Къанун 29
29
КъотӀи цӀи гьаби
1БЕТӀЕРГЬАНАСУЛ амруялдалъун Хоривалда Мусаца гӀизраилазулгун КъотӀи гьабуна. Гьединго МогӀавалда рукӀаго БЕТӀЕРГЬАНАС Мусаде амру гьабуна гӀизраилазулгун цоги нухалъ КъотӀи гьабеян. Гьале гьеб КъотӀи.
2Киналго гӀизраилалги ахӀун, Мусаца гьезда абуна:
«Нужерго беразда бихьана БЕТӀЕРГЬАНАС Мисриялда пиргӀавнасеги, киналго гьесул чагӀазеги, гьесул тӀолабго улкаялъеги гьабураб. 3Нужерго беразда бихьана гьезие гьабураб къвакӀараб тамихӀги, гьединго кӀудиял гӀаламаталги, хӀикматал ишалги. 4Амма жакъа къоялде щвезегӀанги [нужер риццатал ракӀал сабаблъун] кьечӀо БЕТӀЕРГЬАНАС нужее бичӀчӀи бугеб гӀакълуги, бихьараб босулел бералги, рагӀаралъул магӀна гьабулел гӀундулги.
5„Дица кӀикъого соналъ авлахъалда нужее нухмалъи гьабуна: нужер ретӀелги басралъичӀо хьитги бихъичӀо. 6Гьениб нужеца чед гуро кванараб, чӀагӀа яги чагъир гуро гьекъараб. Гьедин гьабуна Дун нужер БЕТӀЕРГЬАН Аллагь вукӀин нужеда бичӀчӀизе гӀоло“.
7Ахир-къадги гьанире щвана нилъ. Цинги Хешбоналъул пача Сихонги Башаналъул пача Огги рачӀана нилъгун рагъизе, амма нилъеца гъурана гьел, 8гьезул ракьалги кверде росана ва гьел ракьал рувимилазеги, гадилазеги, манассилазул бащдаб къавмалъеги кьуна.
9Гьаб къотӀиялъул киналго шартӀал тӀуразаруни, гьабулебщиналъулъ нужее икъбал букӀине буго. 10Жакъа нуж киналго гьаб бакӀалда БЕТӀЕРГЬАН Аллагьасда цере чӀун руго: къавмазул бутӀрулги, тухумазул кӀудиялги, церехъабиги, киналго гӀизраилалги. 11Гьединго гьанир руго нужер лъудбиги, лъималги, киналго нужеда гьоркьоб гӀумру гьабун чӀарал батӀиял халкъазул гӀадамалги – нужее цӀул бичӀулел чагӀаздаса бахъараб лъим баччулел чагӀазде гӀунтӀизегӀан. 12Нуж гьанире ракӀарун руго, нужеца БЕТӀЕРГЬАН Аллагьасул КъотӀи къабул гьабиялъе гӀоло. БЕТӀЕРГЬАНАС нужгун гьеб КъотӀи гьабулеб буго, гьаги гьедун, 13Гьес нужер умумузе, ай Ибрагьимиеги, ИсхӀакъиеги, Якъубиеги кьураб рагӀуда рекъон, нуж Жиндирго халкълъун гьариялъе ва нужер Аллагьлъун Живго вукӀиналъе гӀоло. 14ГӀицӀго нужергун гуро дица гьаб гьа гьедараб КъотӀи гьабулеб бугеб. 15Гьаб КъотӀи гьабулеб буго гьанир БЕТӀЕРГЬАН Аллагьасда цере ракӀарун ругезулгунги жеги жакъа нилъеда гьоркьор гьечӀезулгунги.
16Нужедаго лъала Мисриялда нилъер букӀараб гӀумруги чияр халкъазул ракьаздасан нилъеца гьабураб сапарги. 17Нужеда рихьана гьезул цӀулалги, ганчӀилги, гӀарцулги, меседилги гьарурал рокьукъал гьересиаллагьзаби. 18Нужеда гьоркьов киданиги вукӀине виччаге, БЕТӀЕРГЬАН Аллагьасде мугъги рехун, дол халкъазул аллагьзабазе тӀагӀат гьабулев чи: я бихьинчи, я чӀужугӀадан, я тӀубараб къавм, яги тухум; вореги, кьогӀаб яги загьруяб гӀаркьел тӀад бижулеб кьибил нужедаго гьоркьоб биччаге!
