isizwur 7
7
anggay n‑waman dranin
1isawl daġ sidi rbbi s‑nuḥ yini‑as: «kšm ġilad s‑wanaw kiyi d‑tawjja‑nk kullukʷn, ašku tgit wad ifulkin ġ‑iẓri‑nu ġ‑gr mddn n‑tasut‑ad. 2šškšm dik ssa n‑iwtman d‑ssa n‑tiwtmin zġ‑kraygatt kra iḥllan i‑umššu, tšškšmt ula yan‑uwtm d‑yat‑tuwtmt zġ‑kraygatt kra ur‑iḥllan, 3tšškšmt ula ssa n‑iwtman d‑ssa n‑tiwtmin zġ‑kraygatt kra igan agḍiḍ n‑ignwan, baš a‑injm‑wamud n‑kraygatt kra illan ġ‑ddunit. 4ašku han wis ssa n‑uwssan ra‑n‑aznġ anẓar f‑wakal kkuẓ id‑mraw (40) n‑wass ġ‑uzal wala iḍ. rad‑ssittiġ kullu lmh̬luqat ddrnin zġ‑ddunit.» 5iskr nuḥ kullu maylli‑f‑t‑yuṣṣa sidi rbbi.
6nuḥ ikka sḍis id‑miyya (600) n‑usggʷas lliġ ngin‑waman f‑ddunit. 7ikšm nuḥ s‑wanaw nttan d‑tmġart‑ns d‑tarwa‑ns d‑tmġarin‑nsn ad‑njmn zġ‑waman. 8aškin‑d iwtman d‑tiwtmin zġ‑kraygatt kra iḥllan i‑umššu ula zġ‑ma‑ur‑iḥllan ula zġ‑igḍaḍ ula zġ‑ma‑itštutuln f‑wakal, 9ar‑kššmn sin s‑sin s‑dar nuḥ ġ‑wanaw ġmklli‑t‑yuṣṣa rbbi. 10zrin ssa n‑uwssan, ngin‑ilmma‑waman f‑ddunit.
11asggʷas wis sḍis id‑miyya (600) ġ‑tudrt n‑nuḥ, ġ‑wayyur wis sin, ġ‑wass wis ssa d‑mraw (17), ġassan a‑ġ‑d‑kullu‑bbaqin isaffn n‑waman ggutnin n‑ddu‑wakal, rẓmn ula imawn n‑ignwan. 12ibdu‑unẓar ar‑d‑itffi f‑ddunit kkuẓ id‑mraw (40) n‑wass ġ‑uzal wala iḍ. 13ġassan a‑ikšm nuḥ d‑tarwa‑ns sam d‑ḥam d‑yafat s‑wanaw, ntni d‑tmġart n‑nuḥ d‑kraṭṭ‑tmġarin n‑tarwa‑ns. 14ikšm didsn kraygatt kra igan luḥš, ula kraygatt kra igan lbhimt, ula kraygatt kra itštutuln f‑wakal ula kraygatt kra igan agḍiḍ ula kraygatt kra itaylaln. 15yašk‑id‑uwtm d‑tuwtmt zġ‑kullu ma‑igan tifiyi teṭṭaf rruḥ n‑tudrt. 16kšmn s‑wanaw sin s‑sin, awtm d‑tuwtmt, s‑dar nuḥ ġmklli‑t‑yuṣṣa rbbi. iqqn fllas sidi rbbi tiflut n‑wanaw.
17izayd‑unggay f‑ddunit kkuẓ id‑mraw (40) n‑wass, igatn‑waman aylliġ usin anaw f‑iggi n‑wakal. 18ġlin‑waman tjhhdn, ar‑itɛum‑wanaw f‑waman. 19zaydn igatn‑waman bahra f‑wakal aylliġ‑d‑kkan aflla i‑kullu idrarn mqqurnin n‑ddunit. 20zaydn‑sul‑waman ġlin aylliġ dln idrarn s‑ssa n‑mitru. 21immt kullu ma‑igan tifiyi ittidun f‑wakal, igḍaḍ ula lbhaym ula luḥuš ula ma‑itštutuln ula bnadm. 22kullu ma‑issunfusn f‑wakal s‑rruḥ n‑tudrt, hati immut. 23ihlk kullu ma‑iddrn f‑wakal, mddn ula luḥuš ula ma‑itštutuln ula igḍaḍ n‑ignwan, ikks‑tn zġ‑ddunit. ur‑iqama abla nuḥ d‑willi dids illan ġ‑wanaw. 24ilin‑sul‑waman f‑ddunit miyya d‑smmus id‑mraw (150) n‑wass.
Atualmente Selecionado:
isizwur 7: SHILOT20
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Selected Old Testament in Tashelhayt (Latin script) © United Bible Societies, 2020.
Robert Bernard Dann.
