I YOHANE 5

Pompokotompaa a oleo Saba a limbo Beteseda

5:1-18

1Umarino atuu hinao oleo langkaido to Yahudi, ka Ondae i Yesu melungka lumako i Yerusale. 2I Yerusale umpeda Pewowa Langkai Bimba hinao aasa limbo, anu a mpau Ibarani nineeako Beteseda; hinao olima tambino 3ka a luwuno tambino atuu mpepombole hadio mia memahaki: mia memorawu, mia tiimpa karu ka mia pungku, anu mensikorio peleluano uwoi a limbo atuu. 4Hangano metempo-tempo mala'eka-Do i Ue metii a limbo atuu ka ileluao uwoi atuu; ba isema anu tese'elu mewinso i larono umarino melelu uwoi atuu, gagi tompa, hapamo koa hakino. 5I tu'ai hinao asa mia anu tolu pulu ka oalu nta'umo tehineno imahaki. 6Mansa-Do kumitao i Yesu mia atuu mepombole i tu'ai ka hangano Doto'orio, nine tehineomo iteweweu kanatuu, motae Iramo ndi onae, ”Inehemuke tompa?” 7Sumangki mia mahaki atuu, ”Ue, nahina mia anu motii aku a laro limbo atuu ba mompu'uomo melelu uwoino, ka kontongaaku te'aro a limbo atuu, metiiomo mia susua mese'elungi aku.” 8Dopotae i Yesu, ”Pewangumo, tandeomo poturiamu ka pelempamo.” 9Ka i tempo koa mbo'u atuu tompaomo mia atuu ka i'amba tumandeo poturiano ka ipelempa.

Sine oleo atuu oleo Saba. 10#Neh. 13:19; Yer. 17:21 Onaemo pu'uno to Yahudi ka dompotaeakono mia anu da sarai itompa atuu, ”Oleo andio oleo Saba ka nahi moiko upo'ahao poturiamu.” 11Sine isangki ira, ”Mia anu mokotompa akumo, Ondae anu motaeakune: Tandeomo poturiamu ka pelempamo.” 12Domensikenoo, ”Isemake mia atuu anu motaeakomu: Tandeomo poturiamu ka pelempamo?” 13Sine mia anu da sarai itompa atuu nahi to'orio ba isema mia atuu, hangano Ondae i Yesu tewuni Iramo i tonga-tongano mia hadio a mpo'ianga atuu. 14Ka Do'amba i Yesu tepohaweakono a laro RahaDo Ue Ala ka Do'amba motaeakono, ”Tompakomo; si poweweu mbo'u hala, ka si gagi ndi omue anu lansaraopo.” 15Meluarako mia atuu, ka i'amba tumutuluako ira to Yahudi, nine Ondaemo i Yesu anu mokotompao. 16Ka onaemo pu'uno ka dompo'ungke-ungkeako to Yahudi weweu nsa'o Ira i Yesu, hangano Doweweuo luwuno atuu a oleo Saba. 17Sine Dopotaeako ira, ”Ondae Ama-Ku mo'angga Ira hawe kanandio-andio, onaemo ka Kupo'angga mbo'u.” 18Onaemo pu'uno to Yahudi tepaheomo ntu'u dompo'ungke-ungkeako ka dompepate Ira, komba butu hangano nahi Dopelangkaio oleo Saba, sine hangano mbo'u Dopauo nine Ondae Ue Ala onaemo Ama-Do ka ba kanandio Dopongkenaomo koroi-Do saru Ondae Ue Ala.

Ponsakosii-Do i Yesu mongkona koroi-Do

5:19-47

19Ka Do'amba i Yesu sumangki ira, Dopotae, ”Kupauakomiu, menteeano, Ana nahi pokompo'angga maupo hapa inso a ngkoroi-Do Ondae-Do, tewala nahi Dokitao Do'anggao Ama-Do; hangano hapa anu inangga-Do Ama, onae koa mbo'u anu inangga-Do Ana. 20Hangano Ama mompehohawa Ana ka luwuakoano anu inangga-Do Ondae-Do Dotisoako Ira, tendeano Ira tumisoako Ira luwuno anggaa anu langkaiopo mbo'u sekono luwuno anggaa atuu, ranta ka imengkohali-hali. 21Hangano mengkena kana Ondae i Ama wangu ira mia mate ka motuwu ira, kanatuu koa mbo'u Ondae i Ana motuwuo ba isema anu inehe-Do. 22Ondae i Ama nahi Dobitarao maupo isema, tendeano Dopeweengakono pobitaraa atuu ndi Ondae i Ana, 23ka dompelangkai Ira luwuno mia i Ana mengkena kana dompelangkai Ira i Ama. Ba isema nahi pelangkai Ira i Ana, onae nahi pelangkai Ira mbo'u i Ama, anu tumena Ira.

