Matiyu 6

Yáa o kákan kɛ bhɔ́ ɲán mín man

1«Áa a yɛ́ɛ myaan! A kɛ́nan á yɛ́ Ala sháa o téenin ŋó kɛ́ tɔ́ɔɲiinnze né yaman o ɲánla. Ní o tɛ, a Fá mín ŋé sá ŋó lɔ, á táa tɔɔn sɔ́ɔ o la. 2Í kɛ́ kɛ́ yáa o bhɔ́la faannda ŋólu la, í kɛ́nan kɛ ké mɔɔn olu ɲán o a lá í ká, óyoo fyáangafo ólu o kɛla tɛ́nmɛn sɛ́ɛbho ŋólu ní yamanywaa olu lɔ. Ii o kɛ́la lé ké mɔɔn ólu a i tando. Tó ní fɔ a yɛ́ tínɲan in ne ngó í wɛɛ wɛɛ í ta tɔɔn ó sɔ́ɔla. 3Wáa ni í kɛ́ kɛ́ yáa ó bhɔ́la faannda ŋo lá í bhóobhɛɛ ó la, í bhóonwaan ŋo mánngan kɛ kósɔɔ o lɔ. 4O ɲán o mán, í yɛ́ yáa ó óo tó loo nɔn, tó Ala mín ŋé í Fá le, o mín ŋé í yɛ́ fé nóonaankɛnin ŋó yéla, o yáa i sála.»

Mɔɔn kákan kɛ í sɛ́ɛ ɲán mín man

Luka 11.2-4

5«Ni í kɛ́ kɛ́ í sɛ́ɛla, a kɛ́nan kɛ óo fyáangafo ólu: Olu kɛ́ kɛ́ í lɔ́la sɔ kɛ í sɛ́ɛ, yɛ́ɛ yáa o lé a dí i yɛ sɛ́ɛbho ŋólu ní sókɔɔnnɔn sháafaa né a ólu ka. Tó ní fɔ a yɛ́ tínɲan in ne ngó í wɛɛ wɛɛ í ta tɔɔn ó sɔ́ɔla. 6Wáa ni íle kɛ́ fáa í sɛ́ɛ, lo í fɛ́ta kɛ lá ó látuun í yɛ́ɛman kɛ í Fá Ala dɛ́li. O ɲán o mán, mɔɔn ɲán tɛ́ í Fá Ala mín ɲela wé, o mín ŋé kó lóonaankɛnin ŋólu bɛ́ yéla, o yáa í sála.

7Ni a kɛ́ kɛ́ í sɛ́ɛla, a kɛ́nan táa kóman kée ŋolu lɔ́kuukuu lé ɲɔ́ɔnnga óyoo káafii olu kɛla tɛ́nmɛnne, aa kɛla olu kɔ́ɔnnɔn kó ni i kɛ́ kóman shɛ́ɛman nvɔ, kó i yɛ sɛ́ɛ o káa myaan o ɲán o lé mán. 8A kɛ́nan kɛ́ óyoo i léelu, kɛ mansɔɔ Ala mín ŋé a Fá le, á mánko é kó óo kó la, o a o bɛ́ lɔ ké álee mán a dɛ́li bhá ɲɛ́ɛ. 9A kákan kɛ í sɛ́ɛ tɛ́nmɛn, o lée nin:

Án Nvá mín ŋé sá ŋó lɔ,

Í tɔ́ɔ ó a sɛ́nnɛnya,

10 Í yɛ́ Mansaya o wáa nan.

Í dhyáaɲɛnngo ó a kɛ́ lúukolo ó ka

óyoo aa tɛ́nmɛnne sá ŋó lɔ.

11Bí bhálo ó dí án man.

12Án yúumu ólu mánkoto,

óyoo mín núu yúumu kɛ́la án nan,

án ni olu mánkotola tɛ́nmɛn.

13Í kɛ́nan án ɲóso o lɔ lɔ́swaannin kɛ sháayoo ŋó la,

án ngísi Sɔtaannan o mán;

[kɛ mansɔɔ, mansaya ó, sébhaaya ó, óni kunnanwee ŋo ó bɛ́ bɛ́ é íle lé tá lé wáati o bɛ́ lɔ. Amiinan!]

14Aa céne, ni a kɛ́ yafa a mɔɔnɲɔɔn ólu mán, tó a Fá mín ŋé sángboo ó lɔ, oo yafa álee mán. 15Wáa ni a mán yafa a mɔɔnɲɔɔn ólu mán, a Fá táa yafa álee lu mán.»

Sún ŋo kákan kɛ ló ɲán mín man

16«A kɛ́ kɛ́ sún nɔn, a kɛ́nan a ɲán lɔkuun óyoo fyáangafo ólu kɛla tɛ́nmɛnne, olu i yɛ́ɛ lábhyaala lé ké bɛ́ a lɔ ŋóo ii sún nɔn. Tó ní fɔ a yɛ́ tínɲan in ne ngó, ilee wɛ́ɛ wɛɛ i ta tɔɔn ó sɔ́ɔla. 17Wáa ni íle kɛ́ kɛ́ sún nɔn, í ɲán o kwó kɛ túu swáandhyaanin ngɛ́ í kúnnɔn, 18ké mɔɔn ólu kɛ́nan lɔ óyoo íi sún nɔn, fɔ́ mɔɔn ɲán tɛ́ í Fá Ala mín ɲela wé, tó í Fá Ala mín ŋé kó lóonaankɛnin ŋólu yéla, o yáa í sála.»

