Yohana 19

1Mumu bahalapala Pilato akantoliti Yesu, na akantowiti. 2Na askari wakalukiti njingwa ya mifwa, na wakayiwikiti pa mutu wake, ni wakanfwatiki yombe mwingila ukele; 3na wakanchilili ni kujowa, Tikulamusa, Mutwa wa waYehudi! ni wakantowiti malupi. 4Na Pilato akapititi kunja kawili, kuwajowela, Lola, niyicha nako kwinu kunja, nausi mupate kumanya kukita nikolela lepa nyimu yiyi yoha pa yombe. 5Mumu Yesu akapititi kunja, wakufwata njingwa ya mifwa ni mwingila ukele. Nu Pilato awajowela, Lola, mundu! 6Mumu pala makasisi makulungu na wa polisi wakambweni, wakakuwiti, kujowa, Mumbambaye, mumbambaye pa msalaba. Pilato awajowela, Muntolaye mwawene, mumbambaye pa msalaba: pakuya nenga nikolela lepa nyimu pa yombe. 7Wakamhigiti waYehudi, Tenga tiyii ni torah, na kwa ndingo wa torah yila ayii ni nsigilo wa kufwa, ndawa ayikitaga Mwana wa Mulungu. 8Mumu apa Pilato akaliyufwini lilowe ili, akalutili kuyogopa; na akayingili kawili mu Pretorio, 9na anjowela Yesu, Wenga uyii kuhumila kuliku? Leka Yesu akampili lepa lihigo. 10Mumu Pilato anjowela, Ulongela lepa nu nenga? nakumanya wenga kukita niyii ni chengo kukuwopola, ni niyii ni chengo kukuwamba pa msalaba? 11Yesu akamhigiti, Ngautemi lepa ni chengo kiyi kyoha pa nenga, lema kupelewa kwako kuhumila kunani: ndawa ya iyi uyu wa kunifumbukisa kwako ayii ni sambi ya kulutila. 12Kitumbulile iki Pilato akagesiti kumbopola; leka waYehudi wakakuwiti, kujowa, Wona umbopola uyu, uyilepe nkosi mundu Kaisar: ayi yoha uyu wikita mutwa ampindika Kaisar. 13Mumu Pilato apa akayufwini malowe aga, akachiti nako Yesu kunja, na akatemi pasi pa kitihu kya kupaula pandu pa kukemeleka Pa maganga ga kuyala, leka pa kiHebrayo, Gabbatha. 14Leka kwayili ligono lya kuwikila ngani pasaka: yikayili ngati saa sita. Na awajowela waYehudi, Mulolaye, Mutwa winu! 15Mumu wakakuwiti, Mumbuse, mumbuse, mumbambaye pa msalaba. Pilato awajowela, Nimbambaye pa msalaba mutwa winu? Makasisi makulungu wakahigiti, Tiyilepe mutwa yungi lema Kaisar. 16Mumu bahalapala akampeliki yombe kwawe, nausi awambikaye pa msalaba.

17Mumu wakantoliti Yesu: nakapititi, kwitwikila mwene msalaba wake, mpaka pandu pa kukemeleka Kitunga kya mutu, pa kukemeleka pa kiHebrayo, Golgotha: 18uku wakambambiti pa msalaba, na pamonga nuyombe wangi wawili, yungi uku nu yungi uku, leka Yesu pagati. 19Leka Pilato akalembiti kawili lihina lya ntundu wake, na akaliwikiti panani pa msalaba. Na kikalembiki, yesu wa nazareti, mutwa wa wa yehudi. 20Mumu waYehudi wingi wakasomiti lilembo ili: pakuya pandu pala Yesu akawambiki pakayili papipi ni likaya: ni likalembiki pa kiHebrayo, ni pa kiLatin, ni pa kiGriki. 21Mumu makasisi makulungu wa waYehudi wakanjowili Pilato, Usilemba, Mutwa wa waYehudi; koma kukita mwene uyu akajowiti, Nenga niyii Mutwa wa waYehudi. 22Pilato akahigiti, Iki nilembiti, nilembiti.

