ወንጌል ዘዮሐንስ 6

ምዕራፍ 6

1 # ማቴ. 14፥13-21፤ ማር. 6፥30-44። ወእምድኅረ ዝንቱ ሖረ እግዚእ ኢየሱስ ማዕዶተ ባሕረ ገሊላ ኀበ ጥብርያዶስ። 2ወተለውዎ ብዙኃን አሕዛብ እስመ ርእዩ ተአምረ ዘገብረ በላዕለ ድዉያን። 3ወዐርገ እግዚእ ኢየሱስ ውስተ ደብር ወህየ ነበረ ምስለ አርዳኢሁ። 4#2፥13፤ 11፥55። ወቀርበ በዓለ ፋሲካሆሙ ለአይሁድ።

በእንተ ኀምስ ኅብስት ወክልኤ ዓሣ

5 # ማቴ. 14፥15-21፤ ማር. 6፥34-44፤ ሉቃ. 9፥12-17። ወአንሥአ አዕይንቲሁ እግዚእ ኢየሱስ ወርእየ ብዙኃነ ሰብአ እንዘ ይመጽኡ ኀቤሁ ወይቤሎ ለፊልጶስ እምአይቴ ንሣየጥ ኅብስተ ዘናበልዖሙ ለእሉ። 6ወዘንተ ይቤ እንዘ ያሜክሮ ወውእቱሰ የአምር ዘሀለዎ ይግበር። 7ወአውሥአ ፊልጶስ ወይቤሎ ዘክልኤቱ ምእት ዲናር ኅብስት ኢየአክሎሙ ከመ ይንሥኡ በበሕቅ ለለአሐዱ እምኔሆሙ። 8ወይቤሎ አሐዱ እምአርዳኢሁ ዘውእቱ እንድርያስ እኁሁ ለስምዖን ጴጥሮስ። 9ሀሎ ዝየ ወልድ ዘቦቱ ኀምስ ኅብስተ ሰገም ወክልኤቲ ዓሣት ወባሕቱ ምንተ ይበቍዓ እማንቱ ለዘመጠነዝ ሰብእ። 10ወይቤሎሙ እግዚእ ኢየሱስ ግበሩ ምርፋቃተ ለሰብእ ወብዙኅ ሣዕሩ ለውእቱ መካን ወረፈቁ ዲበ ሣዕር ዕደዊሆሙ ወየአክል ኍልቆሙ መጠነ ኀምሳ ምእት ብእሲ። 11ወነሥአ እግዚእ ኢየሱስ ውእተ ኅብስተ ወአእኰተ ባረከ ወፈተተ ወወሀቦሙ ለአርዳኢሁ ወአርዳኢሁኒ አቅረቡ ለሰብእ ወእምዓሣሁኒ ከማሁ መጠነ ፈቀዱ። 12ወእምድኅረ በልዑ ወጸግቡ ይቤሎሙ እግዚእ ኢየሱስ ለአርዳኢሁ አስተጋብኡ ዘተርፈ ፍተታተ ከመ አልቦ ዘይትገደፍ ወኢምንትኒ እምኔሆን፤ 13ወአስተጋብኡ ወመልአ ዐሠርተ ወክልኤተ መሣይምተ እምኀምስቱ ኅብስተ ሰገም ዘተርፈ ፍተታት እምዘ በልዑ ወጸግቡ። 14#ዘዳ. 18፥15-18። ወርእዮሙ ሕዝብ ዘገብረ ተአምረ እግዚእ ኢየሱስ ይቤሉ አማን ነቢይ ውእቱ ዝንቱ ዘመጽአ ውስተ ዓለም።

