ወንጌል ዘዮሐንስ 12

ምዕራፍ 12

በእንተ ብእሲት እንተ ቀብዐቶ ለእግዚእነ ዕፍረተ

1 # 14፥4፤ ማቴ. 26፥6-13፤ ማር. 14፥3-9። ወእምዝ ሖረ እግዚእ ኢየሱስ እምቅድመ ሰዱስ መዋዕል ዘፋሲካ ወበጽሐ ቢታንያ ኀበ ሀሎ አልዓዛር ዘአንሥኦ እምነ ምዉታን። 2#ሉቃ. 10፥39-40። ወገብሩ ሎቱ ምሳሐ በህየ ወማርታ ትሜጥዎሙ ወአልዓዛር አሐዱ ውእቱ እምእለ ይረፍቁ ምስሌሁ። 3#ሉቃ. 7፥37-38። ወማርያሰ ነሥአት ዕፍረተ ልጥረ ዘናርዱ ጵስጥቂስ ዘዕፁብ ሤጡ ወቀብዐቶ እገሪሁ ለእግዚእ ኢየሱስ ወመዝመዘቶ በሥዕርታ ወመልአ ቤተ መዐዛሁ ለውእቱ ዕፍረት። 4ወይቤ ይሁዳ ስምዖን አስቆሮታዊ አሐዱ እምአርዳኢሁ ዘሀለዎ ያግብኦ። 5#ማር. 14፥5። ለምንት ኢሤጥዎ ለዝንቱ ዕፍረት ለሠለስቱ ምእት ዲናር ይትወሀብ ለነዳያን። 6#ሉቃ. 8፥3። ወዘንተ ዘይቤ አኮ ዘያጽሕቅዎ ነዳያን አላ እስመ ሰራቂ ውእቱ ወየዐቅብ አስከሬነ።#ቦ ዘይጽሕፍ «ወቀምጠራ ዘሙዳየ ምጽዋት ሀሎ ውስተ እዴሁ» ወይነሥእ እምዘይትወደይ ውስቴቱ። 7ወይቤሎ እግዚእ ኢየሱስ ኅድጋ እስመ ተዐቅቦ ለዕለተ ቀበርየ። 8#ዘዳ. 15፥11። ወነዳያንሰ በኵሉ ጊዜ ሀለዉ ምስሌክሙ ወዘልፈ ትረክብዎሙ ወጊዜ ፈቀድክሙ ታሤንዩ ሎሙ ወኪያየሰ አኮ በኵሉ ጊዜ ዘትረክቡኒ። 9ወብዙኃን እምነ አይሁድ እለ አእመሩ ከመ ሀሎ እግዚእ ኢየሱስ ህየ ወሖሩ ኀቤሁ ወአኮ በእንተ እግዚእ ኢየሱስ ባሕቲቱ ዘሖሩ ዳእሙ ከመ ይርአይዎ ለአልዓዛርሂ ዘአንሥኦ እግዚእ ኢየሱስ እምዉታን። 10ወተማከሩ ሊቃነ ካህናት ከመ ይቅትልዎ ለአልዓዛር። 11እስመ ብዙኃን እምውስተ አይሁድ የሐውሩ በእንቲኣሁ ወየአምኑ በእግዚእ ኢየሱስ።

በእንተ ዕዋል ወጸበርት

12 # ማቴ. 21፥1-11፤ ማር. 11፥1-11፤ ሉቃ. 19፥29-38። ወበሳኒታ ሰብእ ብዙኃን እለ መጽኡ ለበዓል ሶበ ሰምዑ ከመ ይመጽእ እግዚእ ኢየሱስ ኢየሩሳሌም። 13#መዝ. 117፥25-26። ነሥኡ ጸበርተ ተመርት ዘበቀልት ወተቀበልዎ ወፂኦሙ እንዘ ይጸርሑ ወይቤሉ ሆሣዕና ቡሩክ ዘይመጽእ በስመ እግዚአብሔር ወንጉሦሙ ለእስራኤል። 14ወረከበ እግዚእ ኢየሱስ ዕዋለ አድግ ወተጽዕነ ዲቤሃ። 15#ዘካ. 9፥9። በከመ ጽሑፍ «ኢትፍርሂ ወለተ ጽዮን ነዋ ንጉሥኪ ይመጽእ እንዘ ይጼዐን ዲበ ዕዋለ አድግ።» 16ወቀዲሙሰ ኢያእመሩ አርዳኢሁ ዘንተ ነገረ ዘእንበለ አመ ተሰብሐ እግዚእ ኢየሱስ አሜሃ ተዘከሩ ከመ ጽሑፍ ዝንቱ በእንቲኣሁ ወከመዝ ገብሩ ሎቱ። 17ወሰማዕተ ኮንዎ እሙንቱ ሕዝብ እለ ሀለዉ ህየ ምስሌሁ ከመ ጸውዖ ለአልዓዛር እመቃብር ወአንሥኦ እምነ ምዉታን። 18ወበእንተ ዝንቱ ወፅኡ ኵሉ ሕዝብ ይትቀበልዎ እስመ ሰምዑ ተኣምረ ዘገብረ ወዘንተሂ መንክረ። 19#11፥48። ወይቤሉ ፈሪሳውያን በበይናቲሆሙ ትሬእዩኑ ከመ አልቦ ዘትበቍዑ ወኢምንተኒ ናሁ ኵሉ ዓለም ተለዎ ድኅሬሁ።

