Sélimɛ 19

Lɔti n syɔɔ kálagili ma li too Sodɔmi na lè

1A nyɛ̀ʔɛni tundunbéle siin sáà nan Sodɔmi na cângwɔɔgi nyɔ́ɔ na. Lɔti si maa pye wodɛ́ɛɔn ní Sodɔmi kpàánweeli na. A wi ga nyɛ̀ʔɛni tundunbéle nyaa, a wi fala n yìri bi sa be fàra, ní sáà too n wi yɛ́ɛgi cíbele tári na pe yɛʔɛ̀ ma. 2Níì jo: «Ni kàfɔɔlɔ, mii i yele nyɛ́ɛri, ki n yɛlɛ ye ba tìrige mii ma, mii wi nyɛ lè yele púlow, yé yele tɔ́lɔyi jée yé syɔ́ɔn naa mii kpáagi ni. Ki ga pye nyɛ̀ʔɛna nyǐngi nyɔ́ɔ na, yele a náa taʔa fala yele tánʔani na.» A be jo: «Eʔe, wolo a syɔ́ɔn kadàlagi na.» 3Kàjáa Lɔti maa tɔ̀nɔ n wári be na gbanʔama. A be lúru n kári n sáà tìrige wi kpáagi ni. A wi sámaga n sɔʔɔ be na níì levé fun búru sámaga, a be lìi. 4Kàjáa n be yaʔa sìnzinɛ ni, a kěgi nànbēle myɛ pan n baa kpáagi màʔa, gee bee n jo Sodɔmi nǎnbèle myɛw, n séli nìgɔcaribèle na fwɔɔ n sáà nan nànlɛɛbèle na. Pe myɛ maa pye yaà, wàa da fɔ̀n yaà í. 5#Jàb 19:22-24 A be baa Lɔti yeri níì wi pye: «Nǎnbèle be pan mɔ ma lè níjanʔa yébiligi ni, sán be nyɛ? Ki n yɛlɛ mi be yirige naa koro ga pye wolo í ba sínɛ ní be ní.»

6A Lɔti yiri yaà be ma kpaaweeli na níì kɔ̀rigi tɔ́n wiyɛɛ kàdoʔo ma. 7Níì be pye: «Ni senyɛ̀nnɛ, mii i yele nyɛ́ɛri, yele a kɔ́ kapeegi naa kpéʔele í. 8Pìibēle siin i naa mii ma pìcaala, bele be lè pe ga kɔ́ɔ̀ nàngeele cán í. Mii a bele bee yirige naa yele ma. Gee ga yele dɛ́nɛ lè, ye koro pye be na. Kàjáa yele a kɔ́ yafyɛn pye nǎnbèle naa na í, níì cán a pe baa tìrige mii ma wii, ki n yɛlɛ mii í da be kpáaw wéle.» 9A be jo: «Núngo yaà!» Ní níì jo: «Nǎnw naa n pan wi nibin n baa tɛ́ɛn ní wolo ní nibɔnrɔ na, ní si i caa bi pye wolo kútiijooo. Tɔ́ɔliw ni gee wolo a kpéʔele mɔ na lè, ki a pee bi sɔ̀lɔ gee na wolo a kpéʔele be na lè.» A be fala n Lɔti sàra n sígi ní i syée kpaaweeli ma bi sa kɔ̀rigi kabi. 10A nyɛ̀ʔɛni tundunbéle fala n kɔ́yi sánʔa n Lɔti cò n lúrugo n lége kpáagi ni peyɛɛ gurugo níì kɔ̀rigi tɔ́n. 11#2Fàn 6:18 Nǎnbèle bele si pe da pye kpaaweeli na lè, a be bele bee myɛ kàriga fúunbéle, n pìíbèle pínɛ wolɛɛbèle ni. Pe ga níì pye bi gbǎn kpaaweeli tɛ́ʔɛ cán í.

