Matiyu 5

Ɛnza ŋé lakawanin mín ngɛ tii ó ka

Luka 6.20-23

1Ɛnza ŋé yaman o yé mínngɛ, aa í yɛ́ɛ tii lɔ́ ka kɛ í síi yénɔn. A yɛ kaamɔɔndhye ŋolu táa a saala 2tó aa i kála námyaan tá ko:

3«Mɔɔn mínnu a lɔ ŋóo íi faannda né i yóso o lɔ,

olu yeemanfanin ɲé,

kɛ mansɔɔ í yáa sángboo ó Mansaya o sɔ́ɔ!

4Mɔɔn mín núu kásila, yeemanfaa é olu yɛ,

kɛ mansɔɔ Ala yáa i yóso láyii!

5Mɔɔn mínnu sáwɛɛnin ŋe, yeemanfaa é olu yɛ,

kɛ mansɔɔ lúukolo ó yáa kɛ́ i ta le!

6Téleɲan ó nɛ́li é mɔɔn mínnu la, yeemanfaa é olu yɛ,

kɛ mansɔɔ Ala yáa i dhyáaɲɛnngo kɛ!

7Hínnɛn é mɔɔn mínnu yóso lɔ, yeemanfaa é olu yɛ,

kɛ mansɔɔ Ala yáa hínnɛn olu la!

8Mɔɔn mínnu yóso ó gbɛ́nin ɲe, yeemanfaa é olu yɛ,

kɛ mansɔɔ olu yáa Ala yé!

9Mɔɔn mín núu mɔɔn ólu cɛ́lɔbhyɛnan,

yeemanfaa é olu yɛ, kɛ mansɔɔ fɔ́ yáa kɛ́ olu man kó Ala dhyé nú!

10Ii mɔɔn mínnu tɔ́lɔla i yɛ téleɲan o kósɔn,

yeemanfaa é olu yɛ, kɛ mansɔɔ i yáa Ala yɛ́ Mansaya ó hɛ́lɛ o sɔ́ɔ.

11Ni mɔɔn ólu kɛ́ kɛ́ a nɛ́ɛnnan, wáman kɛ́ kɛ́ a tɔ́lɔla, wáman kɛ táa fwɔnɲan yóo mbɛ́ súu la lé a lá kɛ kun ngɛ́ a yɛ́ lánanya ó lé né la, álee yeemanfanin ɲé.

12Áa í ɲáanli, kɛ a nisɔdhyaa gbúnigbukɛ, kɛ mansɔɔ bhaayeba é a yɛ́ sá ŋó lɔ. Sɔ, ii céla ólu tɔ́lɔ céne íkwɔ.»

Saanan mín ŋé kɔɔ óni kɛ́ɛnɲan ó ka

13Ɛnza ŋé fɔ íkwɔ kó: «Ále lée lúu kɔɔ o lé dínɲan la. Wáa ni kɔɔ ó tá dhyáalaa ó kɛ́ bhɔ́ a lá, a káa mínnɛɛn lé ɲán bhée? Ké tɔɔn gbɛ́ɛ le tɛ́ a lá bhée ŋwé, o ɲán o mán, fɔ́ kɛ a lafii kɛ́ɛnman lé tó mɔɔn ólu í sé gbáan gbáan a ka.

14Ále léelu é kɛ́ɛnɲan lé dínɲan mɔ́ɔndhye ŋólu yɛ. Só mín nziinin ngɛ́ kɛ́ tii o ka, o só ó tɛ́ sé lóonan; 15Oo lɔ mínngɛ, mɔɔn tɛ́ tá bhyáala laman ŋo la tó kɛ pála ŋó mbíin a kunnan. Wáa mɔɔn é a siila lamannziife ne ka ké aa kɛ́ɛnɲan lábhɔ bhóngɔɔnnɔnbhaa olu bɛ́ yɛ. 16A yɛ́ kɛ́ɛnɲan ó kákan kɛ máan njé ne mɔɔndhye ŋólu ɲánla ké ii a kɛ́ko bhɛ́ɛ ólu yé, tó a Fá mín ŋé sá ŋó lɔ, ii o bwóɲan.»