በእንተ እምነቶሙ ለአረሚ ወበእንተ ኢአሚኖቶሙ ለአይሁድ

20ወቦ እምሰብአ ጽርእ እምውስተ አረሚ እለ ዐርጉ ይስግዱ ለበዓል። 21ወሖሩ እሙንቱሂ ኀበ ፊልጶስ ዘቤተ ሳይዳ ዘገሊላ ወሰአልዎ ወይቤልዎ እግዚኦ ንፈቅድ ንርአዮ ለእግዚእ ኢየሱስ። 22ወሖረ ፊልጶስ ወነገሮ ለእንድርያስ ወሖሩ እንድርያስ ወፊልጶስ ወነገርዎ ለእግዚእ ኢየሱስ። 23ወአውሥአ እግዚእ ኢየሱስ ወይቤሎሙ ናሁ በጽሐ ጊዜሁ ከመ ይሰባሕ ወልደ ዕጓለ እመሕያው። 24#ሮሜ 14፥9፤ 1ቆሮ. 15፥36። አማን አማን እብለክሙ እመ ኢወደቀት ኅጠተ ሥርናይ ውስተ ምድር ወኢሞተት ባሕቲታ ትነብር ወእመሰ ሞተት ብዙኀ ፍሬ ትፈሪ። 25#ማቴ. 10፥39፤ 16፥25፤ ማር. 8፥35፤ ሉቃ. 9፥24፤ 17፥33። ወዘሰ ያፈቅራ ለነፍሱ ለይግድፋ ወዘሰ ጸልኣ ለነፍሱ በዝንቱ ዓለም የዐቅባ ለሕይወት ዘለዓለም። 26#14፥3፤ መዝ. 72፥24-25። ወእመቦ ዘይትለአከኒ ሊተ ለይትልወኒ እስመ ኀበ ሀሎኩ አነ ህየ ይሄሉ ዘይትለአከኒ ወለዘሊተ ተልእከኒ ያከብሮ አቡየ። 27ወይእዜሰ ተሀውከተኒ ነፍስየ ወምንተ እንከ እብል አባ አድኅና ለነፍስየ እምዛቲ ሰዓት ወባሕቱ በእንተ ዝንቱ መጻእኩ ወበጻሕክዋ ለዛቲ ሰዓት። 28#ማቴ. 3፥17፤ 17፥5። አባ ሰብሖ ለወልድከ ወመጽአ ቃል እምሰማይ ዘይብል ሰባሕኩከሂ ወዓዲ ካዕበ እሴብሐከ። 29ወሕዝብሰ እለ ይቀውሙ ወይሰምዑ ይቤሉ ነጐድጓድ ውእቱ ወቦ እለ ይቤሉ መልአክ ተናገሮ። 30#11፥42። ወአውሥአ እግዚእ ኢየሱስ ወይቤሎሙ አኮ በእንቲኣየ ዘመጽአ ዝ ቃል አላ በእንቲኣክሙ። 31#9፥39፤ 16፥11፤ ቈላ. 2፥15። ወናሁ እብለክሙ ይእዜ በጽሐ ኵነኔሁ ለዝንቱ ዓለም ወእምይእዜሰ ይሰድድዎ ለመልአከ ዝንቱ ዓለም ወያወፅእዎ አፍኣ። 32#8፥28። ወአነኒ እምከመ ተለዐልኩ እምድር እስሕብ ኵሎ ኀቤየ። 33#18፥32። ወዘንተ ዘይቤ እንዘ ይኤምሮሙ በአይ ሞት ሀለዎ ይሙት። 34#መዝ. 109፥4፤ ኢሳ. 9፥7፤ ሕዝ. 37፥25፤ ዳን. 7፥14። ወአውሥእዎ ሕዝብ ወይቤልዎ ንሕነሰ ሰማዕነ በውስተ ኦሪት ከመ ለዓለም ይነብር ክርስቶስ ወእፎ እንከ ትብለነ አንተ ሀለዎ ለወልደ ዕጓለ እመሕያው ይትለዐል መኑ እንከ ዝንቱ ወልደ ዕጓለ እመሕያው። 