isizwur 8
8
izwa‑wakal ffuġn zġ‑wanaw
1rbbi iswangm ġ‑nuḥ ula luḥuš d‑lbhaym kullutn lli‑dids‑llanin ġ‑wanaw, yawi‑d aḍu ar‑iṣwaḍ f‑ddunit, wrrin ar‑tidrasn‑waman. 2iqqn isaffn n‑waman n‑ddu‑wakal, iqqn imawn n‑ignwan, ibbi‑unẓar. 3ar‑tnaqaṣn‑waman kra s‑kra zġ‑iggi n‑wakal. lliġ kkan miyya d‑smmus n‑id‑mraw (150) n‑wass, 4ġ‑wayyur wis ssa, ġ‑wass wis ssa d‑mraw (17), idrasn‑waman f‑wakal, ittrs‑wanaw f‑idrarn n‑araraṭ. 5zaydn ar‑tidrasn‑waman ar ayyur wis mraw. ġ‑wass amzwaru n‑wayyur wis mraw, bann‑d ih̬fawn n‑idrarn. 6zrin sul kkuẓ id‑mraw (40) n‑wass s‑irẓm nuḥ arryaḥ lli‑iskr ġ‑wanaw, 7yazn yan‑uhaqqay s‑brra. iffuġ nttan izayd ar‑itlulliy aylliġ izwa‑wakal. 8yazn ilmma nuḥ yan‑utbir a‑iẓr is‑wrrin‑waman zġ‑wakal. 9walaynni ur‑yufi‑utbir maniġ a‑itrus, iwrri‑d s‑wanaw. ašku llan‑sul‑waman f‑iggi n‑ddunit kullutt. imdi‑as‑n nuḥ afus išškšm‑t‑id dars ġ‑wanaw. 10iql daġ ssa n‑uwssan yaḍni, yazn atbir zġ‑wanaw. 11tadggʷat iwrri‑d dars yasi‑d yat‑tifrt izgzawn n‑zzit ġ‑imi‑ns. yissan nuḥ ġakudan is‑gguzn‑waman zġ‑iggi n‑wakal. 12iql ssa n‑uwssan yaḍni, yazn daġ atbir, ur‑sul‑d‑dars‑iwrri.
13asggʷas wis sḍis id‑miyya d‑yan (601), ġ‑wass amzwaru n‑wayyur amzwaru, ur‑sul‑llin‑waman f‑iggi n‑wakal. yall nuḥ asddul n‑wanaw ar‑n‑itmnad, s‑iẓra is‑a‑izggu‑wakal. 14ġ‑wayyur wis sin, ġ‑wass wis sin id‑mraw d‑ssa (27), izwu‑kullu‑wakal. 15isawl rbbi ġakudan s‑nuḥ yini‑as: 16«ffuġ zġ‑wanaw kiyi d‑tmġart‑nk d‑tarwa‑nk d‑tmġarin‑nsn. 17tssufġt dik ula kullu ma‑dark‑iddrn ig tifiyi, igḍaḍ ula luḥuš ula lbhaym ula ma‑itštutuln f‑wakal, ad‑ddun ar‑tarun igatn ġ‑ddunit kullutt.» 18iffuġ nuḥ ġakudan nttan d‑tmġart‑ns d‑tarwa‑ns d‑tmġarin‑nsn. 19ffuġn ula luḥuš d‑ma‑itštutuln d‑igḍaḍ d‑kullu ma‑ittidun f‑wakal. iffuġ kullu kra illan, kra s‑kra.
lɛhd lli‑iskr rbbi d‑nuḥ
20ibnu nuḥ yan‑ukrkur ma‑f‑a‑n‑issakmur tiġrṣiw f‑ism n‑rbbi da‑bdda‑illan. yasi‑d kra zġ‑kullu ma‑igan lbhimt iḥllan ula agḍiḍ iḥllan, issattuy tiġrṣiw‑an ijdr‑tnt f‑ukrkur. 21irḍu sidi rbbi s‑waḍu imimn, yini d‑ih̬f‑ns: «ur‑sar‑rad‑h̬zuġ ddunit f‑ssibt n‑bnadm. wah̬h̬a kullu ʷh̬šnn iswingimn n‑bnadm zġ‑mẓẓiy‑ns, ur‑sar‑rad‑hlkġ kullu ma‑iddrn ġmklli skrġ ġ‑uwssan‑ad. 22maḥdd tqama ddunit, rad‑bdda‑yili‑uzmz n‑tiyrza d‑win‑tmgra, yili‑win‑usmmiḍ d‑win‑trġi, yili‑uzmz n‑ṣṣif d‑win‑tgrst, yili‑uzal d‑iyḍ.»
Atualmente Selecionado:
isizwur 8: SHILOT20
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Selected Old Testament in Tashelhayt (Latin script) © United Bible Societies, 2020.
Robert Bernard Dann.
