मत्ती 13
13
भ्रल फोट्पा मु़चु़कु दुथाममिम सीसि-सो़म्दी
(मर्कूस ४:१-१२,२५; लूका ८:४-१०; १०:२३-२४)
1मेनेम येशू नेमलामका लुम्डिमा दिरिदिनकु फार्डा बाम्डी। 2सेर्पा मु़चु़ येशूकु होनोलाम-आथो़लाम छो़म खोम्सिम्डी, मेम्मिमका गुमी कुबी-बोक्साडला हुम्डिमा गन्मिडी। मे सेर्पा मु़चु़ दिरिदिनकु फार्डा बाम्डी।#लूक ५:१-३ 3गुमीका मेर्मिमलाई सीसि-सो़म्दीमिमलामका हापा ल्वामिम र्वाम्डी।
गुमीका र्वाम्डी, “भ्रल फोट्पा कोले मु़चु़ भ्रल फोड्डा लस्ता। 4भ्रल फोड्डु़लो याङ भ्रल लाम्दीडा झुस्ता, मा चक्पुमिम रोम्डिमा डो़म्पेम्डी। 5याङ भ्रल कि-कि क्वा बाट्पा लुङदुबाडे झुस्ता, मा हापा क्वा मेबाट्पामिमका मे भ्रल दालाङा ल्यास्ता। 6लावो नेप्सुङ ओप्डु़म चङडा मे भ्रल चु़र्डु़, मा सक्फार धु़प्पा मेबायावामका साट्ल्याड्डा। 7याङ भ्रल चु़दुगोनो झुस्ता। चु़ बर्तो गेड्डा, मा मे भ्रल बर्मु मेग्वाकु़वा। 8याङ भ्रल ने जो़पा क्वाडला झुस्ता, मा याङकाम को सङ (१००) कोति हापा, याङकाम रु धु़म (६०) कोति हापा, याङकाम सु धु़म (३०) कोति हापा मा सिड्डु़। 9उहेमकाम नोफ्ला बु, मेरामका जो़होमका थो़सु़नु़मा थेसिथेट्नु़।”
10उनी सीसिपामिम रोम्डिमा येशूनुङ हिलाबेम्डी, “गानी मु़चु़मिमलाई सीनिमिलो हेङा सीसि-सो़म्दीलामका सीनिमिमिम?”
11गुमीका मेर्मिमलाई र्वाम्डी, “माम्चु़नीकु किब्दी हाम र्वाक्साका आच्छाङा छेपा सामा गानीलाई ने ग्वाक्मा बु, लावो वाङमिमलाई ने ग्वाक्मा मिबु। 12हेङालोने उहेमका माम्चु़नीकु किब्दीकु दुथाम थेसिथेन्मु न बु़, माम्चु़नीका गुलाई थेसिथेन्बेन्मी, मा उमा नेप्ची बर्बेन्सामी। लावो उहेमका थेसिथेन्मु न मेबु़, मेरामका कि-कि थेसिथेडु़मिम वो थेसिङा मेथेट्पा माम्चु़नीका दु़म्बेन्मी।#मत्ती २५:२९; मर्क ४:२५; लूक ८:१८; १९:२६ 13मेम्मिमका गो मेर्मिमनुङ सीसि-सो़म्दीमिमलामका र्वाङु:
‘हेङालोने मेर्मिमका रेम्मु ने रेम्मी, लावो मेल्वामी,
थो़मु ने थो़मी, लावो जो़होमका मेथो़मी, मा थेसिमेथेन्मी।’
14“माम्चु़नीलाम-जेपा यशैयाका आरे र्वाक्ताम ल्वा होङङा मेर्मिमडा रोक्थिड्डाम बु:
#
यशै ६:९-१०
‘थो़मु ने थो़नी, लावो हेल्लो वो थेसिमेथेनी,
रेम्मु ने रेम्नी, लावो हेल्लो वो मेल्वानी।
15हेङालोने मु़चु़मिमकु न-गो थेसिमेथेट्पा दु़स्ताम बु,
मा मेर्मिमकु नोफ्ला मेथो़पा दु़स्ताम बु,
मा मेर्मिमका उनी मिक्सी क्रिम्मिडिम बु,
मेएँ माला ने मेर्मिमका मिक्सीका ल्वामिवा,
नोफ्लाका थो़मिवा,
