ወንጌል ዘዮሐንስ 16

ምዕራፍ 16

በእንተ ጽንዐ ሃይማኖት

1ዘንተ ነገርኩክሙ ከመ ኢትትዐቀፉ። 2#9፥22፤ ማቴ. 24፥9፤ ግብረ ሐዋ. 8፥1። እስመ እምኵራባቲሆሙ ያወፅኡክሙ ወባሕቱ ትመጽእ ሰዓት ከመ ኵሉ ዘይቀትለክሙ ይመስሎ ከመ ዘመሥዋዕተ ያበውእ ለእግዚአብሔር። 3#15፥21። ወዘንተኒ ዘይገብሩ ላዕሌክሙ እስመ ኢየአምርዎ ለአብ ወኢኪያየ። 4ወባሕቱ ዘንተ ነገርኩክሙ ከመ ትዘከርዎ አመ በጽሐ ጊዜሁ ከመ አነ እቤለክሙ ወቀዲሙሰ ኢነገርኩክሙ ዘንተ እስመ ሀሎኩ ምስሌክሙ። 5#7፥33። ወይእዜሰ ባሕቱ አሐውር ኀበ አብ ዘፈነወኒ ወኢአሐዱሂ እምኔክሙ ኢትብሉኒ አይቴ ተሐውር። 6ወባሕቱ እስመ ዘንተ ነገርኩክሙ ኀዘን መልአ ውስተ ልብክሙ።

ዘከመ አሰፈዎሙ እግዚእ ኢየሱስ መንፈሰ ቅዱሰ

7 # 14፥26። ወአንሰ አማን ህልወ እብለክሙ ይኄይሰክሙ እሑር አነ ኀበ አብ እስመ እመ ኢሖርኩ አነ ኢይመጽእ ጰራቅሊጦስ ኀቤክሙ ወእመሰ ሖርኩ አነ እፌንዎ ለክሙ። 8ወመጺኦ ውእቱ ይዛለፎ ለዓለም በእንተ ኀጢአት ወበእንተ ጽድቅ ወበእንተ ኵነኔ። 9#3፥18። በእንተ ኀጢአትሰ እስመ ኢአምኑ ብየ። 10ወበእንተ ጽድቅኒ እስመ አነ አሐውር ኀበ አብ ወኢትሬእዩኒ እንከ። 11#12፥31፤ 14፥30። ወበእንተሰ ኵነኔ እስመ ይትኴነን መልአኩ ለዝንቱ ዓለም። 12ወብየ ብዙኅ ነገር ዘእነግረክሙ ወባሕቱ ኢትክሉ ጸዊሮቶ ይእዜ። 13#14፥16-26፤ 1ዮሐ. 2፥27። ወመጺኦ ውእቱ መንፈሰ ጽድቅ ይመርሐክሙ ኀበ ኵሉ ጽድቅ እስመ ኢይነግር ዘእምኀቤሁ ወዘሰምዐ ዳእሙ ይነግር ወዘይመጽእሂ ይነግረክሙ። 14#17፥1፤ 1ቆሮ. 12፥3። ወኪያየ ይሴብሕ ውእቱ እስመ እምዚኣየ ይነሥእ ወይነግረክሙ ኵሎ። 15#17፥10። እስመ ኵሉ ዘቦ ለአቡየ ዚኣየ ውእቱ ወበእንተ ዝንቱ እብለክሙ እምዚኣየ ይነሥእ ወይነግረክሙ። 16#14፥19። ዓዲ ኅዳጠ ኢትሬእዩኒ ወካዕበ ኅዳጠ ትሬእዩኒ እስመ አሐውር ኀበ አብ። 17ወተባሀሉ አርዳኢሁ በበይናቲሆሙ ምንትኑ ዝንቱ ዘይብለነ ዓዲ ኅዳጠ ኢትሬእዩኒ ወካዕበ ኅዳጠ ትሬእዩኒ እስመ አሐውር ኀበ አብ። 18ወይቤሉ ምንትኑ ዝንቱ ዘይብለነ ኅዳጠ ኢነአምር ዘይትናገር ቦቱ። 19ወአእመሮሙ እግዚእ ኢየሱስ ከመ ይፈቅዱ ይሰአልዎ ወይቤሎሙ በእንተ ዝንቱኑ ትትኃሠሡ በበይናቲክሙ እስመ እቤለክሙ ዓዲ ኅዳጠ ኢትሬእዩኒ ወካዕበ ኅዳጠ ትሬእዩኒ።