ዘከመ ሖረ እግዚእ ኢየሱስ ዲበ ባሕር

15ወአእመሮሙ እግዚእ ኢየሱስ ከመ ይፈቅዱ ይምጽኡ ይምሥጥዎ ወያንግሥዎ ወተግኅሠ ውስተ ደብር ባሕቲቶ። 16#ማቴ. 14፥22-31፤ ማር. 6፥45-52። ወመስዮ ወረዱ አርዳኢሁ ውስተ ባሕር። 17ወዐርጉ ሐመረ ወሖሩ ማዕዶተ ባሕር ኀበ ቅፍርናሆም ወናሁ ወድአ ኮነ ጽልመት ወዓዲሁ ኢመጽአ እግዚእ ኢየሱስ ኀቤሆሙ። 18ወባሕርሰ ይትሀወክ እስመ ዐቢይ ነፋስ ይነፍኅ። 19ወኀሊፎሙ መጠነ ዕሥራ ወኀምስቱ ምዕራፍ አው ሠላሳ ርእይዎ ለእግዚእ ኢየሱስ እንዘ የሐውር ዲበ ባሕር ወቀርበ ኀበ ሐመር ወፈርሁ። 20#ኢሳ. 43፥1-3። ወይቤሎሙ አነ ውእቱ ኢትፍርሁ። 21ወእንዘ ይፈቅዱ ያዕርግዎ ውስተ ሐመር በጽሐት ሐመር ሶቤሃ ውስተ ምድር ኀበ ዘፈቀዱ ይሑሩ። 22ወበሳኒታ ሰብእ እለ ይቀውሙ ማዕዶተ ባሕር ርእዮሙ ከመ አልቦ ህየ ካልእ ሐመር ዘእንበለ አሐቲ ሐመር ወከመሂ ኢዐርገ እግዚእ ኢየሱስ ምስለ አርዳኢሁ ውስተ ሐመር አላ አርዳኢሁ ባሕቲቶሙ ሖሩ። 23ወመጽኣ ካልኣትኒ አሕማር እምጥብርያዶስ ቅሩበ ብሔር ኀበ በልዑ ኅብስተ ዘባረከ እግዚእነ። 24ወሶበ ርእዩ እሙንቱ ሰብእ ከመ ኢሀሎ እግዚእ ኢየሱስ ህየ ወኢአርዳኢሁ ዐርጉ ውስተ ውእቶን አሕማር ወበጽሑ ቅፍርናሆም ይኅሥሥዎ ለእግዚእ ኢየሱስ። 25ወሶበ ረከብዎ በማዕዶተ ባሕር ይቤልዎ ረቢ ማእዜ መጻእከ ወበጻሕከ ዝየ። 26ወአውሥአ እግዚእ ኢየሱስ ወይቤሎሙ አማን አማን እብለክሙ ከመ አኮ አንትሙ ዘተኀሥሡኒ በእንተ ዘርኢክሙ ተአምራተ አላ በእንተ ዘበላዕክሙ ኅብስተ ወጸገብክሙ። 27#16፥4-14። ተገብሩ እንከሰ አኮ ለመብልዕ ኀላፊ አላ ለመብልዕ ዘይነብር ለሕይወት ዘለዓለም ዘይሁበክሙ ወልደ ዕጓለ እመሕያው እስመ ለዝሰ እግዚአብሔር አብ ኀተሞ። 28ወይቤልዎ ምንተ ንረሲ ከመ ንግበር ግብረ እግዚአብሔር። 29#1ዮሐ. 3፥23። ወአውሥአ እግዚእ ኢየሱስ ወይቤሎሙ ዝንቱ ውእቱ ግብረ እግዚአብሔር ከመ ትእመኑ በዘፈነወ ውእቱ። 30ወይቤልዎ ምንተ ተአምረ ትገብር ከመ ንርአይ ወንእመን ብከ በዘገበርከ። 31#ዘፀ. 16፥4-15፤ መዝ. 77፥24። አበዊነሰ መና በልዑ በገዳም በከመ ጽሑፍ «ኅብስተ እምሰማይ ወሀቦሙ ይብልዑ።» 32ወይቤሎሙ እግዚእ ኢየሱስ አማን አማን እብለክሙ አኮ ሙሴ ዘወሀበክሙ ውእተ ኅብስተ እምሰማይ አላ አቡየ ወሀበክሙ ኅብስተ ጽድቅ እምሰማይ። 33#ዘዳ. 8፥3። እስመ ኅብስቱ ለእግዚአብሔር ውእቱ ዘወረደ እምሰማይ ወይሁብ ሕይወተ ዘለዓለም። 34ወይቤልዎ እግዚኦ ሀበነ በኵሉ ጊዜ እምውእቱ ኅብስት። 35#4፥14፤ ኢሳ. 55፥1። ወይቤሎሙ እግዚእ ኢየሱስ አነ ውእቱ ኅብስተ ሕይወት ወዘይመጽእ ኀቤየ ኢይርኅብ ወዘሂ የአምን ብየ ኢይጸምእ ለዝሉፉ። 36ወእቤለክሙ ባሕቱ ርኢክሙኒሂ ወኢአመንክሙኒ። 