I YOHANE 6

Ondae i Yesu mompaka lima nsowu mia

6:1-15

(Mat. 14:13-21; Mrk. 6:32-44; Luk. 9:10-17)

1Umarino atuu Ondae i Yesu melungka lumako i asatowano rano Galilea, onaemo rano Tiberia. 2Mia hadio ntehuhu tumonda Ira, hangano domengkitao luwuno pompokotompa anu kinohali-haliako, anu wineweu-Do a mia memahaki. 3Ka Ondae i Yesu mewuatako a wawo ntorukuno ka Dopentoro i tu'ai saru ana guruDo. 4Ka Pasa, oleo langkaido to Yahudi rangkuomo. 5Tempono Ondae i Yesu mengkita limbu-limbu ka Dokitao, nine mia hadio ntehuhu me'aiwa ndi Ondae, motae Iramo ndi Pilipu, ”I suake ba topo'oli roti, ka dompongkaa mia andiodo?” 6Mongkona atuu Dopauo butu Ira umarahakono, hangano Ondae-Do tumo'orio, hapa anu Ira weweuo. 7Sumangki i Pilipu, ”Roti me'oli rua etu dinare nahi ta sompo tiado mia andiodo, maupo singge mia mohawe te'asa nsibamo koa.” 8Asa mia inso a ana guru-Do, onaemo i Andarea, pepaekompono i Simo Peturu, motaeako Ira, 9”I ndi'ai hinao asa nana'ote, anu monaa olima roti jelai ka orua bou; sine hapake pengkonaano atuu a mia hadio andio?” 10Dopotae i Yesu, ”Tena iramo mia atuudo mpentoro.” A mpo'ianga atuu hadio ewo. Ka mpentoro iramo mia atuudo, bara'ura lima nsowu tama hadiono. 11Ka Do'amba i Yesu umalao roti atuu, ka Dopontarimakasi ka Dotia-tiaako ira anu pentoro i tu'ai, kanatuu koa mbo'u Doweweuo a luwuno bou atuu montonda hadiono anu inehedo. 12Ka mansado memowohi Dopotaeako ira ana guru-Do, ”Imepumpu iramo siba-sibano anu torea ka si hina tetadi-tadi.” 13Ka do'amba mepumpuo, ka me'ihiio hopulu ka orua baki bukeako siba-sibano inso a olima roti jelai anu torea umarido mia mpongkaa. 14Tempono domengkitao mia atuudo kinohali-haliako anu Doweweuomo, dompotae, ”Ondae andio mentee ntu'u Nabi anu Ira hawe i wawontolino.”

15Hangano Doto'orio i Yesu, nine ira mehawe umala Ira ka dumadai Ira gagi mokole, meliahako Ira mbo'u a ntorukuno, asa-asa-Do.

Ondae i Yesu melempa a wawo uwoi

6:16-21

(Mat. 14:22-33; Mrk. 6:45-52)

16Ka tempono mompu'uomo wongi, ana guru-Do i Yesu melako a rano, ka do'amba mpe'ula a bangka 17ka domensakiako i Kapenau. Tempono wongi-wongiomo naapo koa mbo'u Dohawe i Yesu tepohaweako ira, 18tahi kontongaano mebomba hangano angi mokora. 19Mansado mpebose ta te'orua ba otolu kilo olaino, domengkita Ira i Yesu melempa a wawo uwoi rumangkuhio bangka atuu. Ka medoito iramo. 20Sine Dopotaeako ira, ”Ongkue andio, si medoito!” 21Inehedo umula Ira a bangka, ka sarai koa haweomo bangka atuu a wiwi rano anu tinutuido.

Mia hadio umungke Ira i Yesu

6:22-24

22Tisomono mia hadio, anu da mpo'ia i asatowa, mengkitao nine i tu'ai nahina bangka sangkadio anu aasa hieno ka nine Ondae i Yesu nahi Dope'ula a Bangka atuu meronga saru ana guru-Do, ka nine butu koa ana guru-Do anu mpelungka. 23Sine kontongaano atuu ba opia bangka susua mehawe inso i Tiberia umpeda a mpo'ianga dompongkaa roti, umari-Do i Ue montarima kasiakono. 24Tempono domengkitao mia hadio, nine nahi Dokongko i Yesu i tu'ai ka maupo mbo'u ana guru-Do naahi, mpe'ula ira a bangka atuudo ka do'amba mpelungka melako i Kapenau umungke Ira i Yesu.