Ala bháa, bháa wɛ́ɛ o: í tá ta

Luka 12.33-36

19«A kɛ́nan nanfoo ládhyɛ dínɲan míin nɔn, kɛ mansɔɔ bháabhaa óni sóo ŋó o cáannan lúukolo ó ka, so ŋólu lónan bhó nú la kɛ soɲan kɛ. 20Áa nanfoo ládhyɛ sángboo o lé lɔ, bháabhaa ni tunmuun ndɛ́ yénɔn kɛ cáanni kɛ, so ndɛ́ yénɔn kɛ lá o kɛɛ tó kɛ soɲan kɛ. 21Kɛ mansɔɔ í yɛ́ nanfoo ó kɛ́ kɛ́ ywáa mínnɔn, í yóso óo kɛ́la yénɔn lé. 22Mɔɔn ɲándhye ŋó lée lúu mɔɔn fási ó laman ŋo le: Ni mɔɔn ɲándhye ŋólu bhɛ́ɛbhɛɛ kɛ́ kɛ́, mɔɔn ywáa bɛ́ é kɛ́ kɛ́ɛngbɛ lɔ, 23wáa ni fyɛn kɛ kɛ́ mɔɔn ɲándhye ŋólu la, mɔɔn fási o bɛ́ é kɛ́la diwi le lɔ. O ɲán o mán, fé mín ngákan kɛ kɛ́ɛnɲan bhyáa mɔɔn ka, ni o kɛ́ kɛ́ diwi lɔ, diwiko o lá ŋó lée wé nɛ!

24Mɔɔn súusuu tɛ́ sé kɛ́la kunndii fyáa yɛ́ yɔ né kéene: Kée ŋó yáa gbéya a yɛ, tó a tɔ kée ŋó o dhyáa a yɛ, wáman a yáa í gbɛ́nnɛn kée ŋó mán kɛ í mánbhɔ a tɔ kée ŋó la. Ala ko o tɛ́ sé dhyáala a yɛ́ ké wɛ́ɛ kó o a dhyáa a yɛ́ o ɲán kée ŋó mán íkwɔ.»

Fɔ́ kɛ lá Ala la

Luka 12.22-31

25O lé kósɔn ní fɔ́la a yɛ́ ngó: A mánko é lɔ́minfe ni mínninfe mínnu la kɛ sé dínɲanlɔtɛɛ kɛ́la, wáman a káa faani mínnu bhyáa a kannan, a kɛ́nan hánmin ŋolu la. Mɔɔn ní o kúu mán ngbɛ́ɛ kɛ tínmin lɔ́min o ka ŋan, tó mɔɔn fási ó kúu mán ngbɛ́ɛ fáanin olu le a, bháa díi? 26Kɔ́ɔn mínnuu sáman, áa í míli olu mán: I tɛ sɛɛn kɛ́la, i lo ndɛ́ sɛɛnmanfe ngɛ́ɛnan, i yɛ́ɛ ló ndɛ́ sɛɛnmanfe ndála kɛ a bhyáalaa bhɔ́ mɔɔnnin nɔn, wáa a Fá mín ŋé sángboo ó lɔ, oo i bhálola! Tɔɔn tɛ́ álee la kɛ tínmin kɔ́ɔn ólu ka ŋan? 27A kée ngéenan ó mínnɛɛn lé wɛ́ɛ tó hánminan háanin kɛ hánmin ŋo a lɔ bhyáa a yɛ dínɲanlɔtɛɛ ó lɔ́bhɛɛya ó ka.

28«Mínnɛɛn le kósɔn áa faaniko o hánmin nzíila a lá? Áa í míliya lá bínnvee olu mán: I tɛ bháalakɛla, i lo ndɛ́ fáanin lálaanan. 29Waa tó ní fɔ a yɛ́ ngó háanin mansacɛ Swɛmannan ní a yɛ nanfoobatiiya ó lɔ, a man fáanin sɔɔ nín mín njɛ́ɛ ndɛ́ɛ bínnvee o lɔ́ le. 30Bínnvee mín ŋé bín nɔn, o cáaɲiin Ala kwɔ, kéni síin, o bínnvee o yáa kɛ́ tá lɔ: Tó Ala táa ále léelu fɛ́ɛya bhɔ́ a? A yɛ́ lánanya ó ŋa lɔ́ɔ! 31A kɛ́nan hánmin kɛ táa fɔ le kó: ‹Án ngáa mínnɛɛn lé lɔɔ, án ngáa mínnɛɛn lé mín, án ngáa mínnɛɛn lé bhyáa án ngánnan?› 32Síya gbɛ́ɛ o léelu kála o fé ŋólu ɲíinnan kúdɛyi. Wáa a Fá mín ŋé sángboo ó lɔ, a mánko é o fé mín nan o a ŋólu lɔ. 33Oo lɔ mínngɛ, áa í lɔ́ja kɛ í mányii Ala yɛ́ Mansayafaan ó lé kɔ́ɔ ótun, a ló ŋan sháa téenin ŋó lé ɲíin ŋótun, o kɛ́ kɛ́ Ala é fé ndɔ́ ólu bɛ́ di a mán. 34O ɲán o mán, a kɛ́nan hánmin síin ŋó la: Síin ŋó yáa hánmin ale gbú la. Bí ta sɛɛ ó lá née bí le.»

Atualmente Selecionado:

Matiyu 6: MXX

Destaque

Copiar