37#17፥6-9፤ ማቴ. 11፥28። ወኵሉ ዘወሀበኒ አቡየ ይመጽእ ኀቤየ ወለዘሂ መጽአ ኀቤየ ኢይሰድዶ ወኢያውፅኦ አፍኣ። 38#4፥34። እስመ አኮ ዘወረድኩ እምሰማይ ከመ እግበር ፈቃድየ ዘእንበለ ፈቃዱ ለዘፈነወኒ። 39#3፥14፤ ዘኍ. 21፥8-9። ወዝንቱ ውእቱ ፈቃዱ ለዘፈነወኒ አብ ከመ ኵሉ ዘወሀበኒ ኢይትኀጐል እምኔሆሙ ወኢአሐዱሂ አላ አነ አነሥኦ በደኃሪት ዕለት። 40ወዝንቱ ውእቱ ፈቃዱ ለአቡየ ከመ ኵሉ ዘርእዮ ለወልድ ወአምነ ቦቱ ይረክብ ሕይወተ ዘለዓለም ወአነ አነሥኦ በደኃሪት ዕለት። 41ወአንጐርጐሩ አይሁድ በእንቲኣሁ እስመ ይቤሎሙ አነ ውእቱ ኅብስተ ሕይወት ዘወረደ እምሰማይ። 42#ማቴ. 13፥55። ወይቤሉ አኮኑ ዝንቱ ውእቱ ኢየሱስ ወልደ ዮሴፍ ዘለሊነ ነአምር አባሁ ወእሞ ወእፎ እንከ ይብለነ እምሰማይ ወረድኩ። 43ወአውሥአ እግዚእ ኢየሱስ ወይቤሎሙ ኢታንጐርጕሩ በበይናቲክሙ። 44አልቦ ዘይክል መጺአ ኀቤየ እመ ኢሰሐቦ አብ ዘፈነወኒ ወአነ አነሥኦ በደኃሪት ዕለት። 45#ኢሳ. 54፥13፤ ኤር. 31፥33-34። ወሀሎ ጽሑፍ ውስተ መጽሐፈ ነቢያት «ከመ ይከውኑ ኵሎሙ ምሁራነ እምኀበ እግዚአብሔር» ወኵሉ እንከ ዘሰምዐ በኀበ አቡየ ተምሂሮ ይመጽእ ኀቤየ። 46#1፥18፤ ማቴ. 11፥27፤ 1ጢሞ. 6፥16። ወአልቦ ዘርእዮ ለአብ ዘእንበለ ዘእምኀቤሁ ለእግዚአብሔር ውእቱ ወውእቱ ርእዮ ለአብ። 47#3፥16። አማን አማን እብለክሙ ዘየአምን ብየ ቦ ሕይወት ዘለዓለም። 48አነ ውእቱ ኅብስተ ሕይወት። 49#1ቆሮ. 10፥3-5። አበዊክሙሰ መና በልዑ በገዳም ወሞቱ። 50ዝንቱ ውእቱ ኅብስት ዘእምሰማይ ወረደ ወኵሉ ዘበልዐ እምኔሁ ኢይመውት። 51#11፥26፤ ገላ. 2፥20፤ ዕብ. 10፥10። አነ ውእቱ ኅብስተ ሕይወት ዘወረደ እምሰማይ ወዘበልዐ እምዝንቱ ኅብስት የሐዩ ለዓለም ወዝኒ ኅብስት ዘአነ እሁቦ ሥጋየ ውእቱ በእንተ ሕይወት ዘለዓለም። 52ወተጋዐዙ አይሁድ በበይናቲሆሙ እንዘ ይብሉ እፎ ይክል ዝንቱ የሀበነ ሥጋሁ ንብላዕ። 53ወይቤሎሙ እግዚእ ኢየሱስ አማን አማን እብለክሙ እመ ኢበላዕክሙ ሥጋሁ ለወልደ ዕጓለ እመሕያው ወኢሰተይክሙ ደሞ አልብክሙ ሕይወት ላዕሌክሙ። 54ዘበልዐ ሥጋየ ወሰትየ ደምየ ቦ ሕይወት ዘለዓለም ወአነ አነሥኦ በደኃሪት ዕለት። 55እስመ ሥጋየኒ መብልዐ ጽድቅ ዘበአማን ውእቱ ወደምየኒ ስቴ ሕይወት ዘበአማን ውእቱ። 56#15፥4፤ 1ዮሐ. 3፥24። ዘበልዐ ሥጋየ ወሰትየ ደምየ ይሄሉ ምስሌየ ወአነሂ እሄሉ ምስሌሁ። 57ወበከመ ዘፈነወኒ አብ ሕያው ወአነሂ ሕያው በእንተ አብ ወዘበልዐ ሥጋየ የሐዩ በእንቲኣየ። 58ዝኬ ውእቱ ኅብስት ዘእምሰማይ ወረደ ወአኮ በከመ በልዑ አበዊክሙ መና ወሞቱ ወዘበልዖሰ ለዝንቱ ኅብስት የሐዩ ለዓለም።