19КъотӀиялъул нагӀанабиги лъалев цониги чияс, гьезул кӀварги гьабичӀого, жиндирго дугӀаялдалъун ракӀ гӀодобе биччазабулеб бугони: „Диего бокьарабги гьабун вукӀина, гьабулебщиналъулъ дие битӀги ккела“, – ян пикруги абун, гьеб гӀамал сабаблъун хвезе вуго гьев. „Лъадаца гӀорцӀарабги бакъварабги ракь цадахъ тӀагӀинабила“#29:19 Лъадаца гӀорцӀарабги бакъварабги ракь цадахъ хвела – гьаб абиялъул магӀна ккола гӀайибияв сабаблъун, гьесдаго цадахъ гӀайибго гьечӀелги холин абураб.. 20Гьединав чиясдаса БЕТӀЕРГЬАН кидаго тӀасалъугьунаро. Хилиплъи хӀехьоларев БЕТӀЕРГЬАНАСУЛ гьалагаб ццин рещтӀине буго гьединав чиясде ва гьаб тӀехьалда хъварал киналго нагӀанаби гӀунтӀизе руго гьесде; гьесул цӀарги БЕТӀЕРГЬАНАС дунялалдасаго нахъе хъвагӀазе буго. 21ГӀизраилазул тӀолалго къавмазда гьоркьоса ватӀаги гьавун, гьев чиясе БЕТӀЕРГЬАНАС жаза гьабила гьаб Къануналъул тӀехьалда хъварал КъотӀиялъул киналго нагӀанабазда рекъон.
22Нужер рукӀинесел гӀелаздаги, нужер наслабаздаги, рикӀкӀадал ракьаздаса рачӀарал батӀиял халкъазул чагӀаздаги бихьила гьаб ракьалде рачӀине ругел балагьалги, БЕТӀЕРГЬАНАС риччазе ругел унтабиги. 23Гьезда бихьила чӀабтӀицаги цӀамуцаги бухӀараб тӀолабго ракь – щибго бекьизеги бижизеги рес гьечӀеб, кинабгӀаги гӀурччинлъицин гьечӀеб. Гьеб букӀина гьелегьараб ццидалъ БЕТӀЕРГЬАНАС тӀагӀинарурал шагьарал Содомги, Гоморраги, Адмаги, Цевоимги гӀадин. 24ТӀолалго халкъаз абизе буго: „Щиб сабаблъун БЕТӀЕРГЬАНАС гьаб ракьалда гьаб къо чӀезабураб? Сунца Аллагьасул ццин гьадигӀан гьалаг гьабураб?“ – ин. 25Гьезда абила: „Гьедин ккана гьеб халкъалъ жиндирго умумузул БЕТӀЕРГЬАН Аллагьасул КъотӀи рехун теялъ, гьел Мисриялдаса нахъе рачун хадуб Гьес гьезулгун гьабун букӀараб КъотӀиялъе гьел хилиплъиялъ. 26Цере жидеда киданиги лъалел рукӀинчӀел ва Аллагьас гьукъарал батӀиял аллагьзабазда хадур лъугьана гьел ва гьезие тӀагӀат-гӀибадат гьабуна. 27Гьеб сабаблъун БЕТӀЕРГЬАНАСУЛ ццин гьалаглъана гьеб улкаялде ва тӀехьалда хъварал киналго нагӀанабиги щвана гьелъул халкъалъе. 28Гьалагаб ццидалъ БЕТӀЕРГЬАНАС жиндирго ракьалдаса нахъеги къотӀун, чияр ракьалде рехана гьел – гьанжеги гьел гьенир руго“, – ян.
29БЕТӀЕРГЬАН Аллагьасул нилъеда лъаларел балъголъаби руго, амма гӀадамазе загьир гьабурабщинаб, Гьес абадиялъего нилъееги нилъер наслабазеги кьун буго, нилъ Гьесул Къануналда рекъон хьвадизе рукӀине гӀоло.
Atualmente Selecionado:
Къанун 29: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023