ወንጌል ዘዮሐንስ 13

ምዕራፍ 13

በእንተ ተፍጻሜተ ድራር ወኅፅበተ እገሪሆሙ ለሐዋርያት።

1 # 16፥28። ወእምቅድመ በዓለ ፋሲካ ሶበ ኮነ የአምር እግዚእ ኢየሱስ ከመ በጽሐ ጊዜሁ ከመ ይፈልስ እምዝንቱ ዓለም ወየሐውር ኀበ አብ ዘፈነዎ ወአፍቀሮሙ ለእሊኣሁ እለ ውስተ ዓለም ወለዝሉፉ አፍቀሮሙ። 2#ሉቃ. 22፥3። ወእንዘ ይዴረሩ ቦአ ሰይጣን ውስተ ልበ ይሁዳ ስምዖን አስቆሮታዊ ከመ ያግብኦ። 3ወሶበ ኮነ የአምር እግዚእ ኢየሱስ ከመ አወፈዮ አብ ኵሎ ውስተ እዴሁ ወከመ እምኀበ እግዚአብሔር ወፅአ ወኀበ እግዚአብሔር የሐውር። 4ወተንሥአ እምኀበ ይዴረሩ ወአንበረ አልባሲሁ ወነሥአ መክፌ ዘለንጽ ወቀነተ ሐቌሁ። 5#1ሳሙ. 25፥41። ወወደየ ማየ ውስተ ንብቲራ ወአኀዘ ይኅፅብ እገሪሆሙ ለአርዳኢሁ ወመዝመዘ በውእቱ መክፌ ዘቀነተ። 6ወበጽሐ ኀበ ስምዖን ጴጥሮስ ወይቤሎ አንተኑ እግዚኦ ዘተኀፅበኒ እገርየ። 7ወአውሥአ እግዚእ ኢየሱስ ወይቤሎ ዘእገብር አነ አንተ ኢተአምር ይእዜ ወባሕቱ ድኅረሰ ተአምሮ። 8#ራእ. 1፥5። ወይቤሎ ጴጥሮስ ኢተኀፅበኒ እገርየ ለዓለም ወአውሥአ እግዚእ ኢየሱስ ወይቤሎ አማን አማን እብለከ እመ አነ ኢኀፀብኩከ እገሪከ አልብከ ክፍል ምስሌየ። 9ወይቤሎ ስምዖን ጴጥሮስ እግዚኦ አኮ እገርየ ባሕቲቶ ዘተኀፅበኒ ወዓዲ እደውየኒ ወርእስየኒ። 10#15፥3፤ ቲቶ 3፥5። ወይቤሎ እግዚእ ኢየሱስ ዘሰ ወድአ ተኀፅበ ኢይፈቅድ ይትኀፀብ ዘእንበለ እገሪሁ ዳእሙ እስመ ንጹሕ ኵለንታሁ ወአንትሙሰ ንጹሓን አንትሙ ወባሕቱ አኮ ኵልክሙ ንጹሓን። 11#6፥70-71። እስመ የአምር እግዚእ ኢየሱስ ዘያገብኦ ወበእንተ ዝንቱ ይቤ አኮ ኵልክሙ ንጹሓን። 12ወሶበ ኀፀቦሙ እገሪሆሙ ነሥአ አልባሲሁ ወረፈቀ ካዕበ ምስሌሆሙ ወይቤሎሙ አእመርክሙኑ ዘገበርኩ ለክሙ። 13#ማቴ. 23፥8-10። አንትሙሰ ትብሉኒ ሊቅነ ወእግዚእነ ወሠናየ ትብሉ እስመ ከማሁ አነ። 14#ሮሜ 2፥10። ወሶበ እንዘ አነ እንከ ሊቅክሙ ወእግዚእክሙ ኀፀብኩክሙ እገሪክሙ ከማሁኬ አንትሙኒ ይደልወክሙ ትኅፅቡ እግረ ቢጽክሙ። 15#ሉቃ. 22፥27፤ 1ጴጥ. 2፥21። እስመ አርኣያየ ወሀብኩክሙ ከመ ትግበሩ አንትሙኒ በከመ ገብርኩ ለክሙ አነ። 16#ማቴ. 10፥24፤ ሉቃ. 6፥40፤ ዮሐ. 15፥20። አማን አማን እብለክሙ አልቦ ገብር ዘየዐቢ እምእግዚኡ ወአልቦ ሐዋርያ ዘየዐቢ እምዘፈነዎ። 17#ማቴ. 7፥8፤ ያዕ. 1፥25። ወእመሰ ዘንተ ተአምሩ ብፁዓን አንትሙ እመ ገበርክምዎ ለዝ። 18#መዝ. 40፥9። ወአኮ በእንተ ኵልክሙ ዘእብል ዘንተ እስመ አነ አአምር መኑ እሙንቱ እለ ኀረይኩ ወባሕቱ ከመ ይብጻሕ ቃለ መጽሐፍ ዘይቤ «ዘይሴሰይ እክልየ አንሥአ ሰኰናሁ ላዕሌየ።» 19ወእምይእዜሰ እነግረክሙ ዘእንበለ ይኩን ከመ አመ ኮነ ትእመኑ ከመ አነ ውእቱ። 20#ማቴ. 10፥40፤ ማር. 9፥37፤ ሉቃ. 9፥48፤ 10፥16። አማን አማን እብለክሙ ዘተወክፎ ለዘፈነውኩ አነ ኪያየ ተወክፈ ወዘኪያየ ተወክፈ ተወክፎ ለዘፈነወኒ።