उनी न-गोका थेसिथेट्मिवामा ख्लोम्सिप्मिवा,
मा गो मेर्मिमलाई सबेट्पुमिवा।’
16 #
लूक १०:२३-२४
“लावो गानी ने जिनुङमा सो़, हेङालोने इनी मिक्सीका ल्वानी, मा नोफ्लाका थो़नी। 17आच्छाङा गो गानीलाई र्वाङु, माम्चु़नीलाम-जेपामिम नुङ माम्चु़नीकु लाम्दीडा लाम्दिपा हापा मु़चु़मिमका गानी ल्वान्निम ल्वा ल्वामु न बेम्डिम बाइडा, लावो मेर्मिमका मेल्वामिवा। गानी थो़न्निम ल्वा थो़मु न बेम्डिम बाइडा, लावो मेथो़मिवा।
भ्रल फोट्पा मु़चु़कु सीसि-सो़म्दीका र्वामु माल्लु़म ल्वा येशूका सो़म्डिम
(मर्कूस ४:१३-२०; लूका ८:११-१५)
18“भ्रल फोट्पा मु़चु़कु सीसि-सो़म्दीका र्वामु माल्लु़म ल्वाकु दुथाम थो़नी। 19लाम्दीडा झुक्पा भ्रल मेरामङा सो़, उहेमका माम्चु़नीकु किब्दीकु दुथाम सिजेम थो़सु़, लावो थेसिमेथेडु़। मेम्मा शैतान रोमा भ्रल फोट्मा होङङा जु़ल्मा मेरामकु नड्डाम सिजेम रोडु़मा ल। 20लुङदुडा झुक्पा भ्रल मेरामङा सो़, उहेमका सिजेम थो़सु़मेडे गेर्सिद्वाक्तो रङल्याडु़, 21लावो मेराम दु़प्पा सक्फार मान्थिम भ्रल होङङा हापा थो़र मेलु़पा दु़म। मेम्मा गुका थो़र लु़डामका दु़खा ग्वामिमा उ थो़मतेर्सामिलो थो़र लु़मु डिथाडु़। 22चु़दुगोनो झुक्पा भ्रल मेरामङा सो़, उहेमका माम्चु़नीकु सिजेम थो़सु़, लावो हाम पेपा-फसिक्पा र्वाक्साका मिम्ताम-सो़र्ताम नुङ खाप्चीचो़ दु़म्मु मालु़मिमका माम्चु़नीकु सिजेमथो़ न मेसोकु़। मेम्मा सिजेमका र्वामिम होप्माम दु़म्मु मेचाप्सु़। 23लावो जो़पा क्वाडला झुक्पा भ्रल ने मेरामङा सो़, उहेमका सिजेम थो़सु़मा थेसिथेडु़। मेम्मा को सङ (१००) हापा, रु धु़म (६०) हापा, मा सु धु़म (३०) हापा मा सिट्पा भ्रल होप्माम मेराम दु़म।”
येशूका जेप्सेर नुङ मालिन्दोकु सीसि-सो़म्दी र्वाम्डिम
24येशूका मेर्मिमलाई आथावो कोङमी सीसि-सो़म्दी र्वाम्डी, “पाह्री-किब्दी ने येडा जो़पा भ्रल फोडु़मिम कोले मु़चु़ होप्मामङा बु। 25खोत्ले मु़चु़ अम्चेट्मिलो मेरामकु स्वाक्चिमो रोक्ता, मा जेप्सेरकु थेते-थेतेडा मालिन्दो फोट्जो़ल्लु़मा लस्ता। 26जेप्सेर बर्रामा मा बेड्डु़म थारीका मेगोडा मालिन्दो वो बर्गेड्डा।
27“मेराम मु़चु़कु डु़ल्चो़मिम रोम्डिमा गुनुङ र्वाम्डी, ‘ङाचो़, गानी इनी येडा जो़पा भ्रल फोट्निम मेएँ मा? मेसिन्डा मालिन्दो बालामका ल्यास्ता?’
28“मेराम मु़चु़का मेर्मिमलाई र्वाक्ता, ‘कोङनिम स्वाक्चिमोका आरे बु़डु़।’ डु़ल्चो़मिमका र्वाम्डी, ‘गुकु लकुमा मालिन्दो बुल्कु?’
