Sélimɛ 12

ABIRAHAMI KEELI

Kolocɔlɔɔ n Abirami yeri wi yiri wi tári ni

1 # Kap 7:2-3; Heb 11:8 A Yawe gi joo Abirami ma níì wi pye: «Ki n yɛlɛ mi yiri mɔ tári, ní mɔ kegi, ní mɔ tóow kpaʔa ni. Táree mii a tɛ̀ɛn mɔ na lè, maa syée dee bee ma.

2Mii a mɔ kpéʔele syɛɛnfele-nɛʔɛgɛ,

si dùba taʔa mɔ na, si wɔ́ɔ mɔ mɛ́ɛgi kpɔ́ʔɔ.

Mɔ ni syɛɛnsanbèle a ra dùbaw taagi.

3 # Gal 3:8 Bele pe ga ni dùba kpéʔele mɔ ma lè,

mii a dùbaw taʔa bele bee na.

Bele si pe ga ni mɔ dángi lè, mii a wɔ́ɔ bele bee dánga.

Mɔ ni tári narigbaaya myɛ a ba dùbaw taa.»

4A Abirami kári n yɛlɛ ní gi ní àmɛɛ Yawe gi joo wi ma lè. A Lɔti wɔ́ɔ̀ kári ní wi ní. Lǎli ni Abirami yiri Karan ni ni syée lè, wi maa taa yɛ̀ʔɛlɛ togoye taanri ní kpɔrigɔ ní kagunɔ.

5Abirami maa wi céw Sarayi kɔ́ri n fàra wi senyɛnw jáa na wi lè Lɔti n kári. A be wɔ́ɔ̀ púlobèle myɛ kɔ́ri, bele be taa n be yaʔa Karan ni lè, n fàra be lɔ́ri myɛ na. A be yiri yaà beè ni syée Kanaan tári ma.

Abirami n jée Kanaan tári ni, ní wi gàríw Ezyipiti ma

A be i syée fwɔɔ n sáà nan Kanaan tári na. 6A Abirami tári foro n kári fwɔɔ n sáà nan tɛ́ɛgi na pe yiri lè Sisyɛmi, níì kári n sáà nan fwɔɔ More syɛni tíigi na. Lǎli bee ni Kanaan ye be pye tári bee ni.

7 # Kap 7:5; Gal 3:16 A Yawe wiyɛɛ dɛ̀ɛn Abirami na níì wi pye: «Mii a tári naa kaan mɔ yodaʔagi ma.» Tɛ́ɛgee ni Yawe wiyɛɛ dɛ̀ɛn Abirami na lè, a Abirami sáriga-wòlo-yafanʔa faan Yawe ma tɛ́ɛgi bee ni. 8A Abirami ga yiri yaà beè, a wi fala nyanbeleyi kúlo kàbaan na Betɛli canʔafolomɔ ma, ní sáà wi fànikpaagi kóri, níì Betɛli yaʔa canʔajeemɛ kabangi na, Ayi si i nyɛ canʔafolomɔ kabangi na. A wi níì sáriga-wòlo-yafaangaa faan tɛ́ɛgi bee ni Yawe ma níì Yawe mɛ́ɛgi yeri. 9Koro kàdoʔo ma a Abirami taʔa n fala yɛʔɛ̀ ma. Wi maa ni tìrigí ní i yìrigí ni syée wòrogulo kàbangi na.

10A kateʔe baa too tári na. Kateegi maa ni gbàngí ni syée tári na. A Abirami kári Ezyipiti ma koro ga pye bi sa tɛ́ɛn yaà beè. 11A pe ga sáà nan bi jée Ezyipiti tári ni, a wi gi joo wi céw Sarayi ma níì jo: «Wéle, mii n gi cán mɔ tɔ̀nɔ́ i nyɛ cecàndeleo. 12Ezyipiti syɛ́ɛnbèle ga sáà mɔ nyaa, pe a jo: ‹Wi céw wii,› si mii kpóo si mɔ yaʔa sìi na. 13#Sél 20:2; 26:7 Koro na ki n yɛlɛ mi be pye mɔ i nyɛ mii senyɛnnɛ, koro ga pye pe mii sámaga be cò mɔ kéeli na, mii si wɔ́ɔ kòro sìi na mɔ bárigaw ni.»

14Lǎli ni Abirami sáà nan Ezyipiti na lè, a Ezyipiti syɛ́ɛnbèle gi nyaa wi céw n tɔ̀nɔ n nyɔɔ. 15A Faraɔnw syɛɛnkpolobéle wɔ́ɔ̀ wi nyaa, a be sáà wi kéeli joo n kpɔ́ʔɔ Faraɔnw ma. Lǎli bee ni a be céw kɔ́ri n kári Faraɔnw fànʔafɔ-gbaʔa ma. 16A wi fala ni kacàngēle kpéʔele Abirami na Sarayi kéeli na. Wi maa yaweeyiligēle, ní yaweekpologèlē kaan Abirami ma, n fàra pulonànbēle ní pulocabala na, ní wɔ́ɔ̀ jòfanipaliya ní jòfanicaaya, ní fàlibaaya kaan wi ma. 17Kàjáa Yawe maa Faraɔnw ní wi kpáagi wòolo kpúmɔn ní wɔʔɔgboloyo ní Abirami céw Sarayi kéeli na. 18A Faraɔnw si Abirami yeri ní baa wi pye: «Nyàʔá mɔ pye mii na gee? Nyàʔá na mɔ da gi joo mii ma níì mii pye mɔ cɔ́ɔ wii í? 19Nyàʔá na mɔ mii pye: ‹Mii senyɛnnɛ wii,› á mii kɔ́ɔ̀ jo mii a wi pɔri wi pye mii cɔ́ɔ? Tɔ́ɔliw ni, mɔ céw wéle wee. Wi kɔ́ri maa syée.»

20A Faraɔnw fala n gi joo n gbàn wi wóbèle ma níì jo pe Abirami tórigo, woro ní wi céw, ní wi kɔlɔ̀ yáriri myɛ ní.

Atualmente Selecionado:

Sélimɛ 12: CB10

Destaque

Copiar