Yohana 18

1Yesu apa akajowiti malowe aga, akapititi pamonga na wanafunsi wake kuyomboka nkuka Kidron, uko ukayili ngunda, umu akayingili mumu, yombe ni wanafunsi wake. 2Leka Yuda kawili akamanyiti pandu pala, yula wa kunfumbukisa: pakukita pingi pingi Yesu pamonga na wanafunsi wake wakokanaga kukulakula. 3Mumu Yuda, pakayupiti lipuga, na askari kuhumila pa makasisi makulungu na waFarisayo, ahicha kuku ni nyali ni miengi na fya ngondo. 4Mumu Yesu, pakamanyiti fyoha fiyii mu kuhicha pa yombe, akapititi ni awajowela, Mundondandonda nani? 5Wakamhigiti, Yesu wa Nazareti. Yesu awajowela, Nenga niyii. Leka Yuda wa kunfumbukisa kawili akayimi pamonga na wombe. 6Mumu hino apa akajowiti kwa wombe, Nenga niyii, wakakilawukili munyuma, na wakagwili pasi. 7Mumu akawakotiti kawili, Mundondandonda nani? Leka wakajowiti, Yesu wa Nazareti. 8Yesu akahigiti, Nikatawili mwenga kukita nenga niyii: mumu wona munilondalonda nenga, muwapele mwanja awa wawuke: 9nausi limemasike lilowe lila akajowiti, Wala unipili, nakutaga lepa haka yumonga wa wombe. 10Mumu Simon Petro pakuya nu upanga akauholomwili, na akantowiti mbanda wake wa kasisi nkulungu, na akandumwili likutu lya kigosi. Leka lihina lya mbanda likayili Malko. 11Mumu Yesu akajowiti kwa Petro, Homeka upanga pa ligonelo lyake: ntimbo wula Dadi anipili, yaninywe lepa ati?

12Mumu lipuga na kapitao wawe, na wa polisi wa waYehudi, wakankamwili Yesu ni kunkunga, 13na wakachiti nako kwa Anna pa kutumbula; pakuya akayili nkwii mundu wa Kayafa, yuyu akayili kasisi nkulungu mwaka wuwulawula. 14Leka Kayafa akayili yula akawapangili waYehudi luhala, kukita kinogele kukita mundu yumonga aufwile nsafi.

15Leka Simon Petro akankisiti Yesu, nu mwanafunsi yungi. Leka mwanafunsi yuyulayula akayili wa kumanyika na kasisi nkulungu, na akayingili mumu pamonga nu Yesu ku lihegele lya kasisi nkulungu; 16leka Petro akayili mu kuyima pa ndyango kunja. Mumu mwanafunsi yungi yula, uyu akayili wa kumanyika na kasisi nkulungu, akapititi na akalongili kwa ndala wa kulindalila pa ndyango, na akanjingisi Petro. 17Mumu mhinja wa kulindalila pa ndyango anjowela Petro, Si wenga kawili wa wanafunsi wa mundu uyu? Ajowa, Nakuya nenga. 18Leka wawanda na wa polisi wakayimi baho, pala wakositi mwoto wa makenya; pakukita kusisima kukayili; na wakayili mu kuyota mwoto: na Petro kawili akayili nawo, kuyima na kuyota mwoto.

19Mumu kasisi nkulungu akankotiti Yesu ya wanafunsi wake, na ya mayigaliso gake. 20Yesu akamhigiti, Nenga nilongili mu ndima pa lulanga; magono goha nikayigalisi mu masunagoge, ni mu hekalu, pala waYehudi woha wakokana; ni pa kufihika nikalongili lepa kindu. 21Kwa kiki unikota nenga? ukotaye wombe wala wayufwini, kiki nikalongili nawo: lola, wala wamanya aga nikajowiti. 22Na pa akajowiti aga, yumonga wa wakuyima baho wa polisi akantowiti Yesu nu lupi, kujowa, Umhiga wiwi kasisi nkulungu? 23Yesu akamhigiti, Wona nikalongili muwifu, ulasaye ulungamakiso wa kiwifu: leka wona munofu, unitowela kiki? 24Mumu Anna akampeliki yombe wakukungika kwa Kayafa kasisi nkulungu.

25Leka Simon Petro akayili kuyima nu kuyota mwoto. Mumu wakajowiti kwa yombe, Ati si wenga kawili uyii wa wanafunsi wake? Akabeliti na akajowiti, Nakuya nenga. 26Ajowa yumonga wa wawanda wa kasisi nkulungu, pakuya wa nsafi wake yula Petro akandumwili likutu, Ati nikakuweni lepa mu ngunda pamonga nuyombe? 27Mumu Petro akabeliti kawili: ni hino apa lijogolo likawikiti.

28Mumu wantola Yesu kuhuma pa Kayafa kuyingila mu Pretorio: ni lukela lukayili; nawombe wakayingili lepa mu Pretorio, nausi wasilekaleka lwokolo, koma walye pasaka. 29Mumu Pilato akapititi kunja kwa wombe, na akajowiti, Mundetela mhalo kiki mundu uyu? 30Wakahigiti, nakajowiti kwa yombe, Wona uyu nakuya wakukita fiwifu, ngatinfumbwili lepa kwako. 31Mumu Pilato akajowiti kwa wombe, Muntolaye yombe mwenga mwawene, nu mumpaulaye kwa ndingo wa torah yinu. WaYehudi wakajowiti kwa yombe, Pa waka chengo kwa tenga kunkoma mundu: 32nausi lilowe lya Yesu limemasike, lila akajowiti, kulasa kifwa wuli kila yaafwe nakyo.

33Mumu Pilato akayingili kawili mu Pretorio, na akankemili Yesu, nakajowiti kwa yombe, Wenga uyii Mutwa wa waYehudi? 34Yesu akahigiti, Wenga ujowa iki kuhumila pa wenga wa mwene, pangi wangi wakajowiti kwa wenga ya nenga? 35Pilato akahigiti, Wila nenga mYehudi? Mhuku wako wa mwene na makasisi makulungu wakufumbukisi kwa nenga: ukakiti kiki? 36Yesu akahigiti, Utwa wangu nakuya wa ndima uwu: wona utwa wangu ukayili wa ndima uwu, askari wangu ngawakikasili, nausi nisifumbulika kwa waYehudi: koma hino utwa wangu nakuya wa bahapa. 37Mumu Pilato akajowiti kwa yombe, Wila wenga uyii mutwa ati? Yesu akahigiti, Ujowa wenga kukita mutwa niyii. Kiyingalile pa iki nihogoliki, na kiyingalile pa iki nichiti mu ndima uwu, nausi nilase ulungamakiso wa fya chakaka. Ayi yoha uyu ayii wa pa chakaka ayufwana njowelo yangu. 38Pilato anjowela, Kiki kiyii kya chakaka?

Ni apa akajowiti iki, akapititi kawili kunja kwa waYehudi, na awajowela, Nenga nikolela lepa nyimu yiyi yoha pa yombe. 39Leka muyii ni nkuwu, kukita niwawopolele mwenga yumonga pa pasaka: mumu mulonda niwawopolele Mutwa wa waYehudi? 40Mumu wakakuwiti kawili ni kujowa, Nakuya mundu uyu, koma Barabbas. Leka Barabbas akayili ndugu.

Atualmente Selecionado:

Yohana 18: MGS1937

Destaque

Copiar