ዘከመ አመረ እግዚእ ኢየሱስ ዘያገብኦ

21 # ማቴ. 26፥20-25፤ ማር. 14፥18-21፤ ሉቃ. 22፥21-23። ወዘንተ ብሂሎ እግዚእ ኢየሱስ ተሀውከ በመንፈሱ ወስምዐ ኮነ ወይቤ አማን አማን እብለክሙ ከመ አሐዱ እምኔክሙ ያገብአኒ። 22ወተናጸሩ አርዳኢሁ በበይናቲሆሙ እስመ ኢያእመሩ ወኀጥኡ ከመ እንበይነ መኑ ይብል ዘንተ። 23#21፥20። ወሀሎ አሐዱ እምአርዳኢሁ ዘይረፍቅ ውስተ ሕፅኑ ለእግዚእ ኢየሱስ ወያፈቅሮ እግዚእ ኢየሱስ። 24ወቀጸቦ ስምዖን ጴጥሮስ ሎቱ ወይቤሎ ተሰአል ወንግረነ ከመ እንበይነ መኑ ይብል ዘንተ። 25ወሖረ ወረፈቀ ውእቱ ረድእ ዲበ እንግድዓሁ ለእግዚእ ኢየሱስ ወይቤሎ እግዚኦ መኑ ውእቱ ዘያገብአከ። 26#ዘፀ. 12፥8፤ ሩት 2፥10። ወአውሥአ እግዚእ ኢየሱስ ወይቤሎ ዝውእቱ ዘአነ እጸብሕ ሎቱ ኅብስተ ወእሜጥዎ ውእቱ ዘያገብአኒ ወጸብሐ ኅብስተ ወመጠዎ ለይሁዳ ስምዖን አስቆሮታዊ። 27ወእምድኅረ ውእቱ ኅብስት ቦአ ሶቤሃ ሰይጣን ውስተ ልቡ ለይሁዳ ወይቤሎ እግዚእ ኢየሱስ ዘትገብር እንከ ፍጡነ ግበር። 28ወኢያእመሩ እለ ይረፍቁ ምስሌሁ ከመ በእንተ ምንት ይቤሎ ዘንተ። 29ወቦ እለ መሰሎሙ ከመ በእንተ አስከሬነ ቀምጠራ ዘሙዳየ ምጽዋት ዘሀሎ በኀበ ይሁዳ ዘይቤሎ እግዚእ ኢየሱስ ተሣየጥ ዘንፈቅድ ለበዓል አው ዘንሁብ ለነዳያን እስመ ውእቱ የዐቅብ አስከሬነ ቀምጠራ ዘሙዳየ ምጽዋት። 30ወተመጢዎ ይሁዳ ውእተ ኅብስተ ወፅአ ሶቤሃ በሌሊት።

ቃል ዘእምድኅረ ድራር

31ወወፂኦ ውእተ ጊዜ ይቤሎሙ እግዚእ ኢየሱስ ይእዜኬ እንከ ተሰብሐ ወልደ ዕጓለ እመሕያው ወእግዚአብሔርኒ ተሰብሐ ቦቱ። 32#12፥23። ወእመሰ እግዚአብሔር ተሰብሐ ቦቱ እግዚአብሔርኒ ይሴብሖ ወሶቤሃ ይሴብሖ ወዓዲ ካዕበ ይሴብሖ። 33#7፥34። ደቂቅየ ዓዲ ኅዳጠ መዋዕለ ሀሎኩ ምስሌክሙ ተኀሥሡኒ ወበከመ እቤሎሙ ለአይሁድ ኀበ አነ አሐውር አንትሙ ኢትክሉ መጺአ ወለክሙኒ ይእዜ እነግረክሙ።

በእንተ ሐዲስ ትእዛዝ

34 # 15፥12-17፤ 1ዮሐ. 3፥23፤ 2ዮሐ. 5። ወእሁበክሙ ሐዲሰ ትእዛዘ ከመ ትትፋቀሩ በበይናቲክሙ በከመ አነ አፍቀርኩክሙ ከማሁ አንትሙኒ ተፋቀሩ በበይናቲክሙ። 35ወበዝንቱ የአምረክሙ ኵሉ ከመ አርዳእየ አንትሙ እምከመ ተፋቀርክሙ በበይናቲክሙ። 36#7፥34፤ 21፥18-19፤ ማቴ. 26፥31-35፤ ሉቃ. 22፥31-34። ወይቤሎ ስምዖን ጴጥሮስ እግዚኦ አይቴኑ ተሐውር ወአውሥአ እግዚእ ኢየሱስ ወይቤሎ ኀበሰ አነ አሐውር ኢትክል ተሊዎትየ ይእዜ ወባሕቱ ድኅረሰ ትተልወኒ። 37ወይቤሎ ጴጥሮስ እግዚኦ በእንተ ምንት ኢይክል ተሊዎተከ ይእዜ ወአነ ነፍስየ ጥቀ እሜጡ በእንቲኣከ። 38ወአውሥአ እግዚእ ኢየሱስ ወይቤሎ ነፍሰከኑ ትሜጡ በእንቲኣየ ኦ ስምዖን አማን አማን እብለከ ዘእንበለ ይንቁ ዶርሆ ሥልሰ ትክሕደኒ።

Atualmente Selecionado:

ወንጌል ዘዮሐንስ 13: ሐኪግ

Destaque

Copiar