Roti tuwua

6:25-59

25Tempono domehawe Ira mia hadio Ondae i Yesu i asatowano rano atuu, dompotaeako Ira, ”Guru, indi'ipiake Ihawe i ndi'ai?” 26Sumangki Ira i Yesu, ”Kupauakomiu, menteeano ime'ungke Aku, komba hangano imengkita iramo petondoni, tendeano hangano mpongkaa komiumo roti atuu ka memowohi komiu. 27Impo'anggamo, komba ka impohawe kaanga anu ta pingko, tendeano ka impohawe kaanga anu mo'ia mpiha hawe a ntuwua anu nahina tampulaano, anu Ira weeakomiu i Ana Manusia; hangano Ondaemo anu Dopementeeakono pontondoni-Do Ue Ala, Ama.” 28Ka do'amba mpotaeako Ira, ”Hapake anu asalakono kami meweweuo, ka kime'anggao anggaa anu inehe-Do Ue Ala?” 29Sumangki Ira i Yesu, ”Ndiomo anggaa anu inehe-Do Ue Ala, onaemo ka impe'ala-ala Ira anu tinena-Do Ue Ala.”

30Ka dompotaeako Ira, ”Petondoni hapake anu wineweu-Miu, ka kimengkitao ka mpe'ala-ala Komiu? Anggaa hapake anu wineweu-Miu? 31#Pel. 16:4, 15; Pud. 78:24 Uempu'umami mpongkaa iramo roti mana i pada one, kana hinao teburi: Ondae Dopakaako ira roti inso i suruga.”

32Ka motae Ira i Yesu ndi ondae, ”Kupauakomiu, menteeano komba i Musa anu moweeakomiu roti inso i suruga, tendeano Ondae Ama-Ku anu moweeakomiu roti anu mentee inso i suruga. 33Hangano roti anu inso ndi Ondae Ue Ala onaemo roti anu metii inso i suruga ka anu moweeakono tuwua wawontolino.” 34Ka dompotaeako Ira, ”Ue, Ipowee kami mpiha roti atuu.” 35Motae Ira i Yesu ndi ondae, ”Ongkuemo roti tuwua; ba isema aiwa ndi Ongkue, nahi ta mokoninggo mbo'u, ka ba isema anu me'ala-ala Aku, nahi ta mokoranga mbo'u. 36Sine umariomo Kupauakomiu: Maupo imengkita Akumo, nahi impompe'ala-ala. 37Luwuno anu Dowee Aku i Ama, ira mehawe ndi Ongkue, ka ba isema anu aiwa ndi Ongkue, nahi Aku tumadio. 38Hangano metii Akumo inso i suruga komba ka Kupoweweu po'ehe-Ku, sine ka Kuweweuo po'ehe-Do anu tumena Akumo. 39Ka ndiomo po'ehe-Do anu tumena Akumo, onaemo inso a luwuno anu Dowee Akumo ka si hina anu tetadi, sine ka Kuwangu ira a oleo pokotampulaano wawontolino. 40Hangano ndiomo po'ehe-Do Ama-Ku, onaemo sompo mia, anu kumita Ira i Ana ka anu me'ala-ala Ira ka dompohawe tuwua anu nahina tampulaano, ka a tampulaano wawontolino ka Kuwanguo.”

41Onaemo ka dompewuruki to Yahudi mongkona Ondae, hangano motae Iramo, ”Ongkuemo roti anu metii inso i suruga.” 42Dompotae, ”Kombake Ondae andio i Yesu, anano i Yusupu, anu ine ka ama-Do tomento'orio? Kana'umpe ka Dopokompotae: Metii Akumo inso i suruga?” 43Dosangki ira i Yesu, ”Si mpewuruki.

44Nahina maupo te'asa mia anu moko'aiwa ndi Ongkue, tewala nahi Dopadiio i Ama anu tumena Aku, ka onae Aku wanguo a pokotampulaano wawontolino. 45#Yes. 54:13 Hinao teburi a wuntado nabi: Ka luwudo Ondae Ue Ala paguru ira. Ka sompo mia, anu rumongeomo ka tumarimao pompaguru inso ndi Ondae i Ama, aiwa ndi Ongkue. 46Mongkona atuu, komba nine hinao mia anu kumita Iramo i Ama. Butu Ondae anu hawe inso ndi Ondae Ue Ala, Ondaemo anu kumita Ira i Ama. 47Kupauakomiu, menteeano ba isema mompe'ala-ala, onae hinaomo tuwua anu nahina tampulaano.

