Sélimɛ 13
13
1A Abirami yiri Ezyipiti ni n lúru ni syée wòrogulo kàbangi na, woro ní wi céw, ní wi kɔlɔ̀ yáriri myɛ ní. Lɔti maa pínɛ ní wi ní.
Abirami ní Lɔti n láʔa peyɛɛ na
2Abirami lɔ́ri si maa tɔ̀nɔ n nɛʔɛ gbanʔama, ti lè yaweeri, ní wálifiiw, ní tɛ́ɛw. 3A wi láa yaà wòrogulo kàbangi na ni tìrigí ní i yìrigí ni syée, fwɔɔ n taa n sáà nan Betɛli na, beè wi da sélì wi fànikpaagi kóri lè booma ni, Betɛli ní Ayi níngi ni. 4A wi wɔ́ɔ̀ nan sáriga-wòlo-yafaangi na, gee wi da sélì faan yaà lè. A Abirami Yawe mɛ́ɛyi yeri yaà beè.
5Yaweeyiligēle, ní yaweekpologèlē maa wɔ́ɔ̀ pye Abirami pínɛnyɛnw Lɔti ma saʔa n fàra fànikpaaya na. 6A tári bee cɛ́rɛ be ni. Pe ga pye bi gbǎn kún di ni í. Níì cán pe kɔlɔ̀ yáriri maa nɛʔɛ. Pe ga gbàn n pínɛ n tɛ́ɛn í. 7A kàsii jée Abirami yaweenaʔabèle ní Lɔti yaweenaʔabèle nínge ni. Koro n gi taa lǎli bee ni Kanaan ye, ní Perezi ye maa pye yaà wodɛ́ɛnbéle ní tári ni. 8Lǎli bee ni a Abirami gi joo Lɔti ma níì jo: «Ki ga yɛlɛ mii ní mɔ í tún í. Ki ga wɔ́ɔ̀ yɛlɛ mii yaweenaʔabèle ní mɔ wóbèle í tún í. Níì cán wolo i nyɛ senyɛ̀nnɛ. 9Tári myɛ di dee mɔ yɛ́ʔɛ ma. Ki n yɛlɛ wo wàli woyɛɛ na. Mɔ ga kári kàmɔnɔ ma, mii a fala kàliige ma. Mɔ si ga kári kàliige ma, mii a fala kàmɔnɔ ma.»
10 #
Sél 2:10
A Lɔti yɛ́ɛgi yìrige n Zyuridɛn tɛɛfiigi myɛ wéle, a wi gi nyaa lǒgi i nyɛ gi kàbanyi myɛ na. Sáni Yawe í Sodɔmi ní Gomɔri kálagi lè, tɛ́ɛgi bee maa pye mɔ a jo Yawe nángwɔɔw wii, mɔ a jo Ezyipiti tári dii, n kári fwɔɔ n sáà nan Sowari na. 11A Lɔti fala n Zyuridɛn tɛɛfiigi myɛ nyɛ́nɛ n wòlo gi pye woro wóʔo. Níì fala n kári n sáà tɛ́ɛn canʔafolomɔ kabangi na. Kánmi bee na be wàli peyɛɛ na. 12A Abirami kòro yaà Kanaan tári ni, á Lɔti sáà kòro tɛɛfiigi kèye ni, ní sáà wi fànikpaayi kóri Sodɔmi taana. 13Sodɔmi syɛ́ɛnbèle si maa tɔ̀nɔ n pee. Pe maa ni kapeegèle kpéʔele Yawe yɛ́ʔɛ ma.
14A Lɔti ga wàli Abirami na, a Yawe gi joo Abirami ma níì jo: «Tɛ́ɛgee ni mɔ nyɛ lè, n mɔ yaʔa beè ki n yɛlɛ mi mɔ yɛ́ɛgi yìrige mi wéle mi kári solomɔkulo ní wòrogulo kàbangi na, mí wɔ́ɔ wéle mi kári canʔafolomɔ ní canʔajeemɛ kabangi na. 15#Kap 7:5 Táree myɛ mɔ nyaa lè, mii a di kaan mɔ ní mɔ yodaʔayi ma di pye yele wóro làla o làla. 16Mii a mɔ yodaʔayi kpéʔele yi nɛʔɛ bi pye àmɛɛ támiigi nyɛ lè. Syɔɔn ga pye bi gbǎn támiigi córo, pe a wɔ́ɔ gbǎn mɔ yodaʔayi córo. 17Ki n yɛlɛ mi yìri mi tári nyaari mi foro, mi di tɔnɔganmi, ní di kpɔ́ʔɔganmi cán, níì cán mɔ má mii a di kaan.»
18A Abirami wi fànikpaayi kɔ́n n kàriga n pan n baa tɛ́ɛn Mamire syɛni tíiri nínge ni, Heburɔn taana. A wi sáriga-wòlo-yafanʔa faan yaà beè Yawe ma.
Atualmente Selecionado:
Sélimɛ 13: CB10
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Kolocɔlɔɔ Syɛ́ɛnri © Bible Society of Côte d'Ivoire, 2008.