29“मेराम मु़चु़का र्वाक्ता, ‘मेएँ, मालिन्दो बुल्निलो गानी जेप्सेर वो बुल्सोमु चाम्नी।’ 30मा-के हमु थारीसम्म मालिन्दो नुङ जेप्सेर कोयो-कोयोङा बर्मु ग्वाक्नी। मेकोतिमा मा-के हमु थारीका मा-के हक्पामिमलाई आरे र्वाङु, ‘ङादो मालिन्दो बुल्निमा चामु लागि बट्नी, लावो जेप्सेर ने आमा छेदेनेमगोडा जु़ल्नी’।”
रायाकु भ्रलकाम सीसि-सो़म्दी
(मर्कूस ४:३०-३४; लूका १३:१८-२१)
31येशूका मेर्मिमलाई कोङमी सीसि-सो़म्दी र्वाम्डी, “पाह्री-किब्दी कोले मु़चु़का उ येडा फोड्डु़म रायाकु भ्रल होप्मामङा सो़। 32मेराम खोत्लेडाम याक्के भ्रल लावो बर्तो लमा बगैंचागोडाम डोक्पु धक्सा होप्माम दु़म। धामुला हुट्पा चक्पुमिम रोमिमा मेरामकु ग्रेमडा पान्जी बनेबोमी।”
लङखामकाम सीसि-सो़म्दी
33येशूका आथावो मेर्मिमलाई कोङमी सीसि-सो़म्दी र्वाम्डी, “पाह्री-किब्दी लङखाम होप्मामङा सो़। मेराम लङखाम कोले मेसेमका सो़बेम चामु लागि न-ङोले (२५) किलोग्राम फुलडा ङोल्लु़। मे खोत्ले फुलङा लङखामका लिस्तु़।”
34येशूका मेर्मिमलाई खोत्ले ल्वा सीसि-सो़म्दीलामका र्वाम्डी। सीसि-सो़म्दी मान्थि गुमीका हाम वो मेर्वाम्वा। 35आरेसाका माम्चु़नीलाम-जेपाका र्वाक्ताम ओराम ल्वा रोक्थिड्डा:
“सीसि-सो़म्दीमिमलामका गो गानीनुङ जेङु।
सु़म्दिमोलोम थक्मा ल्वा गो गानीनुङ जो़होमका सो़उ।”#भज ७८:२
मालिन्दोकु सीसि-सो़म्दीका र्वामु माल्लु़म ल्वा येशूका र्वाम्डिम
36येशूका सेर्पा मु़चु़लाई पार्जो़ल्मिडिमा नेमगोनो हुम्डी। उनी सीसिपामिम रोम्डिमा गुमीनुङ र्वाम्डी, “येडाम मालिन्दोकु सीसि-सो़म्दीका र्वामु माल्लु़म ल्वा गुकुनुङ सो़नीका।”
37गुमीका मेर्मिमनुङ र्वाम्डी, “जो़पा भ्रल फोट्पा मु़चु़ मिनीचो़ सो़। 38मे येका सु़म्दिसेरलाई रेम्बु़। जो़पा भ्रलका उनी त्वापलाई माम्चु़नीकु साखामगोडा जु़ल्पामिमलाई रेम्बु़। मालिन्दोका माम्चु़नीकु स्वाक्चिमो शैतानकु चो़मिमलाई रेम्बु़। 39मालिन्दो फोट्पाका शैतानलाई रेम्बु़। हक्पा थारीका सु़म्दिसेरकु हुक्पा थारीलाई रेम्बु़। मेम्मा मा-के हक्पामिमका पाह्रीचो़मिमलाई रेम्बु़।
40“हाम ना हामकाम मालिन्दोलाई खोप्साका मुगोडा चाइमिम होङङा मेजो़पा मु़चु़मिमलाई पाह्रीचो़मिमका खोम्मी, मा मेर्मिम मु़चु़लाई खादीयु़म मुड्डा चामी। 41मिनीचो़का उ पाह्रीचो़मिमलाई थु़र्सु़मी, मा छु़ल बेबेट्पामिम नुङ खोत्ले रु़चो़मिमलाई मेर्मिमका उ किब्दीलामका ख्लुम्सोमी। 42मेम्मा वाक्तोङा लेट्पा मुगोडा मु़चु़मिमलाई घ्रोम्सोमी, मा मेर्मिमका ख्राप्तो उनी लि ख्रेन्मी। 43माम्चु़नीकु न-गो होप्माम मु़चु़मिम उनी माम्चु़नी पापकु किब्दीगोडा नेप्सुङ होङङा झ्वामी। उहेमकाम नोफ्ला बु, मेरामका थो़सु़नु़मा थेसिथेट्नु़।