48Ongkuemo roti tuwua. 49Uempu'umiu mpongkaa iramo roti mana i pada one ka memate iramo. 50Ndiomo roti anu metii inso i suruga: Ba isema kumaano, nahi ta mate. 51Ongkuemo roti tuwua anu metii inso i suruga. Tewala asa mia mongkaa roti andio, onae ta tuwu nahina tampulaano, ka roti anu Kuweeakono atuu koroi-Ku, anu Aku weeakono wawontolino tuwuano.”

52Mpengenge iramo to Yahudi pada ondaedo ka dompotae, ”Kana'umpe Ondae andio ka Dopokoweeakita koroi-Do ka tomengkaano.” 53Ka motae Ira i Yesu ndi ondae, ”Kupauakomiu, menteeano tewala nahi imengkaano koroi-Do i Ana Manusia ka me'inuo rea-Do, nahina tuwua a ngkoroimiu. 54Ba isema mongkaa koroi-Ku ka mo'inu rea-Ku, onae hinaomo tuwua anu nahina tampulaano ka Aku wanguo a pokotampulaano wawontolino. 55Hangano koroi-Ku onaemo kaanga ntu'u ka rea-Ku onaemo inua ntu'u. 56Ba isema mongkaa koroi-Ku ka mo'inu rea-Ku, onae mo'ia i laro-Ku ka Ongkue i larono. 57Mengkena kana Ondae i Ama anu tuwu tumena Aku ka Kutuwu hangano Ondae i Ama, kanatuu koa mbo'u ba isema mongkaa koroi-Ku, ta tuwu hangano Ongkue. 58Ndiomo roti anu metii inso i suruga, komba roti kana anu kinaado uempu'umiu ka memate iramo. Ba isema mongkaa roti andio, onae ta tuwu nahina tampulaano.”

59Luwuno andio Dopauo i Yesu i Kapenau tempono Dopompaguru a raha tepumpua.

Ana guru anu mponsuka i Galilea

6:60-66

60Umarido merongeo luwuno atuu hadio inso a ana guru-Do i Yesu anu mpotae, ”Pau andio mokora, isemake anu polio rumongeo?” 61Ondae i Yesu i laro aroa-Do Doto'orio, nine mongkona pinau-Do atuu dompewurukiako ana guru-Do, onaemo ka Dopotaeako ira, ”Nde teleluke pompe'ala-alamiu hangano pau atuu? 62Ka kana'umpeke, tewala imengkita Ira i Ana Manusia mewuatako a mpo'ianga-Do se'eluno? 63Penaamo anu mompowee tuwua, koroi nahina tuduno. Luwuno pau anu pinau-Ku ndi omiu onaemo penaa ka tuwua. 64Sine i olomiu hinao anu nahi pompe'ala-ala.” Hangano inso a pompu'uano Doto'orio i Yesu, isema anu nahi pompe'ala-ala ka isema anu ta meweengako Ira. 65Ka Do'amba motae, ”Onaemo pu'uno Kupauakomiumo: Nahina maupo te'asa mia moko'aiwa ndi Ongkue, tewala komba Ondae i Ama meweengakono ndi onae.” 66Mompu'u inso a tempo atuu hadio ana guru-Do memposuka ka nami domentonda Ira mbo'u.

Mangakuno i Peturu

6:67-71

67Onaemo ka Dopotae i Yesu a hopulu ka orua ana guru-Do, ”Omiu mbo'u nahi komiu melakoke?” 68#Mat. 16:16; Mrk. 8:29; Luk. 9:20 Isangki Ira i Simo Peturu, ”Ue, ndi semake kami melako? Pau-Miu onaemo pau tuwua anu nahina tampulaano; 69ka kimpe'ala-alaomo ka mento'orio nine Omiu Anu Mempori inso ndi Ondae Ue Ala.” 70Sumangki Ira i Yesu, ”Kombake Ongkue-Ku anu biniki komiu anu hopulu ka orua andio? Sine asa mia i olomiu onaemo i Mosa'o.” 71Anu tinoo-Do onaemo i Yudasi, anano i Simo Karioti; hangano onaemo anu ta meweengako Ira i Yesu, onae asa mia i olodo hopulu ka orua ana guru atuu.

Atualmente Selecionado:

I YOHANE 6: XMZ

Destaque

Copiar