Lakawanin mín ŋé tɔ́ ŋolu ka

17«A kɛ́nan kɛ́ a kɔ́ɔnnɔn kó ní nan Musa yɛ́ sɛliya óni céla ólu yɛ́ kóman o lafadi tɔ́ɔ le lɔ. Mán nan o lafadi tɔ́ɔ lɔ, waa ní nán o kó ŋólu lafa tɔ́ɔ le lɔ. 18Tó ní fɔ a yɛ́ tínɲan in ne ngó: Sannin sángboo óni lúukolo ó a tínmin, sɛ́wɛdhye nvítiinin wáman dhyaa nvítiinin nzí táa bhɔ́ tɔ́ ŋólu lɔ́kan ŋólu la. Fɔ tɔ́ ŋólu lɔ́kan ŋó a kɛ́ lé.#5.18 Fɔ́ tɔ́ ŋolu lɔ́kan ŋó a kɛ́ lé: O ywáa ó fɔ́nin ŋé Ala saaninkan nɔyɛɛmanbhaa lɔ́lu kwɔ́ lé kó sánnin dínɲan a fáa. 19O le kósɔn ni mɔɔn mínngɛ sɛliya o bɛ́ lɔ fítiinin ŋó kée njáan, óni kɛ́ mɔɔn olu kála o kée ngɛla, o tíi ó yáa kíi ko bɛ́ lɔ fítiinin ŋo sángboo ó Mansaya o lɔ. Wáa mɔɔn mín ngɛ sɛ́liya o látaaman óni kɛ mɔɔn olu kála o kɛ́la, o tíi o yáa kíi ko mɔɔn bá sángboo ó Mansaya o lɔ. 20Tó ní fɔ a yɛ́ ngo: Ni a yɛ́ téleɲan ó mán tínmin sɛliya kaamɔɔn ólu ní Falizɛn ŋolu tá o ka, a táa Ala yɛ́ Mansaya ó hɛ́lɛ o sɔ́ɔ.»

Lakawanin mín ŋé mwɛ́nnɛnli o ka

21«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo tá fa nvɛ́ kó: Í kɛ́nan mɔɔn ní ó bhɔ́, mɔɔn óo mɔɔn kɛ́ a mɔɔnɲɔɔn ó ní ó bhɔ́, kíti kákan kɛ tɛɛ o tíi o ka. 22Wáa née fɔ́la a yɛ ngó: Mɔɔn óo mɔɔn kɛ mwɛ́nnɛn a mɔɔnɲɔɔn ó mán, kíti kákan kɛ tɛɛ o tíi ó ka, mɔɔn mín ngɛ fɔ a mɔɔnɲɔɔn ó mán kó ‹kúnda!› Kíti kákan kɛ tɛɛ o tíi ó ka kítitɛɛbhaa ólu bhóo, mɔɔn mínngɛ fɔ a mɔɔnɲɔɔn o mán kó ‹san!› O tíi ó kákan né kɛ táa yaananman tá ó lɔ. 23O ɲán o mán, ni í kɛ́ fáa kóɲwaan kɛ́ Ala yɛ́ faanlɛɛbhɔlaa ó ka, ni a kɛ bhyáa í hákiila óo í wɛ́ɛ í sɔ ngɛ́ í mɔɔnɲɔɔn lɔ́la, 24í kwɔ́kɛ í yɛ́ kóɲwaanfe ŋo lá faanlɛɛbhɔlaa ó lɔ́ yénɔn kɛ táa íle ní í mɔɔnɲɔɔn o cɛ o lɔ́bhyɛ ŋótun, tó kɛ tó í kwɔ́sɛɛla kɛ́nan í yɛ́ kóɲwaan ó kɛ́ Ala yɛ.