35#ኤር. 13፥16፤ 11፥10። ወይቤሎሙ እግዚእ ኢየሱስ ዓዲ ኅዳጠ መዋዕለ ሀሎ ምስሌክሙ ብርሃን አንሶስዉ እንዘ ብክሙ ብርሃን ዘእንበለ ይርከብክሙ ጽልመት እስመ ዘየሐውር ውስተ ጽልመት ኢየአምር ኀበ የሐውር። 36#8፥59፤ ኤፌ. 5፥9። አምጣነ ብክሙ ብርሃን እመኑ በብርሃን ከመ ትኩኑ ውሉደ ብርሃን ወዘንተ ብሂሎ እግዚእ ኢየሱስ ሖረ ወተኀብኦሙ። 37ወእንዘ መጠነዝ ተኣምረ ይገብር በቅድሜሆሙ ኢአምኑ ቦቱ። 38#ኢሳ. 53፥1፤ ሮሜ 10፥16። ከመ ይብጻሕ ቃለ ኢሳይያስ ነቢይ ዘይቤ «እግዚኦ መኑ የአምነነ ስምዐነ ወለመኑ ተከሥተ መዝራዕቱ ለእግዚአብሔር።» 39#ኢሳ. 6፥9-10። ወበእንተ ዝንቱ ስእኑ አሚነ እስመ ካዕበ ይቤ ኢሳይያስ። 40«ዖራ አዕይንቲሆሙ ወገዝፋ አልባቢሆሙ ከመ ኢይርአዩ በአዕይንቲሆሙ ወኢይለብዉ በአልባቢሆሙ ወከመ ኢይትመየጡ ኀቤየ ወኢይሣሀሎሙ።» 41#ኢሳ. 6፥1-10። ወዘንተ ይቤ ኢሳይያስ እስመ ርእየ ስብሐቲሁ ወነገረ በእንቲኣሁ። 42#9፥22። ወቦ ብዙኃን እመላእክተ ሕዝብ እለ አምኑ ቦቱ ወባሕቱ ኢያግሀዱ በእንተ ፍርሀቶሙ ለፈሪሳውያን ከመ ኢይስድድዎሙ እምነ ምኵራብ። 43#5፥44። እስመ አብደሩ ስብሐተ ሰብእ ፈድፋደ እምስብሐተ እግዚአብሔር። 44ወጸርሐ እግዚእ ኢየሱስ ወይቤ ዘየአምን ብየ አኮ ብየ ባሕቲቶ ዘየአምን ዘእንበለ በዘፈነወኒ። 45#14፥9። ወዘርእየ ኪያየ ርእዮ ለዘፈነወኒ። 46ወአንሰ ብርሃን መጻእኩ ውስተ ዓለም ከመ ኵሉ ዘየአምን ብየ ኢይንበር ውስተ ጽልመት። 47#3፥17-18። ወዘኒ ሰምዐ ቃልየ ወኢዐቀቦ አኮ አነ ዘእኴንኖ እስመ ኢመጻእኩ ከመ እኰንኖ ለዓለም ዘእንበለ ከመ አሕይዎ ለዓለም። 48#8፥24-25፤ ዘዳ. 18፥19፤ ሮሜ 2፥12። ወዘሰ ክሕደኒ ወኢተወክፈ ቃልየ ሀሎ ዘይኴንኖ ቃል ዘአነ ነበብኩ ውእቱ ይኴንኖ በደኃሪት ዕለት። 49#14፥10። እስመ አኮ ዘእምኀቤየ ዘነበብኩ አላ አብ ዘፈነወኒ ውእቱ ትእዛዞ ወሀበኒ ዘከመ እነብብ ወዘከመ እብል። 50#5፥30። ወአአምር ከመ ትእዛዙ ሕይወት ውእቱ ዘለዓለም ወዘሂ እነግር አነ በከመ ይቤለኒ አብ ከማሁ እነግር።

Atualmente Selecionado:

ወንጌል ዘዮሐንስ 12: ሐኪግ

Destaque

Copiar