Къанун 30
30
БЕТӀЕРГЬАНАСДЕ руссиналъул хӀасил
1Дица нужее загьир гьарурал гьал киналго лъикӀлъабиги балагьалги нужеда тӀаде рачӀине руго. Гьебмехалъ, БЕТӀЕРГЬАН Аллагьас чияр халкъазда гьоркьор рикь-рикьизарурал, нуж рекӀеде рачӀина, 2лъималгун цадахъ нужерго БЕТӀЕРГЬАН Аллагьасде руссина, Гьесие мутӀигӀлъила ва жакъа дица нужее загьир гьабурабщинаб ракӀ-ракӀалъ ва тӀолабго рухӀ-жаналдалъун тӀубазабила. 3Цинги БЕТӀЕРГЬАН Аллагьас нуж асирлъудаса тӀад руссинарила; Гьев нужеда гурхӀила ва Жинцаго киналго халкъазда гьоркьор рикь-рикьизарурал нуж цӀидасан данде ракӀарила. 4Дунялалъул рагӀалде щвезарун рукӀун ратаниги, БЕТӀЕРГЬАН Аллагьас нуж гьенисаги ракӀарила ва тӀадруссинарила. 5БЕТӀЕРГЬАН Аллагьас нужерго умумузул ракьалде рачина нуж ва цӀидасан гьеб ракь кверде босила нужеца; умумузул букӀаралдасаги цӀикӀкӀун бечелъиги кьела нужее ва гьездасаги цӀикӀкӀина нужер къадарги. 6БЕТӀЕРГЬАН Аллагьас нужерги нужер наслабазулги ракӀазе гьабила суннат, ракӀ-ракӀалъго тӀолабго рухӀ-жаналдалъун нужее БЕТӀЕРГЬАН Аллагь хиралъизе ва нуж чӀаго хутӀизе гӀоло. 7Гьебмехалъ БЕТӀЕРГЬАН Аллагьас тӀолалго балагьал рещтӀинарила, нужги рихарал, нужее гӀазаб-гӀакъубаги кьезе бокьарал нужер тушбабазде тӀаде. 8Нужги цӀидасан БЕТӀЕРГЬАН Аллагьасе мутӀигӀлъила ва жакъа дица малъарал Гьесул киналго амрабиги тӀуразарила. 9Цинги БЕТӀЕРГЬАН Аллагьас нужеца гьабулебщиналда кӀудияб баракат лъела, нужее лъимал гӀемер гьарила, гӀи-боцӀул къинлъи гӀемерлъила ва ах-хуралъул бачӀинги гьарзалъила. БЕТӀЕРГЬАН нахъеги нужедаса разилъила, нужер умумуздаса разилъарав гӀадин, ва нужее лъикӀабщинаб кьела. 10Гьедин букӀина нуж БЕТӀЕРГЬАН Аллагьасухъ гӀенеккулел ругони ва гьаб Къануналъул тӀехьалда хъварал Гьесул амрабиги тӀадкъаялги тӀуразарун хьвадани – ракӀ-ракӀалъго тӀолабго рухӀ-жаналдалъун нужерго БЕТӀЕРГЬАН Аллагьасде руссани.
ТӀаса бище: гӀумру яги хвел
11Жакъа дица нужее кьолел ругел амраби тӀуразаризе цӀакъго захӀматал яги нахъ гӀунтӀун бажаруларел гьечӀо. 12Гьел зобалазда гуро ругел: „Зобалазде щив вахинев гьел росизе ва нижее загьир гьаризе, нижеца гьел тӀуразаризе рукӀине?“ – ян нужеца абизе ккани. 13Ралъад тун дорехунги гуро гьел ругел: „Ралъад бахун довехун щив инев, гьел росизе ва нижехъе кьезе, нижеца гьел тӀуразаризе рукӀине?“ – янги абизе кколаро. 14Гуро, гьел амраби нужгун руго: гьел нужер мацӀалда руго ва нужер рекӀелъ руго, гьединлъидал гьел тӀуразаре.
15Балагье, жакъа дица нужеда цебе лъолеб буго гӀумруги баракатги, хвелги балагьги. 16Гьале дир амру: БЕТӀЕРГЬАН Аллагь хиралъе, Гьесул нухккун хьваде, Гьесул амрабиги, тӀадкъаялги, къануналги тӀуразаре. Цинги нуж чӀаго хутӀила, нужер къадарги тӀадеялдаса тӀаде цӀикӀкӀина ва нуж жанире лъугьинехъин ругеб ракьалда БЕТӀЕРГЬАН Аллагьас нужеде баракатги рещтӀинабила.
17Амма нужеца БЕТӀЕРГЬАН Аллагьасде мугъ рехани, нуж Гьесие мутӀигӀлъичӀони ва, Гьесул нухдасаги кьурун, батӀиял аллагьзабазе хъулухъ гьабизе лъугьани, 18гьебмехалъ ракӀчӀун нуж тӀагӀинаризе руго; нуж унеб ва нужеца кверде босизе бугеб Иорданалъул доб цояб рахъалъул ракьалда нужер гӀумруги халат бахъизе гьечӀо.
19Жакъа дица зобги ракьги нужеда данде нугӀзаллъун ахӀулел руго: дица нужеда цебе лъуна – гӀумру яги хвел, баракат яги нагӀана. ГӀумру тӀаса бище, нужгоги нужер наслабиги чӀаго рукӀине, 20БЕТӀЕРГЬАН Аллагь нужее хиралъизе, Гьесухъ гӀенеккизе ва Гьесулгун щулияб бухьен гьабизе – Гьесдасан бугелъул нужее гӀумру. Нужее кьелин абун нужер умумузе, ай Ибрагьимиеги, ИсхӀакъиеги, Якъубиеги гьедун вукӀараб ракьалда Гьес кьела нужее халатаб гӀумру».
Atualmente Selecionado:
Къанун 30: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023