मत्ती 14
14
कु-रु़दु़म ग्वाक्पा यूहन्नाकु बुइ क्रिप्मिडिम
(मर्कूस ६:१४-२९; लूका ९:७-९)
1मेमबिलि गालील क्षेत्रडाम हप हेरोद अन्तिपासका येशूकु दुथाम थो़स्तु़, 2मा गुका उ मुलु़ बोमु ख्लो़पामिमनुङ र्वाक्ता, “ओराम ने कु-रु़दु़म ग्वाक्पा यूहन्ना डे सिमुलाम बक्ताम रो ओ, मेम्मिमका गुका यु़मखारीमिम बेत्तोङा लेडु़।”
3ओरामडाम ङादो, हेरोदका यूहन्नालाई चु़म्डु़मा बसाका झ्यालखानगोडा चक्तु़म बाइडा। हेरोदका उ ल्वाक फिलिपकु नाइमे हेरोदियास लडु़म बाइडा।#लूक ३:१९-२०; मत्ती ४:१२ 4मेम्मा यूहन्नाका हेरोदलाई आरे र्वाक्ताम बाइडा, “इनी ल्वाक देल्मी हेरोदियासलाई गानी लालीकुन्दा बोमु डु़म्लाका मेग्वानी।”#लेवी १८:१६; २०:२१ 5मेम्मिमका हेरोदका यूहन्नालाई सेन्मु माल्लु़म बाइडा, लावो मु़चु़मिमडाम ङिस्थाल्ला। हेङालोने मेर्मिमका यूहन्नालाई माम्चु़नीलाम-जेपा र्वाक्साका मिम्थाल्मिडी।
6हेरोद गस्तामनेमकु दुथाम ग्रुला पेम्डिमनेम हेरोदियासकु जाउमोचो़ खोत्लेकु ङादोडा छो़म्डामा हेरोदलाई छो़म गेर्सिबेड्डु़। 7मेम्मिमका मे चो़च्चो़का हाम न बु़, मेरामङा ग्वानी र्वाक्साका हेरोदका गुनुङ ससि बु़डु़। 8हाम बिमु बासिक्पा, मेराम हेरोदियासका उ चो़लाई सीड्डु़। मेम्मा मे चो़च्चो़का हेरोदनुङ बियु़डु़, “कु-रु़दु़म ग्वाक्पा यूहन्नाकु बुइ डोक्पु थालडा ग्वाङनी।”#१४:८ बुइ क्रिम्ला सो़सिड्डाम पोमु लागि ने मेएँ सो़। मे हेरोदियासका यूहन्ना सिमिम रेम्मु माल्थाल्लु़, मेम्मिमका डोक्पु थालडा यूहन्नाकु बुइ उ चो़लाई हेरोदकाडा बिबेड्डु़म। मेम बिलि बुइ क्रिप्साका मु़चु़लाई सेन्मु याक्के ल्वा बाइथाल्ला। 9हेरोद हपकाम उ गो नो़डा, लावो उ बोच्चो़मिमकु ङादोडा ससि बु़डु़मका मे चो़च्चो़का र्वाक्ताम होङङा बेबेड्डु़मी, 10मा झ्यालखानडाम यूहन्नाकु बुइ क्रिम्बेड्डु़। 11मेकोतिमा यूहन्नाकु बुइ डोक्पु थालडा फिट्मिडिमा मे चो़च्चो़लाई ग्वाक्तु़। मेराम लडु़मा उ मामलाई ग्वाक्तु़। 12यूहन्नाकु सीसिपामिम रोम्डिमा उ सिपा रो़म लम्डिमा क्लु़म्मिडी। मेम्मा मेर्मिम येशूकाडा लम्डिमा सो़म्डी।
येशूका ङो धु़मसङ (५,०००) मु़चु़मिमलाई पोमु ग्वाम्डिम
(मर्कूस ६:३०-४४; लूका ९:१०-१७; यूहन्ना ६:१-१४)
13ओराम ल्वा थो़म्डिमा येशू कुबी-बोक्साडला हुसाका सु़ वो मेबाट्पाडा लम्डी। गुमी लम्डिम थो़म्डिमा हापा शहरलामका सेर्पा मु़चु़ उनी चङचङ लाम्दित्तो लम्डी। 14कुबी-बोक्साडलाम पाखाथो़ येशू लुम्डिलो मेसिन्डा हापा सेर्पा मु़चु़ ल्वाम्डी, मा उनी थो़म भ्रो़स्ता। मेम्मा नो़पा मु़चु़मिमलाई सबेट्मिडी।
15दुङमा र्यामु खाप्डु़म थारीका उनी सीसिपामिम उनीमाडा रोम्डिमा र्वाम्डी, “ओराम खोमडा मु़चु़मिम सु़ वो मेबुमी, मा दुङमा वो र्यामु खाप्डु़म बु। सेर्पा मु़चु़लाई थु़र्सोट्नी, मा देल-गुथाबाडे लमिनु़मा उनी त्वाकाङा पोमु-डुमु भ्रेमिनु़।” 16लावो येशूका मेर्मिमनुङ र्वाम्डी, “मेर्मिम लमु मेबासी। गानीङा मेर्मिमलाई पोमु-डुमु ग्वाक्नी।”
17मेर्मिमका येशूनुङ र्वाम्डी, “गुकुनुङ ने ङोले सो़बेम नुङ नले ङो कोङङा बु।”