12A nyɛ̀ʔɛni tundunbéle Lɔti pye: «Bɛ̀lɛ́ be ní i nyɛ nɛɛ naa mɔ ma? Mɔ kpaajeebèle, ní mɔ piibèle be lè nǎnbèle ní cébèle, mɔ syɔ́ɔn o mɔ syɔ́ɔn ga pye kěgi naa ni, ki n yɛlɛ mi wi yirige gi ni. 13Wolo a tɛ́ɛgi naa kálagi. Níì cán kéelee na be yákpogèle wáa ní gi mɛ́ɛgi ní Yawe yɛ́ʔɛ ma lè li n pee n baa sɔ̀lɔ, a Yawe si wolo tun wo ba gi kálagi.» 14A Lɔti yiri n kári n sáà joo ní wi kpaajeebèle ní níì be pye: «Ki n yɛlɛ ye yìri ye yiri tɛ́ɛgi naa ni, níì cán Yawe a kěgi kálagi.» Kàjáa wi kpaajeebèle maa gi nyaa mɔ a jo a wi kɔ̀nʔɔ́ wii.

15A ki ga pye nyǐnjerigi na, a nyɛ̀ʔɛni tundunbéle Lɔti wáriga n láa níì jo: «Ki n yɛlɛ mi yìri maa syée ní mɔ céw ní, n fàra mɔ calipiigèle siin na ge nyɛ nɛɛ naa lè, koro ga pye yele í syɔɔ gàlagíw ma wi a nan kěgi naa na lè.» 16#2Pyɛ 2:7 Lɔti si maa kòro ni sɔ̀ʔɔ sɔ́ʔɔ. A nǎnbèle wi cò kɔ́gi na, n fàra wi céw ní wi pìíbèle siin na n yiri kěgi kàdoʔo ma, níì cán a Yawe da gi yìrige bi wi syɔɔ wii.

17Lǎli ni pe be yirige n kwɔ́ɔ kěgi ni lè, a nyɛ̀ʔɛni tundunwaa nibin Lɔti pye: «Da fé mi miyɛɛ zyɔɔ. Mɔ a kɔ́ kàri bi wéle kàdoʔo ma í. Mɔ a kɔ́ yére tɛɛfiigi tɛ́ɛgaa faala ni í. Da fé maa syée mi yiri tɛ́ɛgi naa ni mi sa kòro nyanbelegi na koro ga pye mɔ a kɔ́ kálagi í.»

18A Lɔti wi yari: «Eʔe Kàfɔw, mii i mɔ nyɛ́ɛri! 19Mii i mɔ nyɛ́ɛri mii wi lè mɔ púlow, mii n kpɔʔɔrɔ taa mɔ ma, mɔ n tɔ̀nɔ n nyɔɔ mii na, níì mii yaʔa sìi na. Mii si a gbǎn fàn bi syɔɔ bi sa nan nyanbelegi na í, kapeegi í kòro mii sìndaa ni kólogi na bi mii kpóo í. 20Mii i mɔ nyɛ́ɛri kěgi naa wéle, ki n nùuni n yɛlɛ mii í gbǎn fàn bi sa jée yaà. Ki ga kpɔ́ʔɔ í. Ki n yɛlɛ mi gi yaʔa mii í tɔ́ɔ fàn syɔɔ bi kári yaà beè jàngó bi kòro sìi na. Ki ga cɛ́rɛ ì?» 21A wi wi pye: «Wéle, mii n wɔ́ɔ fɔ̀lɔ mɔ ma kéeli bee na. Kěgi kéele mɔ joo lè, mii a gi yaʔa sìngalagi ni mɔ kéeli na. 22Da fé kelekele mi syɔɔ mi sa jée yaà beè. Níì cán mii a gbǎn yafyɛn kpéʔele í, fwɔɔ bi taa mɔ í fàn bi nan yaà.» Koro na be kèpili bee mɛ́ʔɛ le ni li yiri Sowari.

