I LUKASI 17

Ba opia patudu

17:1-6

1 # Mat. 18:6-7; Mrk. 9:42 Dopotae i Yesu a ana guru-Do, ”Asalakono ta hina pompopo'ooa, sine masolaomo mia anu weweuo. 2Da moikoopo onae ba ipinontanggoako watu pogili a we'uno, ka i'amba pinetadiako a laro ntahi, sekonopo ipompopo'oo te'asa mia inso a mia anu memolema andio. 3#Mat. 18:15 Tangkoroomo koroimu! Tewala pepaekompomu moweweu hala, kuahakono, ka tewala ipe'o'oleakono, ampuniomo. 4#Mat. 18:22 Tamoako ba ipoweweu hala ndi omue pepintu i larono asa oleo ka pepintu ipekule ndi omue ka ipotae: Me'o'ole aku, asalakono ka u'ampunio.”

5Ka do'amba mpotae tinena atuudo ndi Ondae i Ue, ”Itiangiakami pompe'ala-alamami!” 6Sumangki Ira i Ue, ”Tewala hinao pompe'ala-alamiu kanamo koa langkaino wuku rawoho, komiu mpokompotaeakono keu ara andio: Tebutaomo ka tepahomo a laro ntahi, ka ta tumondao paumiu.”

Ue ka ata

17:7-10

7”Isema i olomiu anu hinao asa mia atano anu mompadeko ke mompakambiakono pinotuwuno, ta motaeakono atano, mansano mekule inso i lere: Ronga aiwa pongkaa! 8Kombake posuleno ta motaeakono ata atuu: Patindaakunemo kaangaku. Peboo ntongamo ka pekakaakunemo hawe ka ku'umari mongkaa ka mo'inu. Ka umarino atuu ka u'amba mongkaa ka mo'inu. 9Nde montarimakasike onae a atano atuu, hangano iweweuomo ata atuu anu itinenaako? 10Kanandiomo mbo'u omiu. Tewala imeweweuomo luwuakoano anu imentinenaako, impotaemo: Omami andio ata anu nahi mentudu; Omami butu meweweuo hapa anu asalakono kami meweweuo.”

Hopulu ira mia haki ngkuli mesaki

17:11-19

11A laro pelempaa-Do lumako i Yerusale Ondae i Yesu tumondao tidano wita Samaria ka Galilea. 12Tempono Dopewinsokio aasa inia mehawe iramo hopulu mia haki ngkuli mesaki tepohaweako Ira. Ondae mpentade ola-olai 13ka dompebooli, ”Yesu, Guru, Ipehohawa kami!” 14#Ima. 14:1-32 Ka Do'amba mengkita ndi Ondae ka Dopotae, ”Imelakomo, impopokitaomo koroimiu a luwuno sando mpesomba.” Ka kontongaado a ntonga nsala metompa iramo. 15Asa mia inso ndi ondae, mansano kumitao nine onae tompaomo, mekule saru umunde-unde Ira Ue Ala ka suarano meroku, 16ka i'amba menggolontu a mpuu karu-Do i Yesu ka montarima kasi ndi Ondae. Mia atuu to Samaria. 17Ka Do'amba motae i Yesu, ”Kombake hopulu mia hieno luwuno metompa iramo? Isua iramoke anu osio mia atuu? 18Nahinake i olodo anu mekule ka i'unde-unde Ira Ue Ala sangkadio mia hawe andio?” 19Ka Do'amba motaeakono mia atuu, ”Pentademo ka lakomo, ikaduduikomo pompe'ala-alamu.”

Haweno Poparentaa-Do Ue Ala

17:20-37

(Mat. 24:23-28, 36-41)

20Montonda pesikenodo to Parisi, te'ipia ta haweano Poparentaa-Do Ue Ala, sumangki Ira i Yesu, Dopotae, ”Haweno Poparentaa-Do Ue Ala nahina petondoni anu ta kinita, 21mia mbo'u nahi dompokompotae: Kitao, kongkoo i ndi'ai ke kongkoo i ra'ai! Hangano menteeano Poparentaa-Do Ue Ala kongko i olomiu.”

22Ka Dopotaeako ira ana guru-Do, ”Ta hawe tempono komiu mingki mengkitao te'asa inso a oleo-Do i Ana Manusia atuu ka nahi komiu mengkitao. 23Ka mia ira mpotaeakomiu: Kitao, kongkoo i ra'ai; kitao kongkoo i ndi'ai! Si melako i tu'ai, si mpetonda. 24Hangano mengkena kana koliki mepansari inso i tompano langi anu aasa hawe i tompano langi anu susua, kanandiomo mbo'u teweweu-Do i Ana Manusia te'upua a oleo hawea-Do. 25Sine se'eluno asalakono Ira membasaio hadio marasaia ka nahi domentarima Ira mia andiodo. 26#Teg. 6:5-8 Ka mengkena kana anu gagi tempono i Noho, kanandiomo mbo'u teweweuno te'upua a oleo-Do i Ana Manusia: 27#Teg. 7:6-24 mpongkaa ira ka mpo'inu, mpekombia ira ka mempinopokombia, hawe a oleo ka ipewinso i Noho a laro bangka, ka i'amba haweomo lolowi mepate ira luwu. 28#Teg. 18:20–19:25 Kanandio koa mbo'u anu gagi tempono i Lo'oti: mpongkaa ira ka mpo'inu, mpo'oli ira ka mpo'asa, mpompaho ira ka mpowangu. 29Sine a oleo ipeluarako i Lo'oti inso i Sodomo metiiomo usa api ka usa walira inso i langi mepate ira luwu. 30Kanandiomo teweweuno te'upua a oleo, ba Dopepokomengkaa i Ana Manusia. 31#Mat. 24:17-18; Mrk. 13:15-16 Ba isema a oleo atuu kontongaano a mpe'angi-angia a wawo raha ka luwuno sangkano kongko a laro raha, siimo ipetii ta umalao, ka kanatuu koa mbo'u mia anu kontongaano a lere, siimo ipekule. 32#Teg. 19:26 Pewowoloomo beineno i Lo'oti! 33#Mat. 10:39; 16:25; Mrk. 8:35; Luk. 9:24; Yoh. 12:25 Ba isema mingki mekariao penaano, onae ta tetadi penaano, ka ba isema tetadi penaano, onae ta kumaduduio. 34Kupauakomiu: A wongi atuu hinao orua mia a wawo aasa poturia, anu aasa ta winawa ka anu aasa mbo'u ta bininta. 35Hinao orua beine meronga-ronga mogili, anu aasa ta winawa ka anu aasa mbo'u ta bininta.”

[36Tewala hinao orua mia i lere, anu aasa ta winawa ka anu aasa mbo'u ta bininta.] 37Dompotaeako Ira i Yesu, ”I sua, Ue?” Dopotaeako ira, ”i sua hinao wata ngkoroi, i tu'ai penggowoado singko.”

Atualmente Selecionado:

I LUKASI 17: XMZ

Destaque

Copiar