በእንተ እለ ተዐቅፉ

59ወከመዝ ይቤሎሙ በምኵራብ ዘቅፍርናሆም እንዘ ይሜህሮሙ። 60ወብዙኃን እምአርዳኢሁ እለ ሰምዑ ዘንተ ወይቤሉ ዕፁብ ዝንቱ ነገር ወመኑ ይክል ሰሚዖቶ። 61ወአእመሮሙ እግዚእ ኢየሱስ በመንፈሱ ከመ አንጐርጐሩ አርዳኢሁ በእንተ ዝንቱ ወይቤሎሙ ዝኑ ያዐቅፈክሙ። 62እፎ እንከ እመ ርኢክምዎ ለወልደ ዕጓለ እመሕያው እንዘ የዐርግ ኀበ ሀሎ ቀዲሙ። 63#2ቆሮ. 3፥6። መንፈስ ውእቱ ዘያሐዩ ወሥጋሰ አልቦ ዘይበቍዕ ወኢምንተኒ ወዝኒ ቃል ዘአነ ነገርኩክሙ መንፈስ ውእቱ ወሕይወት ውእቱ። 64#13፥10-11። ወባሕቱ ቦ እምውስቴትክሙ እለ ኢየአምኑ እስመ የአምር እግዚእ ኢየሱስ እምትካት እለ መኑ እሙንቱ እለ ኢየአምኑ ቦቱ ወመኑ ውእቱ ዘያገብኦ። 65ወይቤሎሙ በእንተ ዝንቱ እብለክሙ አልቦ ዘይክል መጺአ ኀቤየ ለእመ ኢተውህበ ሎቱ እምኀበ አብ። 66ወበእንተ ዝንቱ ብዙኃን እምአርዳኢሁ እለ ገብኡ ድኅሬሆሙ ወኢሖሩ እንከ ምስሌሁ። 67ወይቤሎሙ እግዚእ ኢየሱስ ለዐሠርቱ ወክልኤቱ አንትሙኒ ትፈቅዱኑ ትሑሩ። 68#1፥50፤ 11፥27፤ ማቴ. 16፥16፤ ማር. 8፥29፤ ሉቃ. 9፥20። ወአውሥአ ስምዖን ጴጥሮስ ወይቤሎ እግዚኦ ኀበ መኑ ነሐውር እንዘ ቃለ ሕይወት ዘለዓለም ብከ። 69ወንሕንሰ አመነ ወአእመርነ ከመ አንተ ውእቱ ክርስቶስ ወልዱ ለእግዚአብሔር ሕያው። 70#ሉቃ. 6፥13። ወአውሥአ እግዚእ ኢየሱስ ወይቤሎሙ አኮኑ አነ ኀረይኩክሙ ለዐሠርቱ ወክልኤቱ ወባሕቱ አሐዱ እምኔክሙ ሰይጣን ውእቱ። 71ወዘንተሰ ይቤ እንበይነ ይሁዳ ወልደ ስምዖን አስቆሮታዊ እስመ ውእቱ ሀለዎ ያግብኦ ወውእቱ አሐዱ እምዐሠርቱ ወክልኤቱ።

Atualmente Selecionado:

ወንጌል ዘዮሐንስ 6: ሐኪግ

Destaque

Copiar