23Lǎli ni Lɔti nan lè Sowari na, cángi maa folo. 24#Mat 10:15; 11:23,24; Luk 10:12; 17:29; 2Pyɛ 2:6; Zyu 7 Lǎli bee ni a Yawe naà ní dìrigí yìrige nyɛ̀ʔɛni na n cáan Sodɔmi ní Gomɔri na àmɛɛ zàʔá nyɛ lè, dee di yìri woro Yawe ma lè. 25A wi kěyi bee kálagi ní tɛ́nɛmi myɛ ní, n fàra yi syɛ́ɛnbèle myɛ, ní tiicɔ́rɔri na. 26#Luk 17:32 Lɔti céw si maa kàri n wéle kàdoʔo ma, a wi kàri n pye sologàánna.

27A Abirahami sɔ̀li n yìri nyǐngi nyɔ́ɔ na n kári tɛ́ɛgi ma, gee ni wi da sáà yére Yawe yɛ́ʔɛ ma lè. 28A wi ga Sodɔmi ní Gomɔri ní tɛ́nɛmi myɛ wéle bi yi màʔa lè, a wi wírige nyaa ki i yìrigí tári na ni lúru ǹjogi ni àmɛɛ fúru wírige nyɛ lè.

29Lǎli ni si Kolocɔlɔɔ tɛɛfiigi kèye kálagi lè, beè Lɔti da pye lè wodɛ́ɛɔn ní, wi maa sɔ̀ngi Abirahami kéeli na níì Lɔti yirige yaà kálagili nínge ni.

Lɔti ní wi calipiigèle kéele

30A Lɔti ní wi calipiigèle siin yiri Sowari ni n kári n sáà kòro nyanbelegi na, níì cán wi maa fyáa bi kòro Sowari ni. A woro ní wi calipiigèle siin sáà kòro nyanbeweegaa ni. 31Cangaa, pìíwee wi lɛɛ lè, a woro gi joo wi cɔnɔw ma níì jo: «Wolo tóow wi lɛɛ n kwɔ́ɔ wee, nàɔn faala si o nyɛ tári ni bi ba pye ní wolo ní bi yɛlɛ ní gi ní àmɛɛ gi kpéʔele lè í. 32Da maa wo ba dùvɛɛn kaan wolo tóow ma wi gbaa bi wi yɛ́ɛgi wɔ́ɔ, si sínɛ ní wi ní bi yòdaʔaya kaan wi ma.»

33A be dùvɛɛnw kaan be tóow ma a wi gbaa yébiligi bee ni. A pìilɛɛw baa sínɛ ní wi ní. Lǎli ni wi baa sínɛ ní tofɔw ní lè, ní lǎli ni wi yìri lè, tofɔw ga yafyɛn cán gee bee ni í. 34A ki ga pye nyǐndaligi na, a pìilɛɛw gi joo wi cɔnɔw ma níì jo: «Mii n taa n sínɛ ní wolo tóow ní pìlige ni. Ki n yɛlɛ wo ní wɔ́ɔ dùvɛɛnwaa kaan wi ma níjanʔa yébiligi ni, mɔ si sa sínɛ ní wi ní koro ga pye wolo í yòdaʔaya kaan wi ma.» 35Yébiligi bee ni a be níì dùvɛɛnwaa kaan be tóow ma a wi gbaa. A cɔnɔvɔw yìri n kári n sáà sínɛ ní wi ní. Lǎli ni wi baa sínɛ ní tofɔw ní lè, ní lǎli ni wi yìri lè, tofɔw ga yafyɛn cán gee bee ni í.

36A Lɔti pìíbèle siin fícarigèlē taa be tóow ma. 37A pìilɛɛw baa nànbile see níì li mɛ́ɛgi le ni li yiri Mowabi. Mowabi ye be nyɛ lè beè níjanʔa, wee bee wi nyɛ be tofɔlɛɛgi. 38A cɔnɔvɔw wɔ́ɔ baa nànbile see níì li mɛ́ɛgi le ni li yiri Bɛn-Amii. Amɔn syɛ́ɛnbèle pe nyɛ lè bele níjanʔa, woro wi nyɛ be toolɛɛgi.

Atualmente Selecionado:

Sélimɛ 19: CB10

Destaque

Copiar