24Kupauakomiu: Menteeano ba isema rumongeo pinau-Ku ka ipe'ala-ala Ira anu tumena Aku, onae mohawe tuwua anu nahina tampulaano ka nahi ta hinuku, hangano melimbaomo inso a laro matea a laro ntuwua. 25Kupauakomiu: Menteeano ta hawe tempono ka haweomo, nine mia memate ira merongeo suara-Do Ana-Do Ue Ala, ka ondae anu merongeo, ta tuwu. 26Hangano mengkena kana Ondae i Ama hinao tuwua a ngkoroi-Do Ondae-Do, kanandio koa mbo'u Doweeako Ira Ana ka ihina tuwua a ngkoroi-Do Ondae-Do. 27Ka Dopoweeako Iramo pabawa ka Dopobitara, hangano Ondae Ana Manusia. 28Si mengkohali-haliakono mongkona atuu, hangano ta hawe tempono, nine luwuno mia anu a laro ngkaburu ira merongeo suara-Do, 29#Dan. 12:2 ka ondae anu mpoweweu iramo moiko ira mpeluarako ka ira mpewangu a ntuwua anu nahina tampulaano, sine ondae anu mpoweweu mosa'o ira mpewangu mehinuku.

30Nahi Kupolio moweweu hapa-hapa inso a ngkoroi-Ku Ongkue-Ku; Kupobitara menunu saru hapa anu rinonge-Ku, ka pobitara-Ku moleo, hangano nahi Kutondao po'ehe-Ku Ongkue-Ku, tendeano po'ehe-Do anu tumena Aku. 31Tewala mesakosii Aku mongkona koroi-Ku Ongkue-Ku, ka ponsakosii-Ku atuu nahi mentee; 32hinao anu susua mesakosii mongkona Ongkue ka Kuto'orio, nine ponsakosii-Do mongkona Ongkue lano mentee. 33#Yoh. 1:19-27; 3:27-30 Mpotena komiumo mia lumako ndi Yohane ka onae mesakosiiomo mongkona menteea; 34sine nahi Kukereo ponsakosiino mia, sine Kupauo mongkona andio, ka imengkinadudui. 35Ondaemo hulu anu melanga ka mewanta ka sarai koa imebehe mpo'undeakono wantano atuu. 36Sine hinao aasa ponsakosii-Ku anu lalu mentudu sekono ponsakosiino i Yohane, onaemo luwuno anggaa anu Doweea-Kune i Ama, ka Ku'anggao. Anggaa mbo'u atuu anu inangga-Ku kanandio-andio, ka onaemo anu sumakosiio mongkona Ongkue, nine Ondae i Ama anu tumena Aku. 37#Mat. 3:17; Mrk. 1:11; Luk. 3:22 Ondae i Ama anu tumena Aku, Ondaemo sumakosiio mongkona Ongkue. Omiu nahi hori merongeo suara-Do, maupo rupa-Do nahi hori mengkitao, 38ka pau-Do nahi po'ia mpiha i laro aroamiu, hangano nahi mpe'ala-ala Ira anu tinena-Do. 39Imemparesao luwuno Wunta Mempori, hangano imengko'aro-aroa nine hangano Wunta Mempori komiu mpohawe tuwua anu nahina tampulaano, sine maupo luwuno Wunta Mempori atuu sumakosiio mongkona Ongkue, 40sine nahi mebehe me'aiwa ndi Ongkue ka impohawe tuwua atuu.

41Nahi Kukereo pompelangkai inso a mia. 42Sine mongkona omiu, lano Kuto'orio nine i laro aroamiu nahina pongkekewoimiu ndi Ondae Ue Ala. 43Hawe Aku a nee-Do Ama-Ku ka nahi imentarima Aku; tewala mia susua hawe a neeno onaeno, komiu mentarimao. 44Kana'umpeke komiu mpokopompe'ala-ala, omiu anu mpontarima pompelangkai inso a mpe'asa miamiu ka nahi me'ungkeo pompelangkai anu hawe inso ndi Ondae Ue Ala anu Asa-Asa-Do? 45Si mengko'aro-aroa, nine Aku mokonsala komiu i aro-Do Ama-Ku; anu mokonsala komiu onaemo i Musa, onaemo i Musa anu pinerorohimiu. 46Hangano tewala impe'ala-alao i Musa, asalakono komiu koa mpompe'ala-ala mbo'u ndi Ongkue, hangano iburiomo mongkona Ongkue. 47Sine tewala nahi impe'ala-alao hapa anu binurino, kana'umpeke komiu mpe'ala-alao hapa anu pinau-Ku?”

Atualmente Selecionado:

I YOHANE 5: XMZ

Destaque

Copiar