23Mumu askari, apa wambambiti Yesu pa msalaba, wakatoliti fifwato fyake, ni wakakiti malundu ncheche, lilundu kwa askari ayi yoha; na mwingila kawili: leka mwingila ukayili wangali lutoto, ukalukiki kitumbulile panani mpaka pasi. 24Mumu wakajowini, Tisiukachula, koma tiulondolele pa uwu, yauye wa nani: nausi lilembo limemasike, lila lijowa.

Wagawini fifwato fyangu,

Ni pa mwingila wangu wakalondolili.

25Mumu askari wakakiti ifi. Koma wakayili mu kuyima pa msalaba wake Yesu nyina, nu nung’una wa nyina, Maria wa Kleopa, nu Maria Magdalene. 26Mumu Yesu pa akambweni nyina, na mwanafunsi yula anganiti ayimi papipi, anjowela nyina, Ndala, lola, mwanao! 27Na anjowela mwanfunsi yula, Lola, nyoko! Na kitumbulile saa yiyilayila mwanafunsi yuyu akanjupiti kiyingalile kwa yombe mwene.

28Panyuma pa iki Yesu, pa akamanyiti kukita goha gamalakasiki hino, nausi malembo gamalakasike, ajowa, Niwona nywita. 29Kiwiga kikawikiki baho kya kumema nu mvinyo wa kuwawa: mumu wakapagiki sponge ya kumema nu mvinyo wa kuwawa panani pa lidete, na wakankingiti yombe ku ndomo. 30Mumu pala Yesu akayupiti mvinyo wa kuwawa, akajowiti, Yimalakasiki: na apa akayinamisi mutu, akapeliki roho.

31Mumu waYehudi, ndawa likayili ligono lya kuwikila ngani, nausi miwili isihwela pa msalaba sabato ila (pakuya ligono lya sabato lililalila likayili likulungu), wakanduwiti Pilato kukita magulu gawe gadumulike, na wawusike. 32Mumu askari wakachiti, na wakadumwili magulu ga yula wa kutumbula, na ga njini wa kuwambika pa msalaba pamonga nuyombe: 33koma apa wakachiti pa Yesu, na wakaweni kukita amaliti kufwa, wakadumwili lepa magulu gake: 34koma yumonga wa askari akamhomiti pa luwafu lwake nu ngoha, ni hino apa ukapititi mwasi na machi. 35Na yula aweni alasiti ulungamakiso, nu ulungamakiso wake uyii wa chakaka: na amanya kukita ajowa fya chakaka, nausi mwenga kawili mukele. 36Pakuya aga gakakitiki, nausi malembo gamemasike, 37Lipufa lya yombe yalidumulike lepa. Na kawili lilembo lingi lijowa, Yawambone yula wakamhomiti.

38Na panyuma pa aga Yosefu wa Arimathaya, pakuya mwanafunsi wake, koma wa kufihama ndawa ya kuwayogopa waYehudi, akanduwiti Pilato kukita awuse mbili wa Yesu: na Pilato akayitakili. Mumu akachiti na akawusiti mbili wake. 39Leka akachiti Nikodemo kawili, uyu akanchilili yombe kilo pa kutumbula pala, kutola kya kuhasangana kya muro na ahaleth, papipi ni ma‐pound mia. 40Mumu wakatoliti mbili wa Yesu, ni wakaukungiti ni nguo pamonga na fya kunungalila, umu ukayili nkuwu wa waYehudi kwa kuwika pa manyinja. 41Leka ukayili pandu pala akawambiki pa msalaba ngunda; ni pa ngunda manyinja ga hino pala akawikiki lepa mundu. 42Mumu bahalapala ndawa ya ligono lya kuwikila ngani lya waYehudi (ndawa manyinja gakayili papipi) wakambikiti Yesu.

Atualmente Selecionado:

Yohana 19: MGS1937

Destaque

Copiar