I LUKASI 18

Potundaano mongkona puu mpobitara anu nahi mentee

18:1-8

1Dopauako ira i Yesu aasa potundaano ka domento'orio ntu'u, nine asalakono ka dowela mpekakai si donte'osa. 2Dopotae, ”A laro aasa kota hinao aasa puu mpobitara anu nahi doitoako Ira Ue Ala ka nahina maupo te'asa mia anu pinelangkaino. 3Ka a ngkota atuu hinao aasa tuwu beine anu wela hawe a mpuu mpobitara atuu ka ipotae: I'ala-alaakune i arono taroku. 4Ba opia tempo tehineno puu mpobitara atuu nami perioo. Sine lembuino ipotae i laro aroano: Maupo nahi kudoitoako Ira Ue Ala ka nahina pinelangkaiku maupo te'asa mia, 5sine hangano tuwu beine andio mokomasusa aku, po'ineeomo kupokomenteeo, ka si aiwa mpiha ka poko'ariano isapoi aku.” 6Dopotae i Ue, ”Impe'ihilaroomo hapa anu pinauno puu mpobitara anu nahi moleo atuu! 7Nde nahi Ira mokomenteeo Ue Ala luwuno mia bininiki-Do anu meene ka wongi mpebooli ndi Ondae? Ka nde Ira motuluoke tempo ka Do'amba tumulungi ira? 8Kupauakomiu: Ira koa ronga mokomentee ira. Sine, tewala hawe i Ana Manusia, hinaoke Dopohawe pompe'ala-ala i tolino?”

Potundaano mongkona to Parisi saru puu popumpu sima'ulu

18:9-14

9Ka a ba opia mia anu mpementeeo koroido ka mpe'uru-uru ira luwu mia mehano, Dopauo i Yesu potundaano andio, 10”Hinao orua mia lumako a Raha-Do Ue Ala ta mekakai; anu asa mia onaemo to Parisi ka anu susua puu popumpu sima'ulu. 11To Parisi atuu mentade ka ipekakai i laro aroano kanandio: Oo Ue Ala, montarima kasi aku ndi Omiu, hangano nahi kupengkena kana luwuno mia mehano, komba puu mporontu, komba mia lambaha, komba anu monsosabo ka komba kana puu popumpu sima'ulu andio; 12ongkue puasa pendua asa minggu, ongkue mompowee tia hopuluno inso a luwuno hinaweku. 13Sine puu popumpu sima'ulu atuu mentade ola-olai, maupo mentombu i langi nahi sapa, tendeano itopao koroino ka ipotae: Oo Ue Ala, Ipehohawa aku mia tehala andio. 14#Mat. 23:12; Luk. 14:11 Kupauakomiu: Mia andio mekule i rahano gagi mia anu Dopementeeo Ue Ala ka mia mehano atuu naahi. Hangano ba isema melangkaio koroino, onae ta pine'uru-uru ka ba isema me'urumako onae ta pinelangkai.”

Ondae i Yesu rumonso ira nana'ote

18:15-17

(Mat. 19:13-15; Mrk. 10:13-16)

15Ka mehawe iramo mia mpowawa nana'ote anu kodei ndi Ondae i Yesu, ka Do'angga ira. Kumitao atuu ntekuda ira ana guru-Do a mia atuudo. 16Sine Dopoboi ira i Yesu ka Dopotae, ”Po'inee iramo nana'ote atuu ka dome'aiwa ndi Ongkue, ka si me'onsoi ira, hangano mia anu kanatuumo anu mpe'umbuo Poparentaa-Do Ue Ala. 17Kupauakomiu: Menteeano ba isema nahi tarimao Poparentaa-Do Ue Ala kana aasa nana'ote kodei andio, nahi ta mewinso i larono.”