25Ni íle ní mɔɔn lɔ́ kɛ́ kɛ́ táala ɲɔɔn ne kititɛɛlaalɔ, i ɲángban kɛ íle ní o tíi ó cɛ o lɔ́bhyɛ ké áa sháa o lá bhée. O ɲán o mán, í kɛ́ɛkɛɲɔɔn ó táa táa í ló kítitɛɛbhaa o bhóo, kítitɛɛbhaa o táa í lábhyaa kasobho ŋo kunnansiibhaa ó bhóo, tó óo táa í bhyáa kasola. 26Tó ní fɔ í yɛ́ tínɲan in ne, ni í mán o yúu ó saa féfe, í táa bhɔ́ o kaso o la.»

Lakawanin mín ŋé káanngɛ ó ka

27«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ́ kó: Í kɛ́nan ɲɔnmɔɔnya kɛ. 28Wáa né kó a yɛ́ ngó mɔɔn óo mɔɔn kɛ́ í ɲán bhɔ́ a mɔɔnɲɔɔn o muso fɛ́, o tíi ó wɛ́ɛ wɛɛ ɲɔnmɔɔnya lé kɛ́la a yóso ó lɔ́ wé. 29Í bhóobhɛɛkɔɔ ɲán ó, ni o kɛ kɛ sɔ́ɔbu lé kɛ́ í ló yúumukɛ ó lɔ, a bhɔ́ í la kɛ a lafii. Í bɔɔn ó í fásimanlaa ó ywáa kéembe lɔ, o a físaa í mán í ywáa bɛ́ lafii ó lé yaananman o lɔ. 30Ni í bhóobhɛɛ ó lée í lónan yúumukɛ ó lɔ, a tɛɛ í lá kɛ a lafii: Í bɔɔn ó í fásimanlaa ó ywáa kéembe lɔ, o a físaa í mán í ywáa bɛ́ lafii ó lé yaananman o lɔ.»

Lakawanin mín ŋé fúusa ó ka

31«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋó lɔ kó: Mɔɔn óo mɔɔn kɛ́ í bá a muso lɔ, o tíi o kákan né kɛ fúusasɛwɛ le ló a muso bhóo. 32Tó ni a fɔ a yɛ́ ngó: Cɛ óo cɛ kɛ́ í bá a muso lɔ kéni o muso ó mán ɲɔnmɔɔnya kɛ, ni o kɛ́ sii cɛ kwáa la, ké a wɛɛ ɲɔnmɔɔnya lé kɛ́ wé, o ɲán kée ŋó mán a cɛ kɔɔ ó lée a yɛ ɲɔnmɔɔnya kɛ ó sɔ́ɔbu lé wé. Muso mín no ɲɛ́n fúu sáni ŋé a cɛ kwɔ, cɛ mín ngɛ o muso ó tá, ké o tíi ó wɛ́ɛ ɲɔnmɔɔnya lé kɛ́ íkwɔ wé.»

Lakawanin mín ŋé shɛ́nnin o ka

33«A wɛ́ɛ myɛ́n kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo tá fa nvɛ́ kó: Í kɛ́nan bhɔ́ í yɛ́ shɛ́nninkan ŋo ka, wáa í kɛ́ í shɛ́n kan mínnan Mantii o koowaan la, o kan ŋó bhɔ́ a sháa man. 34Wáa née fɔ́la a yɛ́ ngó a kɛ́nan shɛ́n mantɛɛ fɛ́sɛ fɛ́sɛ, a kɛ́nan shɛ́n mantɛɛ sángboo o la, kɛ mansɔɔ Ala nɔ́nmɔnnaa ó lée wé, 35a ló ngɛ́nan shɛ́n mantɛɛ lúukolo ó la, kɛ mansɔɔ Ala tónan ólu kɔ́ɔtalaa ó lée wé, a kɛ́nan shɛ́n mantɛɛ Yeluzalɛmu la, kɛ mansɔɔ mansaba Ala tá lée wé. 36A yɛ́ɛ ló ngɛ́nan shɛ́n mantɛɛ a kúnngɔɔ ŋo la, kɛ mansɔɔ a tɛ́ sé kɛ a kúnzhe o kɛ́ɛ kée nangbɛ wáman kɛ a lafin. 37Mɔɔn mín ngɛ fɔ kó ɔɔn, o a kɛ ɔɔn ne, ni a lo ngɛ́ fɔ kó ɔn-ɔn, o a kɛ́ ɔn-ɔn ne. Kóman tɔ́ mín núu fálala olu ka, o bɛ́ é sɔtaannan bhyáafo ne le.»