थक्मा खाप्चीकु सीसि-सो़म्दी
44“पाह्री-किब्दी कोले मु़चु़का येगोयु़ थक्मा डार्डु़म खाप्ची होप्मामङा सो़। गेर्सिद्वाक्तो आथावो थक्जो़ल्लु़मा मे ये भ्रेमु लागि गुनुङ बाट्पा खोत्ले भ्रेड्डु़।
दिरिल्यकु सीसि-सो़म्दी
45“पाह्री-किब्दी जो़पा दिरिल्य माल्पा ब्यापारी होप्मामङा सो़। 46मे ब्यापारीका हापा थिकाम दिरिल्य डार्डु़, मा खोत्ले उ खाप्ची भ्रेसाका मे दिरिल्य भ्रेयु़डु़।
ङो हुपा पालुङकु सीसि-सो़म्दी
47“पाह्री-किब्दी दिरिदिनगोयु़ ओप्मा पालुङ होप्मामङा सो़। मेगोडा खोत्ले खालकाम ङोमिम हुम्सिमी। 48ङोका पालुङ देम्स्तामा पालुङचो़का दिरिदिनकु सो़पनो पालुङ ख्लुक्तु़। मेम्मा गन्डामा जो़पा ङो उ फिपिगोडा जु़ल्लु़, मा मेजो़पा ङो ने घ्रोक्सोक्तु़। 49सु़म्दिसेर हुक्पा थारीका आरेप्मामङा दु़म। पाह्रीचो़मिम योमिमा माम्चु़नीकु न-गो होप्माम मु़चु़मिमलामका छु़लचो़मिमलाई वाङ बोमी, 50मा मेर्मिमलाई वाक्तोङा लेट्पा मुगोडा घ्रोम्सोमी। मु़चु़मिम मेसिन्डा येमी, मा उनी लि ख्रेन्मी।”
51येशूका उनी सीसिपामिमलाई हिलाबेम्डी, “हाम गानी ओर्मिम खोत्ले ल्वा थेसिथेट्नी?” मेर्मिमका र्वाम्डी, “थेसिथेत्तोको।”
52मेकोतिमा गुमीका मेर्मिमलाई र्वाम्डी, “पाह्री-किब्दीकु दुथाम सीसिपा डु़म्ला सीपा खोत्ले मु़चु़ कोले नेमहप होप्मामङा सो़, उहेमका उ छेदेनेमलामका माकेम नुङ हापा थिकाम लाले सोजाम ख्लुकु़मी।”
नासरत देलडा येशूलाई नाप्छु़ट्मिडिम
(मर्कूस ६:१-६; लूका ४:१६-३०)
53ओर्मिम सीसि-सो़म्दी र्वामु दु़म्मिडिमा येशू मेलामका लम्डी। 54गुमी उनी त्वाकु देल नासरतडा ख्लोम्सिम्डी। गुमीका मेसिन्डाम घ्रो़म्दीनेमगोडा सीट्मिडिलो खोत्ले मु़चु़मिम ङाङाया दु़म्मिडिमा र्वाम्डी, “आरेप्माम नेप्ची नुङ हेल्लो वो मेल्वाम्मा खारी बेपा यु़म ओरामका बालामका ल्वास्तु़? 55हाम गु ने सङ बनेबेपाकु तारापाचो़ मेएँ मा? हाम उ मामकु नङ मरियम, मा उ ल्वाकमिम याकूब, योसेफ, सिमोन नुङ यहूदा मेएँ मा? 56उ जाउमो ल्वाकमिम हाम गुइनुङङा बुमिमिम मेएँ मा? ओर्मिम खोत्ले ल्वा बालामका सीस्ता?” 57मेर्मिमका येशूकु न छो़म नो़बेड्मिडी।
लावो येशूका मेर्मिमलाई र्वाम्डी, “वाङथो़म मु़चु़का माम्चु़नीलाम-जेपालाई डोक्पु मिम्मी, लावो उ त्वाकु देलडाम नुङ उमा नेमगोडाम मु़चु़का डोक्पु मेमिम्मी।”#यूह ४:४४ 58मेर्मिमका येशूलाई थो़र मेलु़मिवामका गुमीका मेसिन्डा हापा यु़मखारीमिम मेबेमिवा।
Atualmente Selecionado:
मत्ती 13: THUL
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Wycliffe Bible Translators, Inc. All rights reserved.