18गुमीका र्वाम्डी, “मेराम आसि आमाडा फिट्नी।” 19येशूका सेर्पा मु़चु़लाई प्रु़प्चीडला गन्बेट्मिडी। मेम्मा मे ङोले सो़बेम नुङ नले ङो झेट्मिडिमा पाह्रीथो़ रेप्तो आलासो़ ग्वाम्डी। मेकोतिमा फ्वाक्चो़ल बेसाका उनी सीसिपामिमलाई ग्वाम्डी। मेर्मिमका मु़चु़मिमलाई दो़म्साम्डी। 20मेर्मिम खोत्लेका पेम्डिमा खोम्डी। मेम्मा सीसिपामिमका घ्लेट्पा सो़बेम फ्वाक्चो़लमिम खोप्मिडिलो को-न (१२) खचा दु़स्ता। 21मेसिन्डा पेपामिम मेसेममिम नुङ चो़च्चो़मिम डिसाका ङो धु़मसङ (५,०००) वोस्चो़मिम बाम्डी।
येशू कुकु थेम-थेम लाम्दिम्डिम
(मर्कूस ६:४५-५६; यूहन्ना ६:१५-२१)
22मेकोतिमा येशूका उनी सीसिपामिमलाई कुबी-बोक्साडला हुबेसाका गुमीडाम ङादो दिरिदिन होम्बुथो़ थु़र्थाम्डी। मु़चु़मिमलाई नेम थु़र्सोमु लागि गुमी ने मेसिन्डाङा बाम्डी। 23सेर्पा मु़चु़लाई थु़र्सोम्डिमा गुमी उनी त्वापङा पोप्चङडला सो़म्दी बेप्डा लम्डी। दुङमा र्याक्तालो गुमी कोङङा मेसिन्डा बाम्डी। 24मेकोतिलो उनी सीसिपामिम हुम्डिम कुबी-बोक्सा दिरिदिनकु सो़पडाम हापा होनोङा रोक्थिड्डाम बाइडा। मेर्मिमकु कोर्थो़लाम डोक्पु ब्लोजु़ फुड्डु़मका कुकु बाबारिमगोडा कुबी-बोक्सा बाइडा, मा मेर्मिम ङादो लमु मेचाप्मिवाम बाइडा।
25नेम सोसोकाम सुक जेस्ताम बिलि येशू कुकु थेम-थेम लाम्दित्तो उनी सीसिपामिमकामथो़ बिक्तोङा लेट्मिडी। 26उनी सीसिपामिमका गुमी कुकु थेम-थेम बिक्तोङा लेट्पा ल्वाम्डिमा ङिमुका रुड्डु़मी, मा येत्तो र्वाम्डी, “मुनाङ होनो!”
27मेकोतिलोङा येशूका मेर्मिमलाई र्वाम्डी, “इनी लो़ मेदाम्नु़, मेङिनी, गो सो़।”
28पत्रुसका र्वाक्ता, “ङाचो़, आच्छाङा गानीङा माला कुकु थेम-थेम लाम्दिसाका इनीमाडा बिमु ग्वाङनी।”
29येशूका र्वाम्डी, “बिकाका मा!” मेकोतिमा कुबी-बोक्सालामका पत्रुस लुक्तामा कुकु थेम-थेम येशूकाडा लस्ता। 30लावो छो़म ब्लोजु़ फुड्डु़म ल्वास्तु़मा पत्रुस ङिस्ता, मा कुगोयु़ प्लु़म्सिमु खाप्डु़। मेम्मा येस्तामा र्वाक्ता, “ङाचो़, ख्लुङ्नी।”
31येशूका दालाङा उनी ल्वा हम्मिडिमा गुलाई रो़पझेट्मिडी, मा र्वाम्डी, “गाना याक्के थो़रनुङमा मु़चु़, हेङा इमा नड्डा मुर्सिट्नाम?”
32येशू पत्रुसनुङ कुबी-बोक्साडला हुम्डिमा ब्लोजु़ फुन्मु डिड्डु़। 33कुबी-बोक्साडला बाट्पा सीसिपामिमका गुमीलाई डोक्पु मिम्साका सेव साट्मिडिमा र्वाम्डी, “गानी आच्छाङा माम्चु़नीकु तारापाचो़।”
34येशू नुङ उनी सीसिपामिम दिरिदिन होम्बुनो रोम्थिम्डिमा गनेसरेत इलाकाडा रोम्फाम्डी। 35मेसिन्डाम मु़चु़मिमका येशूलाई छेट्मिडी। मेम्मा मेर्मिमका होनो-आथो़म इलाकाबाडे सेला थु़र्थाम्डी। मेम्मा मु़चु़मिमका नो़पामिम खोत्लेलाई उनीमाडा रेट्मिडी। 36मेर्मिमका उनी हुम-येकु जु़जु़कोङङा लोवो लु़म्मु ग्वाक्की र्वाम्डिम-र्वाम्डिमङा बेम्डी। मेम्मा सु़-सु़का लु़प्मिडी, मेर्मिम खोत्ले सम्डी।
Atualmente Selecionado:
मत्ती 14: THUL
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