Lakawanin mín ŋé kóɲɔɔnbhɔ ó ka

38«A ló ŋwɛ́ɛn myɛ́n íkwɔ kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ kó: Nvɔn ɲɔ́ɔn lée nvɔn le! Ɲán lée ɲán o yúu saala, ɲín ŋo lée ɲin ŋó yúu saala. 39Wáa née fɔ́la a yɛ́ ngó mɔɔn mín ngɛ kóyoongɛ a lá, a kɛ́nan a tá ɲɔɔn bhɔ́. Ni mɔɔn lɔ́ kɛ́ í tóoce í bhóobhɛɛ tóo o kɔɔ, í bhóonwaan ndoo o síi a yɛ íkwɔ. 40Ni mɔɔn lɔ́ kɛ́ i kíi kítitɛɛlaa lɔ ké aa í yɛ deeke o myáan í lá, í yɛ́ deekeba ó yɛ́ɛ lo a bhóo. 41Ni mɔɔn lɔ kɛ́ fáan lá í ka kó íi í séngwɔko wáa kée ngɛ́ ni a yɛ lwée ŋó le, í séngwɔko wáa fyáa kɛ́ a yɛ. 42Ní mɔɔn lɔ kɛ́ fé nɔ́n kófɔ i yɛ́, ii a di mán, ni í bhóofe o sháannɔɔ kɛ́ kɛ́ mɔɔn lɔ́la, í kɛ́nan í bá a tíi yɛ.»

Á yúumɔɔn olu a dhyáa a yɛ

43«A ló ŋwɛ́ɛn myɛ́n íkwɔ kó fɔ́ wɛ́ɛ kɛ́ án myɛ́man ólu yɛ́ Musa yɛ́ tɔ́ ŋo lɔ kó: Í ɲíin o a dhyáa í yɛ́, í yúu o a gbéya í yɛ́. 44Wáa née fɔ́la a yɛ́ ngó a yúu ólu kó á dhyáa á yɛ́, áa Ala dɛ́li a tɔ́lɔbhaa olu yɛ. 45A Fá mín ŋé sá ŋó lɔ, a káa kɛ́ o dhyénjɛ lú lé o ɲán o lé mán, kɛ mansɔɔ aa a yɛ tee ó lábhɔla mɔɔn yóo ŋóni mɔɔnbhɛɛ olu bɛ́ le yɛ, aa sá ŋo lánanla téemaa óni téemɛɛ ólu bɛ́ le ka. 46Á kó a dí mínnu yɛ́, ní ó kée ŋolu kɛ dhyáa á yɛ́, áa tɔɔn mínnɛɛn lé sɔ́ɔla o la? Nísɔɔnmyaanbhaa olu tɛ́ o kɛ́la a? 47Ni a kɛ́ kɛ́ a yɛ́ɛlamɔɔn kée ŋó léelu fola, áa kó kɛ́ gbɛ́yanin né kɛ́la o lé wé ŋan? Háanin káafii olu o súu o kɛla! 48Oo lɔ mínngɛ a yɛ́ kó o bɛ́ télenin ŋan kɛ́ o yóo a Fá mín ŋé sángboo ó lɔ, o yɛ́ kó ólu télenin ŋé tɛ́nmɛn.»

Atualmente Selecionado:

Matiyu 5: MXX

Destaque

Copiar