbwôso bena Yuda bakamudinga, yi bakamwambila ene, Pôi kikondo kai panakwelexesa Owe micima yecu mbata ? Ndo Owe udi Kalistu, ututôyeli sôsôlwo. 25Yisu akabambila ene, Nakanwambila, yi kanusokwetabusa. Makisa angwencenca ku dina dia Tetemi, ka aa angwatôbôlela ntôbô ; 26kate nonu kanusokwetabusa bwalo bunutena mikwakwa yamene. 27Mikwakwa yamene ndo yombombwa diyi diamene, yi meme nyalubukwa, yingwalandudila ; 28meme lolo nyapapa môyo ă kô kô ; yi kayinancimina nyô, yi muntu kienako unayipapula mu kianca kiamene. 29Tetemi akangupayo amadika bantu boso bunene, yi kakuna muntu ubili kuyipapula mu kianca kia Tetemi. 30Meme yi Tete badi umoumwe.

31Mbwôso bena Yuda bakakwongula mabwe kabidi bixemuxipabo mabwe. 32Yisu akabapingasa ene, Namanwebesa makisa mangi anengela kudi Tetemi ; ku bwalo bwa dikisa kai diao ndo kunungwelela mabwe ? 33Bena Yuda bakamwambila ene, Katusokwela mabwe ku bwalo bwa dikisa dinengela, kate ku bwalo bwa kutangola Ncembi mwotangu ; yi bwalo budiateka Owe mikyebe Ncembi, udi muntu. 34Yisu akabapingasa ene, Ku bwadi bwenu kakwafundibwa ene, Meme nakatôya ene, Nudi bancembi ? 35Ndo amababikila bancembi, bakaiwa diyi dia Ncembi kudibo, (yi mukanda ă Ncembi kaubiyi kuxipibwa) 36nonu nwatôya ku bwalo bwand bwa you amabalola Tete, amatumayi ku loboko, ene, Owe watangola, bwalo bunaputôya ene, Ndi Mwana a Ncembi ? 37Aka kisokwenca makisa a Tetemi, kanungwetabuxi ; 38kaninga ndo ngwencenca, isanga kanusongwetabusa meme, nwetabusi makisa ; binuxelubukwa yi binuxelembetela ene, Tete udi munda mwamene yi meme ndi munda mwa Tete. 39Biakapalalabo kabidi kumukwata ; yei lolo akapauka mu bianca biabo, 40yi akancuka kabidi ku dixia dia Yôdana ku kidi kiakanumeya Yoano ku bubangabanga ; yi akasala koku. 41Yi bantu bangi bakalwa kudiyi, yi bakatôya ene, Yoano akadi kasokwenca kilayixilu pô ; kaninga bintu bioso biakatôya Yoano dia muntu you biakadi sôsôlwo. 42Yi bangi bakamwetabuxila koku.

Atualmente Selecionado:

YOANO 10: Luna_NT

Destaque

Copiar