Mia kaea motungko ipewinso a Poparentaa-Do Ue Ala

18:18-27

(Mat. 19:16-26; Mrk. 10:17-27)

18Hinao aasa petewawa mesikeno ndi Ondae i Yesu, ipotae, ”Guru anu moiko, hapa anu asalakono kuweweuo ka kupohawe tuwua anu nahina tampulaano?” 19Sumangki Ira i Yesu, ”Tembio ka upotaea-Kune moiko? Nahina maupo te'asa mia moiko sangkadio butu Ondae Ue Ala. 20#Pel. 20:12-16; Win. 5:16-20 Manasa uto'orio luwuno parenta-Do Ue Ala: Si ponsosabo, si pompepate, si ponako, si pesakosii megaupi, pelangkai iramo amamu ka inemu.” 21Motae mia atuu, ”Luwuno atuu kutondaomo mompu'u da tempo kumongura.” 22Rumongeo atuu motae Ira i Yesu ndi onae, ”Da hinao aasa rupapo mbo'u anu asalakono ka uweweuo: asaomo luwuno arataamu ka tia-tiaomo atuu a mia memongkokolaro, ka komohawe arataa i suruga, umarino atuu aiwamo ramai ka utonda Aku.” 23Mansano rumongeo pau atuu, mia atuu tedoa mompemasusa, gangano onae tedoa kaea. 24Ka Do'amba i Yesu mengkita ndi onae ka Dopotae, ”Motungko ntu'u mia anu hadio doino mokompewinso a Poparentaa-Do Ue Ala. 25Hangano moruanaopo aasa unta mewinso a bolono seu sekonopo aasa mia kaea mewinso a laro Poparentaa-Do Ue Ala.” 26Ka ondae anu merongeo atuu mpotae, ”Tewala kanandio, isemake anu pinokongkadudui?” 27Dopotae i Yesu, ”Hapa anu nahi polio mia, Dopolio Ue Ala.”

Tambo tumonda Ira i Yesu

18:28-30

(Mat. 19:27-30; Mrk. 10:28-31)

28Motae i Peturu, ”Omami andio kimebintaomo luwuno pine'uemami ka kimentonda Komiu.” 29Motae Ira i Yesu ndi ondae, ”Kupauakomiu, menteeano sompo mia anu hangano Poparentaa-Do Ue Ala ka ibintao rahano, beineno ke pepaekompono, mia mota'uno ke luwuno anano, 30ta wali montarima meluka i tempo koa mbo'u andio, ka a tempo anu ta hawe onae ta montarima tuwua anu nahina tampulaano.”

Pompopoto'ori kopentoluno mongkona tebobarasai-Do i Yesu

18:31-34

(Mat. 20:17-19; Mrk. 10:32-34)

31Dopoboi ira i Yesu hopulu ka orua ana guru-Do, ka Do'amba motaeako ira, ”Kanandio-andio kita melako i Yerusale ka luwuakoano anu binurido nabi mongkona i Ana Manusia ta inihii. 32Hangano Ira pineweengako a luwuno tongku anu nahi domento'ori Ira Ue Ala, pinasinggiri, pinokongkodei ka inonui, 33dobobarasai Ira ka mpepate Ira, ka ko'otolu oleono Ira mewangu.” 34Sine poore ba dompokonto'orio luwuno atuu; pengkonaano pau atuu tewuni ndi ondae ka nahi domento'orio hapa anu tinoo.

Ondae i Yesu mokotompao aasa mia morawu umpeda i Yeriko

18:35-43

(Mat. 20:29-34; Mrk. 10:46-52)

35Tempono Ondae i Yesu Iramo ronga hawe i Yeriko, hinao aasa mia morawu anu mentoro a wiwi nsala ka mo'ema-ema. 36Tempono irongeo mia atuu hadio mia ntelalo, mesikenoomo, ”Hapa atuu?” 37Dompotaeakono mia, ”Ondae i Yesu to Nasare telalo.” 38Ka i'amba mebooli, ”Yesu, anano i Daudi, Ipehohawa akumo!” 39Ka ondae, anu mpelempa i arono, mengkuahakono ka iperodo-rodo. Sine komero-merokuno ipebooli, ”Anano i Daudi, Ipehohawa akumo!” 40Ka Do'amba i Yesu menaa-naa ka Dopetena wawao mia atuu ndi Ondae. Ka mansano umpedaomo ndi Ondae, mesikeno Ira i Yesu ndi onae, 41”Hapa inehemu ba Kuweweuakomu?” Sumangki mia atuu, ”Ue, ka kupokompongkita!” 42Ka Do'amba i Yesu motaeakono, ”Omue pongkitamo, ikaduduikomo pompe'ala-alamu!” 43Ka i tempo koa mbo'u atuu onae mongkitaomo, ka i'amba tumonda Ira saru umunde-unde Ira Ue Ala. Luwuno palili mengkitao anu gagi atuu ka dome'unde-unde Ira Ue Ala.

Atualmente Selecionado:

I LUKASI 18: XMZ

Destaque

Copiar