በእንተ ኀዘን ወፍሥሓ

20 # ማር. 16፥10፤ ሉቃ. 24፥17። አማን አማን እብለክሙ ከመ ትበክዩ ወትላሕዉ አንትሙ ወዓለምሰ ይትፌሣሕ ወአንትሙሰ ተኀዝኑ አላ ኀዘንክሙ ፍሥሓ ይከውነክሙ። 21#ዘፍ. 3፥16፤ ኢሳ. 26፥17። በከመ ብእሲት ትቴክዝ ሶበ አልጸቀት ትለድ እስመ በጽሐ ጊዜሃ ወእምከመ ወለደት ዕጓላ ኢትዜከሮ እንከ ለሕማማ በእንተ ፍሥሓሃ እስመ ወለደት ብእሴ ውስተ ዓለም። 22#ኢሳ. 35፥10፤ 66፥14። ወከማሁ አንትሙኒ ትቴክዙ ይእዜ ወባሕቱ ካዕበ እሬእየክሙ ወይትፌሥሐክሙ ልብክሙ ወፍሥሓክሙኒ አልቦ ዘየሀይደክሙ። 23#ማር. 11፥24። ወይእተ አሚረ አልቦ ዘትስእሉኒ ኪያየ ወኢምንተኒ አማን አማን እብለክሙ ከመ እመ ሰአልክምዎ ለአብ በስምየ ኵሎ ይሁበክሙ። 24#15፥11። ወእስከ ይእዜሰ ኢሰአልክምዎ ወኢምንተኒ በስምየ ሰአሉ ወትነሥኡ ከመ ፍጹመ ይኩን ፍሥሓክሙ፥ 25ወይእዜሰ በምሳሌ ነገርኩክሙ ወባሕቱ ይበጽሕ ጊዜሁ አመ ኢይነግረክሙ በምሳሌ አላ አየድዐክሙ ክሡተ በእንተ አብ። 26ወይእተ አሚረ ትስእሉ በስምየ ወኢይብለክሙ ከመ አነ ዘእስእሎ ለአብ በእንቲኣክሙ።#ቦ ዘይጽሕፍ «ወአኮ አነ ዘእስእሎ ለአብ በእንቲኣክሙ» 27#14፥21፤ 17፥8-25። እስመ ለሊሁ አብ ያፈቅረክሙ እስመ አንትሙ አፍቀርክሙኒ ወአመንክሙኒ ከመ እምኀበ እግዚአብሔር ወፃእኩ። 28#13፥3።#ቦ ዘይጽሕፍ «ወፃእኩ እምኀበ አብ» ወመጻእኩ ውስተ ዓለም ወካዕበ አኀድጎ ለዓለም ወአሐውር ኀበ አብ። 29ወይቤልዎ አርዳኢሁ ይእዜሰ ገሃደ ተናገርከነ ወአልቦ ዘመሰልከ ወኢምንተኒ። 30#2፥25። ወይእዜ አእመርነ ከመ ኵሎ ተአምር አንተ ወኢትፈቅድ ይንግርከ መኑሂ ወበዝንቱ አእመርነ ከመ እምኀበ እግዚአብሔር ወፃእከ። 31ወይቤሎሙ እግዚእ ኢየሱስ ይእዜሰኬ አእምሩ ወእመኑ። 32ናሁኬ ይበጽሕ ጊዜሁ ወበጺሖኒ ከመ ኵልክሙ ትዘረዉ ለለአሐዱ ውስተ መካኑ ወተኀድጉኒ ባሕቲትየ ወኢኮንኩ አነ ባሕቲትየ እስመ አብ ምስሌየ ውእቱ። 33#14፥27፤ ሮሜ 5፥1፤ ቈላ. 1፥20፤ 1ዮሐ. 5፥4-5። ወዝንቱ ውእቱ ዘነገርኩክሙ ከመ በኀቤየ ሰላመ ትርከቡ ወበዓለምሰ ሀለወክሙ ሕማመ ትርከቡ ወባሕቱ ጽንዑ እስመ አነ ሞእክዎ ለዓለም።

Atualmente Selecionado:

ወንጌል ዘዮሐንስ 16: ሐኪግ

Destaque

Copiar